വിവിധ ന്യൂനപക്ഷ മതവിഭാഗങ്ങളിൽ പെടുന്ന വിദ്യാർത്ഥികൾക്ക് , സർക്കാർ നൽകുന്ന വിവിധ സ്കോളർഷിപ്പുകൾക്കും മറ്റു പഠനാനുകൂല്യങ്ങൾക്കും അപേക്ഷിക്കാം. ന്യൂനപക്ഷ മതവിഭാഗങ്ങളെന്ന് നിഷ്കർഷിച്ചിട്ടുള്ള ക്രിസ്ത്യൻ, മുസ്ലിം, സിഖ്, ബുദ്ധ, ജൈന, പാഴ്‌സി വിഭാഗങ്ങളിലെ വിദ്യാർത്ഥികൾക്കാണ് , സംസ്ഥാന സർക്കാർ അനുവദിക്കുന്ന വിവിധ സ്‌കോളർഷിപ്പുകൾക്ക് അപേക്ഷിക്കാനവസരം. സംസ്ഥാന സർക്കാർ നിയന്ത്രണത്തിലുള്ള ന്യൂനപക്ഷ ക്ഷേമ ഡയറക്ടറേറ്റാണ് അപേക്ഷ ക്ഷണിച്ചിരിക്കുന്നത്. ന്യൂനപക്ഷക്ഷേമ വകുപ്പിന്റെ
വെബ്‌സൈറ്റിലെ സ്കോളർഷിപ്പ് ലിങ്കിലുടെയാണ്, സ്‌കോളർഷിപ്പിന് അപേക്ഷിക്കേണ്ടത്. എല്ലാ ജില്ലാ കളക്ടറേറ്റുകളിലെ ന്യൂനപക്ഷ സെല്ലുകളുമായി ബന്ധപ്പെട്ടാൽ കൂടുതൽ വിവരങ്ങൾ ലഭ്യമാണ്.
ന്യൂനപക്ഷ മതവിഭാഗങ്ങളിലെ വിവിധ മതങ്ങളുടെ ജനസംഖ്യാനുപാതത്തിൽ നൽകപ്പെടുന്നതാണ് , സ്കോളർഷിപ്പ് ആനുകൂല്യങ്ങൾ. ബിപിഎൽ വിഭാഗക്കാർക്കാണ് ആനുകൂല്യത്തിന് മുഖ്യ പരിഗണന ലഭിക്കും. എന്നാൽ ഏതെങ്കിലും വിഭാഗത്തിൽ വേണ്ടത്ര ബിപിഎൽവിഭാഗക്കാരില്ലെങ്കിൽ, എപിഎൽ വിഭാഗക്കാരായ അപേക്ഷകരിൽ നിന്നും 8 ലക്ഷം രൂപ വരെ വാർഷിക വരുമാനമുള്ളവരെ പരിഗണിക്കുന്നതാണ്.
പ്രധാനപെട്ട സ്കോളർഷിപ്പുകൾ
1.സി എച്ച് മുഹമ്മദ് കോയ സ്കോളർഷിപ്പ്
2.മദർ തെരേസ സ്കോളർഷിപ്പ്
3.പ്രൊഫ.ജോസഫ് മുണ്ടശ്ശേരി സ്കോളർഷിപ്പ്
4.സി.എ/സി.എം.എ/സി.എസ്. സ്കോളർഷിപ്പ്
5.സിവിൽ സർവീസ് സ്കോളർഷിപ്പ്
6.എപിജെ അബ്ദുൽ കലാം സ്കോളർഷിപ്പ്
7.ഇബ്രാഹിം സുലൈമാൻ സേട്ട് ഉർദു സ്കോളർഷിപ്പ്
8.ഐ.ടി.ഐ. പഠനത്തിന്, റീ-ഇംപേഴ്‌സ്‌മെന്റ് സ്‌കീം
1.സി.എച്ച്. മുഹമ്മദ് കോയ സ്കോളർഷിപ്പ്
സംസ്ഥാനത്തെ വിവിധ കോളേജുകളിൽ ബിരുദം, ബിരുദാന്തരബിരുദം,പ്രൊഫഷണൽ ബിരുദം എന്നീ കോഴ്‌സുകളിൽ പഠിക്കുന്ന വിദ്യാർത്ഥിനികൾക്കുള്ളതാണ്, സി. എച്ച് .മുഹമ്മദ് കോയ സ്‌കോളർഷിപ്. ഹോസ്റ്റൽ സ്റ്റെപ്പന്റ് / പ്രതിവർഷ സ്കോളർഷിപ്പ് ഇവയിൽ ഒന്നിനാണ് ,അപേക്ഷിക്കാനവസരമുള്ളത്. ബിരുദപഠിതാക്കൾക്ക് 5000/- രൂപയും, ബിരുദാനന്തര ബിരുദപഠിതാക്കൾക്ക് 6000/- രൂപയും, പ്രൊഫഷണൽ കോഴ്‌സുകളിൽ പഠിക്കുന്നവർക്ക് 7000/- രൂപയുമാണ് സ്കോളർഷിപ്പ് തുക. ഹോസ്റ്റൽ സ്‌റ്റൈപ്പന്റാണ് അപേക്ഷിക്കുന്നതെങ്കിൽ-13000/- രൂപ ലഭിക്കും.
2.മദർതെരേസ സ്കോളർഷിപ്പ്
കേരളത്തിലെ ഗവൺമെന്റ് നേഴ്‌സിംങ് കോളേജുകളിൽ നഴ്‌സിംങ് ഡിപ്ലോമ, പാരാ മെഡിക്കൽ ഡിപ്ലോമ എന്നീ കോഴ്‌സുകളിൽ പഠിക്കുന്ന വിദ്യാർത്ഥികൾക്കാണ് മദർതെരേസ സ്‌കോളർഷിപ്പിന അപേക്ഷിക്കാനർഹത. അപേക്ഷാർത്ഥി, യോഗ്യതാപരീക്ഷയിൽ ചുരുങ്ങിയത് 45% മാർക്കെങ്കിലും മാർക്ക് നേടിയിരിക്കണം. ആകെ സ്‌കോളർഷിപ്പുകളിൽ 50% പെൺകുട്ടികൾക്കായി സംവരണം ചെയ്തിട്ടുണ്ട്. തെരഞ്ഞടുക്കപ്പെടുന്നവർക്ക് 15000/- രൂപയാണ് പ്രതിവർഷ സ്കോളർഷിപ്പ്.
3.പ്രൊഫ.ജോസഫ് മുണ്ടശ്ശേരി സ്കോളർഷിപ്പ്
എസ്.എസ്.എൽ.സി,പ്ലസ് ടു, വി.എച്ച്.എസ്.ഇ. എന്നീ പരീക്ഷകൾക്ക് എല്ലാ വിഷയങ്ങൾക്കും എ+ ഗ്രേഡ് നേടിയവർക്കും ബിരുദത്തിന് 80% മാർക്കും ബിരുദാനന്തര ബിരുദത്തിന് 75% മാർക്കും നേടി വിജയിച്ചവർക്കും അപേക്ഷിക്കാനവസരമുണ്ട്.എസ്.എസ്.എൽ.സി/ പ്ലസ് ടു വി.എച്ച്.എസ്.ഇ വിഭാഗക്കാർക്ക് 10,000/- രൂപയും ബിരുദത്തിനും ബിരുദാനന്തര ബിരുദത്തിനും നിർദ്ദിഷ്ട മാർക്കുകൾ നേടി വിജയിച്ചവർക്ക് 15000/- രൂപയും സ്കോളർഷിപ്പ് ലഭിക്കും.
4.സി.എ./സി.എം.എ./സി.എസ്. സ്കോളർഷിപ്പ്
ചാർട്ടഡ് എക്കൗൺഡൻസി , കമ്പനി സെക്രട്ടറി, കോസ്റ്റ് & മാനേജ്മെന്റ് എക്കൗണ്ടൻസി കോഴ്‌സുകളിൽ ഫൈനൽ, ഇന്റർ മീഡിയറ്റ്, പ്രഫഷണൽ , എക്സികുട്ടീവ് യോഗ്യത നേടുന്നതിനായി പരിശീലന കോഴ്‌സുകളിൽ പങ്കെടുക്കുന്ന ന്യൂനപക്ഷ വിദ്യാർത്ഥികൾക്കാണ് , അപേക്ഷിക്കാനവസരം. പ്രതിവർഷം 15000/- രൂപയാണ് സ്കോളർഷിപ്പ് തുക.
5.സിവിൽ സർവീസ് സ്‌കീം
സിവിൽ സർവ്വീസ് പരീക്ഷയ്ക്ക് തയ്യാറെടുക്കുന്ന ന്യൂനപക്ഷ മത വിഭാഗങ്ങളിലെ ഉദ്യോഗാർത്ഥികൾക്ക് കോഴ്‌സ് ഫീസും ഹോസ്റ്റൽ ഫീസും റീ -ഇംബേഴ്‌സ്‌മെന്റ് നൽകുന്ന സ്കോളർഷിപ്പ് പദ്ധതിയാണിത്. കോഴ്‌സ് ഫീ ഇനത്തിൽ പ്രതിവർഷം 20000/- രൂപയും, ഹോസ്റ്റൽ ഫീ ഇനത്തിൽ പ്രതിവർഷം 10000/- രൂപയും സ്കോളർഷിപ്പ് തുകയായി ലഭിക്കും.
6.എ.പി.ജെ. അബ്ദുൽ കലാം സ്കോളർഷിപ്പ്
പോളിടെക്നിക് ഡിപ്പോമയ്ക്ക് പഠിക്കുന്ന വിദ്യാർത്ഥികൾക്കപേക്ഷിക്കാം. അപേക്ഷകർ ,സർക്കാർ/എയ്ഡഡ്/സർക്കാർ അംഗീകൃത സ്വാശ്രയ പോളിടെക്‌നിക്കുകളിൽ ത്രിവത്സര ഡിപ്ലോമ കോഴ്‌സിന് പഠിക്കുന്നവരായിരിക്കണം. ആകെ സ്കോളർഷിപ്പുകളുടെ 30% സ്കോളർഷിപ്പ് പെൺകുട്ടികൾക്കായി സംവരണം ചെയ്തിരി ട്ടുണ്ട്. തെരഞ്ഞെടുക്കപ്പടുന്നവർക്ക്, പ്രതിവർഷം 6000/- സ്കോളർഷിപ്പ് ലഭിക്കും.
7.ഇബ്രാഹിം സുലൈമാൻ സേട്ട് ഉർദു സ്കോളർഷിപ്പ്
ഉറുദു പഠനം പ്രോൽസാഹിപ്പിക്കുന്നതിന്റെ ഭാഗമായി വകുപ്പ് ഏർപ്പെടുത്തിയ സ്കോളർഷിപ്പാണ്,ഇബ്രാഹിം സുലൈമാൻ സേട്ട് ഉർദു സ്കോളർഷിപ്പ് .ഉറുദു ഒന്നാം ഭാഷയായി പഠിച്ച, എല്ലാ വിഷയങ്ങൾക്കും എ പ്ലസ് നേടിയ എസ്.എസ്.എൽ.സി. വിദ്യാർത്ഥികൾക്കും ഉറുദു രണ്ടാം ഭാഷയായി പഠിച്ച് ഹയർ സെക്കന്ററി പൂർത്തികരിച്ച വിദ്യാർത്ഥികൾക്കും അപേക്ഷിക്കാവുന്നതാണ്. പ്രതിവർഷം 1000/- രൂപ സ്കോളർഷിപ്പ് തുകയായി ലഭിക്കും.
8.ഐ.ടി.ഐ. പഠനത്തിന്, റീ-ഇംപേഴ്‌സ്‌മെന്റ് സ്‌കീം
പ്രൈവറ്റ് ഐ.റ്റി.ഐ. കളിൽ ഒരു വർഷമോ രണ്ടു വർഷമോ നീണ്ടു നിൽക്കുന്ന കോഴ്‌സുകൾക്ക് പഠിക്കുന്ന വിദ്യാർത്ഥികൾക്ക് അപേക്ഷിക്കാം. ആകെ സ്കോളർഷിപ്പുകളുടെ 10% സ്കോളർഷിപ്പ് പെൺകുട്ടികൾക്കായി സംവരണം ചെയ്തിരിക്കുന്നു.ഒരു വർഷ കോഴിസിന് 10,000/- രൂപയും രണ്ട് വർഷ കോഴ്‌സിന് 20000/- രൂപയും ഫീസ് റീ – ഇംപേഴ്‌സ്‌മെന്റ് ലഭിക്കും.
കൂടുതൽ വിവരങ്ങൾക്കും അപേക്ഷാ സമർപ്പണത്തിനും
ഓഫീസ് അഡ്രസ്
ഡയറക്ടർ,
ന്യൂനപക്ഷ ക്ഷേമവകുപ്പ്,
നാലാം നില, വികാസ് ഭവൻ,
തിരുവനന്തപുരം
