ട്രക്കിങ്ങിന് ബുക്ക് ചെയ്യുന്നവർ ഫിറ്റ്നസ് സർട്ടിഫിക്കറ്റ് ഉൾപ്പെടെയുള്ള രേഖകൾ വരുമ്പോൾ ഹാജരാക്കണം
തിരുവനന്തപുരം: സാഹസിക യാത്ര ഇഷ്ടപ്പെടുന്നവരുടെ കാത്തിരിപ്പിന് അവസാനമായി അഗസ്ത്യാർകൂടം ട്രക്കിങ് ങിന് ഇന്ന് തുടക്കം. ഫെബ്രുവരി 11 വരെയാണ് അഗസ്ത്യാർകൂടം ട്രക്കിങ് നടക്കുക. രണ്ട് ഘട്ടങ്ങളിലായാണ് ട്രക്കിങ്ങിൻ്റെ ബുക്കിങ്. ജനുവരി 14 മുതൽ 31 വരെയുള്ള ട്രക്കിങ്ങിൻ്റെ ഓൺലൈൻ ബുക്കിങ് ജനുവരി ആദ്യവാരം നടന്നു. ഫെബ്രുവരി 1 മുതൽ 11 വരെയുള്ള രണ്ടാംഘട്ടത്തിൻ്റേത് ജനുവരി മൂന്നാം വാരത്തെ അവസാന ദിവസങ്ങളിലും നടക്കും.
ട്രക്കിങ് ഫീസ് 2420 രൂപ, ഇക്കോസിസ്റ്റം മാനേജ്മെൻ്റ് സ്പെഷ്യൽ ഫീ 580 രൂപയും ഉൾപ്പടെ ഒരാൾക്ക് 3,000 രൂപയാണ് ഫീസ് വരുന്നത്. രജിസ്റ്റേർഡ് മെഡിക്കൽ പ്രാക്ടീഷണർ 7 ദിവസത്തിനുള്ളിൽ നൽകുന്ന മെഡിക്കൽ ഫിറ്റ്നസ് സർട്ടിഫിക്കറ്റ് ഉള്ളവർക്കേ ട്രക്കിങ് നടത്താൻ അനുമതി ലഭിക്കൂ.
കേരള വനം വകുപ്പ് ഔദ്യോഗിക വെബ്സൈറ്റ് വഴിയാണ് അഗസ്ത്യാർകൂടം ട്രക്കിങ് ബുക്കിങ് നടക്കുന്നത്. വനം വകുപ്പിൻ്റെ ഇക്കോ – ടൂറിസം പോർട്ടൽ ആയ www.forest.kerala.gov.in , serviceonline.gov.in/trekking എന്നിവ വഴി ഓൺലൈനായി ബുക്ക് ചെയ്യാം.
1,868 മീറ്റർ ഉയരമാണ് അഗസ്ത്യാർകൂടത്തിനുള്ളത്. കൊടുമുടിയുടെ ഒരു ഭാഗം തമിഴ്നാടുമായി അതിർത്തി പങ്കിടുന്നതാണ്. കേരളത്തിലെ തിരുവനന്തപുരം, കൊല്ലം, പത്തനംതിട്ട ജില്ലകളിലും തമിഴ്നാട്ടിലെ തിരുനെൽവേലി, കന്യാകുമാരി ജില്ലകളിലും വ്യാപിച്ചു കിടക്കുന്ന മലനിരയാണ് അഗസ്ത്യാർകൂടം. കുറ്റിച്ചൽ പഞ്ചായത്തിലാണ്.
നെയ്യാർ, കരമനയാർ, താമരപർണി നദികളുടെ ഉത്ഭവ സ്ഥാനമാണ് അഗസ്ത്യാർകൂടം. ശെന്തുരുണി, നെയ്യാർ, പേപ്പാറ വന്യജീവി സങ്കേതകങ്ങളും മുണ്ടൻതുറൈ കടുവാ സങ്കേതവും അഗസ്ത്യാർകൂടത്തോടു ചേർന്നു കിടക്കുന്നവയാണ്. 2016ൽ യുനെസ്കോ ബയോസ്പിയർ റിസർവായി മേഖലയെ പ്രഖ്യാപിച്ചതാണ്.
ഔഷധസസ്യങ്ങൾ, ഡ്യുറി ഓർക്കിഡ്, ചെങ്കുറുഞ്ഞി, ആരോഗ്യപച്ച, കൊണ്ടപ്പന തുടങ്ങിയ തദ്ദേശീയ സസ്യങ്ങളുടെ കലവറയാണ് ഈ വന പ്രദേശം. നിത്യഹരിതവനം, ഇലകൊഴിയും വനം, ആർത്തവ്യത്യ ഹരിതവനം, ചോലവനം, പുൽമേട്, ഈറ്റക്കാടുകൾ, ഗിരിവനം എന്നിങ്ങനെ വ്യത്യസ്തതകളുള്ള പ്രദേശവുമാണിവിടം.
ആന, കടുവ, പുലി, കരടി, കാട്ടുപോത്ത്, മാനുകൾ വിവിധതരം കുരങ്ങുകൾ, മലമുഴക്കി വേഴാമ്പൽ, മല മൈന, മാക്കാച്ചിക്കാട തുടങ്ങിയ അപൂർവയിനം പക്ഷികൾ, രാജവെമ്പാല, അണലി ഉൾപ്പെടെയുള്ള ഉരഗങ്ങൾ തുടങ്ങിയ വന്യജീവികളുടെ ആവാസ കേന്ദ്രം കൂടിയാണ് അഗസ്ത്യാർകൂടം.
