പഞ്ചസാരയ്ക്ക് പകരമായി ഉപയോഗിക്കാവുന്ന തേൻ എപ്പോഴും ആരോഗ്യകരമായ ഒന്നായാണ് കണക്കാക്കപ്പെടുന്നത്. ഇത് പ്രകൃതിദത്തവും മധുരമുള്ളതും പഞ്ചസാരയ്ക്ക് പകരമായി ഉപയോഗിക്കാവുന്ന മികച്ചൊരു ഓപ്ഷനുമാണ്. പലരും ഇത് ചായയിൽ ചേർത്തോ, ടോസ്റ്റിൽ പുരട്ടിയോ അല്ലെങ്കിൽ രാവിലെ വെറുംവയറ്റിൽ ചെറുചൂടുവെള്ളത്തിൽ കലർത്തിയോ കഴിക്കാറുണ്ട്. മികച്ച ആരോഗ്യത്തിനായി പഞ്ചസാരയ്ക്ക് പകരം ചെയ്യാവുന്ന ലളിതമായൊരു മാറ്റമാണിതെന്ന് നമുക്ക് തോന്നും.
എന്നാൽ, തേൻ ഉപയോഗിക്കുമ്പോൾ, അത് എങ്ങനെ ഉപയോഗിക്കുന്നു എന്നത് അതിന്റെ ഗുണത്തെ ബാധിക്കും. താപനില, സൂക്ഷിക്കുന്ന രീതി, പാചകരീതി എന്നിവയെല്ലാം തേനിന്റെ പോഷകമൂല്യത്തിൽ മാറ്റം വരുത്തും. ഇവിടെയാണ് പലർക്കും തെറ്റ് പറ്റുന്നത്. തേൻ ചൂടാക്കുമ്പോൾ ശരിക്കും എന്താണ് സംഭവിക്കുന്നതെന്നും അത് എങ്ങനെ ശരിയായ രീതിയിൽ ഉപയോഗിക്കണമെന്നും ന്യൂട്രീഷ്യനിസ്റ്റ് നമാമി അഗർവാൾ തന്റെ ഇൻസ്റ്റഗ്രാം പോസ്റ്റിലൂടെ വിശദീകരിച്ചിട്ടുണ്ട്.
തേൻ: സുരക്ഷിതമാണ്, പക്ഷേ ശ്രദ്ധയോടെ ഉപയോഗിക്കുക
മിക്ക ആളുകൾക്കും തേൻ കഴിക്കുന്നത് സുരക്ഷിതമാണെന്ന് നമാമി അഗർവാൾ വിശദീകരിക്കുന്നു. നൂറ്റാണ്ടുകളായി മനുഷ്യർ തേൻ ഉപയോഗിക്കുന്നുണ്ട്. അതിന്റെ രുചിക്കും ആരോഗ്യഗുണങ്ങൾക്കും തേൻ ഏറെ പ്രശസ്തവുമാണ്. അതിനാൽ ഭക്ഷണത്തിൽ തേൻ ഉൾപ്പെടുത്തുന്നത് ഒരു പ്രശ്നമല്ല.
തേൻ ചൂടാക്കുമ്പോൾ എന്ത് സംഭവിക്കും?
മിതമായ ചൂട് കുഴപ്പമില്ല: സാധാരണ രീതിയിലുള്ള പാചകത്തിലോ ബേക്കിങ്ങിലോ തേൻ ഉപയോഗിക്കുന്നത് അതിനെ വിഷാംശമുള്ളതാക്കി മാറ്റില്ല. അതിനാൽ ഇളം ചൂടുള്ള ഭക്ഷണങ്ങളിൽ തേൻ ചേർക്കുന്നതിനെക്കുറിച്ച് ഓർത്ത് നിങ്ങൾ ഭയപ്പെടേണ്ടതില്ല.
അമിതമായ ചൂട് മാറ്റങ്ങൾ വരുത്തുന്നു: അമിതമായ ചൂടാണ് പ്രശ്നമെന്ന് നമാമി പറയുന്നു. ഉയർന്ന താപനില തേനിന്റെ പ്രകൃതിദത്ത ഘടകങ്ങളെ നശിപ്പിക്കും. ഇതിൽ അടങ്ങിയിരിക്കുന്ന എൻസൈമുകൾ, വൈറ്റമിനുകൾ, ആന്റിഓക്സിഡന്റുകൾ എന്നിവ നശിക്കാൻ ഇത് കാരണമാകും.
പോഷകമൂല്യം കുറഞ്ഞേക്കാം: അമിതമായി ചൂടാക്കുമ്പോൾ തേനിന്റെ ഗുണങ്ങൾ നഷ്ടപ്പെട്ടേക്കാം. അതിന്റെ രുചി, മണം, നിറം എന്നിവയിൽ പോലും മാറ്റം വരാം. അതുകൊണ്ട്, ചൂടാക്കിയാലും അതിന് മധുരമുണ്ടാകുമെങ്കിലും പഴയ പോഷകഗുണങ്ങൾ ലഭിക്കണമെന്നില്ല.
എന്തുകൊണ്ട് ഉയർന്ന ചൂട് ഒഴിവാക്കണം?
ഏകദേശം 40°C-ന് മുകളിലുള്ള താപനില തേനിൽ തെർമൽ ഡിഗ്രഡേഷൻ എന്ന പ്രക്രിയയ്ക്ക് കാരണമാകുമെന്ന് നമാമി അഗർവാൾ ചൂണ്ടിക്കാട്ടുന്നു. അതായത്, തേനിന്റെ ഘടനയിൽ മാറ്റം വരാൻ തുടങ്ങുന്നു. ഇത് തേനിന്റെ ഗുണനിലവാരത്തെ ദോഷകരമായി ബാധിക്കും.
എങ്ങനെ ഉപയോഗിക്കണം?
തേൻ പരമാവധി പ്രയോജനപ്പെടുത്താനാണ് നിങ്ങൾ ആഗ്രഹിക്കുന്നതെങ്കിൽ, നിങ്ങളുടെ രീതികളിൽ ചെറിയ മാറ്റങ്ങൾ വരുത്തുന്നത് ഗുണകരമാകും.
- ചൂടുവെള്ളത്തിന് പകരം ചെറുചൂടുള്ള വെള്ളത്തിൽ തേൻ ചേർക്കുക: തിളച്ച വെള്ളത്തിൽ തേൻ ഒഴിക്കുന്നത് ഒഴിവാക്കുക.
- പാചകം ചെയ്യുമ്പോഴല്ല, പാകം ചെയ്ത ശേഷം ഭക്ഷണത്തിന് മുകളിൽ ഒഴിക്കുക: ഉയർന്ന ചൂടിൽ തേൻ പാകം ചെയ്യാതിരിക്കാൻ ശ്രദ്ധിക്കുക.
- തേൻ ആവർത്തിച്ച് ചൂടാക്കുന്നത് ഒഴിവാക്കുക.
- പാചകത്തിനുള്ള പ്രധാന ചേരുവയായി ഉപയോഗിക്കുന്നതിനേക്കാൾ, വിഭവങ്ങൾ തയ്യാറായിക്കഴിഞ്ഞാൽ അവസാനം ചേർക്കുന്ന രീതി പിന്തുടരുക.
തേൻ ചൂടാക്കുന്നത് മോശമായ കാര്യമാണെന്നല്ല ഇതിനർത്ഥം. മറിച്ച്, അതിന്റെ സ്വാഭാവിക ഗുണങ്ങൾ നഷ്ടപ്പെടാതെ സംരക്ഷിക്കുന്ന രീതിയിൽ ഉപയോഗിക്കുന്നതാണ് ബുദ്ധി. ആരോഗ്യകരമായ ഭക്ഷണം കഴിക്കുക എന്നത് മാത്രമല്ല, അവ ശരിയായ രീതിയിൽ ഉപയോഗിക്കുക എന്നതും പ്രധാനമാണ്.
