തുടർച്ചയായി ചക്രവാതച്ചുഴി; കേരളത്തില്‍ വരള്‍ച്ചയെ തടയാൻ തുലാവര്‍ഷം നിര്‍ണായകം,

തുടർച്ചയായി ഉണ്ടാകുന്ന ചക്രവാതച്ചുഴി കാരണം കേരളത്തിൽ പരക്കെ മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രം. ഒന്നിന് പിറകെ ഒന്നായി ചക്രവാതച്ചുഴി രൂപപ്പെടുകയും പെട്ടെന്ന് ദുർബലമാകുകയും ചെയ്യുന്നുണ്ട്. നിലവിൽ തമിഴ് നാട് തീരത്തിനു മുകളിൽ ഒരു ചക്രവാതച്ചുഴി നിലനിൽക്കുന്നതാണ് ഇപ്പോഴത്തെ മഴയ്ക്ക് കാരണം.

കേരളത്തിൽ അടുത്ത ദിവസങ്ങളിൽ വ്യാപകമായി മഴയ്ക്ക് സാധ്യത ഉണ്ടെന്നും ഒക്‌ടോബര്‍ 16,17 തീയതികളിൽ മധ്യ-തെക്കൻ കേരളത്തിൽ ശക്തമായ മഴയ്‌ക്ക് സാധ്യത ഉണ്ടെന്നും കാലാവസ്ഥ നിരീക്ഷണ കേന്ദ്രം മേധാവി നീത കെ ഗോപാൽ ഇടിവി ഭാരതിനോട് പറഞ്ഞു. ഇടിയോടു കൂടിയ മഴയ്ക്കാണ് സാധ്യതയെന്നും അവർ വ്യക്തമാക്കി.

അതേസമയം കേരളത്തിലെ തുലാവർഷവുമായി ബന്ധപ്പെട്ട് കാലാവസ്ഥ നിരീക്ഷണം വകുപ്പിൻ്റെ ഔദ്യോഗിക അറിയിപ്പ് ഇന്ന് ഉണ്ടാകുമെന്നാണ് പ്രതീക്ഷിക്കുന്നത്. ഇത്തവണ മികച്ച തുലാ വർഷം കേരളത്തിൽ ലഭിക്കുമെന്ന് നേരത്തെ അറിയിച്ചിരുന്നു. നിലവിലെ മുന്നറിയിപ്പ് പ്രകാരം 16, 17 തീയതികളിൽ മഞ്ഞ അലർട്ട് മുന്നറിയിപ്പ് ആണ് ഉള്ളതെങ്കിലും ഓറഞ്ച് അലർട്ടിലേക്ക് മാറാനുള്ള സാധ്യതയും കലാവസ്ഥ നിരീക്ഷണ വിഭാഗം പങ്കുവയ്ക്കു‌ന്നു.

ഇന്ന് കോഴിക്കോട്, മലപ്പുറം, ഇടുക്കി, കോട്ടയം, പത്തനംതിട്ട ജില്ലകളിൽ മഞ്ഞ അലർട്ട് മുന്നറിയിപ്പ് നൽകിയിട്ടുണ്ട്. നാളെ (ഒക്‌ടോബര്‍ 15) എറണാകുളം, ഇടുക്കി, കോട്ടയം, പത്തനംതിട്ട ജില്ലകളിലും 16 ന് തൃശൂർ, എറണാകുളം, ഇടുക്കി, കോട്ടയം, പത്തനംതിട്ട, ആലപ്പുഴ, കൊല്ലം, തിരുവനന്തപുരം ജില്ലകളിലും, 17 ന് തൃശൂർ, എറണാകുളം, ഇടുക്കി, കോട്ടയം, പത്തനംതിട്ട, ആലപ്പുഴ, കൊല്ലം, തിരുവനന്തപുരം ജില്ലകളിലും മഞ്ഞ അലർട്ട് മുന്നറിയിപ്പ് നൽകിയിട്ടുണ്ട്.