നടൻ വിജയ് ദേവരകൊണ്ടയും നടി രശ്മിക മന്ദാനയും കുടുംബാംഗങ്ങളും സുഹൃത്തുക്കളും പങ്കെടുത്ത സ്വകാര്യ ചടങ്ങിൽ വിവാഹ നിശ്ചയം നടത്തിയതായി റിപ്പോർട്ടുകൾ. ഇവരുടെ വിവാഹം 2026 ഫെബ്രുവരിയിൽ നടക്കുമെന്നും റിപ്പോർട്ടുകൾ സൂചിപ്പിക്കുന്നു.
വിവാഹം സംബന്ധിച്ച് ഔദ്യോഗികമായി പ്രഖ്യാപിക്കുന്നത് ഇരുവരും വൈകിപ്പിക്കാൻ തീരുമാനിച്ചതായി എം 9 ന്യൂസ് റിപ്പോർട്ട് ചെയ്തു. ഈ സമയത്ത് സ്വകാര്യത നിലനിർത്താനുള്ള ഇവരുടെ ആഗ്രഹത്തെയാണ് ഈ നിശബ്ദ സമീപനം സൂചിപ്പിക്കുന്നത്.രശ്മിക അടുത്തിടെ സോഷ്യൽ മീഡിയയിൽ പങ്കുവെച്ച സാരിയിലുള്ള ചിത്രം ഉടൻ വൈറലായിരുന്നു. ഈ വേഷം വിവാഹ നിശ്ചയത്തിനുള്ളതാണെന്ന് ആരാധകർ വിശ്വസിച്ചതോടെ അഭ്യൂഹങ്ങൾ ശക്തിപ്പെട്ടു. ഈ ചിത്രങ്ങൾ ഇരുവരുടെയും ബന്ധത്തിലെ നാഴികക്കല്ലിനെക്കുറിച്ചുള്ള ആകാംക്ഷ വർദ്ധിപ്പിച്ചു.ദസറ ദിനത്തിൽ, ‘തമ്മ’ നടി പരമ്പരാഗത വേഷത്തിൽ നെറ്റിയിൽ തിലകമണിഞ്ഞ് ഒരു ചിത്രം പങ്കുവെച്ചിരുന്നു. “എൻ്റെ പ്രിയപ്പെട്ടവർക്ക് ദസറ ആശംസകൾ…ഈ വർഷം, ‘തമ്മ’ ട്രെയിലറിനും നമ്മുടെ പാട്ടിനും നിങ്ങൾ നൽകിയ സ്നേഹത്തിന് ഞാൻ കൂടുതൽ കടപ്പെട്ടിരിക്കുന്നു…നിങ്ങളുടെ സന്ദേശങ്ങളും, ആവേശവും, സ്ഥിരമായ പിന്തുണയും എൻ്റെ ഓരോ നിമിഷവും വലുതും സന്തോഷകരവുമാക്കുന്നു. പ്രൊമോഷനുകൾക്കായി നിങ്ങളെല്ലാവരെയും എത്രയും പെട്ടെന്ന് കാണാൻ എനിക്ക് കാത്തിരിക്കാൻ വയ്യ…,” എന്നായിരുന്നു ചിത്രത്തിന് രശ്മിക നൽകിയ അടിക്കുറിപ്പ്.
വർഷങ്ങളായി ഇരുതാരങ്ങളുടെയും ആരാധകർ ഈ പ്രഖ്യാപനത്തിനായി ആകാംഷയോടെ കാത്തിരിക്കുകയായിരുന്നു. ഇവരുടെ വിവാഹ നിശ്ചയ വാർത്ത ബന്ധത്തെക്കുറിച്ചുള്ള ഊഹാപോഹങ്ങൾക്ക് വിരാമമിടുന്നതിനൊപ്പം ഇന്ത്യൻ സിനിമയിലെ ഏറ്റവും കൂടുതൽ കാത്തിരിക്കുന്ന സെലിബ്രിറ്റി വിവാഹത്തിന് കളമൊരുക്കുകയും ചെയ്യുന്നു.
രശ്മികയും വിജയ് ദേവരകൊണ്ടയും തങ്ങളുടെ ബന്ധത്തെക്കുറിച്ച് സ്ഥിരീകരിക്കുകയോ നിഷേധിക്കുകയോ ചെയ്തിട്ടില്ല. ഇരുവരും ഒരുമിച്ച് അവധിക്കാലം ആഘോഷിച്ചതായി റിപ്പോർട്ടുകൾ ഉണ്ടായിരുന്നിട്ടും, താരങ്ങൾ തങ്ങളുടെ വ്യക്തിപരമായ കാര്യങ്ങളിൽ അതീവ സ്വകാര്യതയാണ് സൂക്ഷിക്കുന്നത്. വിവാഹ നിശ്ചയവും വിവാഹവും താരങ്ങൾ ഔദ്യോഗികമായി ഇതുവരെ സ്ഥിരീകരിച്ചിട്ടില്ല.
