ഒടിടി പ്ലാറ്റ്ഫോമുകളില്‍ പുകയില വിരുദ്ധ മുന്നറിയിപ്പുകള്‍ നിര്‍ബന്ധമാക്കി കേന്ദ്ര ആരോഗ്യ മന്ത്രാലയം. മന്ത്രാലയത്തിന്റെ വിജ്ഞാപനത്തിലാണ് പുതിയ നിയമത്തെക്കുറിച്ച് അറിയിപ്പ് നല്‍കിയിരിക്കുന്നത്. പുതിയ നിയമങ്ങള്‍ പാലിക്കാത്തവര്‍ക്കെതിരെ കര്‍ശനമായ നടപടി സ്വീകരിക്കും. ഇന്ന് ലോക പുകയില വിരുദ്ധ ദിനം ആചരിക്കുന്നതിനിടെയാണ് ആരോഗ്യമന്ത്രാലയത്തിന്റെ ഉത്തരവ്.
തിയേറ്ററുകളിലും ടെലിവിഷനിലും സിനിമ കാണുമ്പോള്‍ കാണുന്നതു പോലെയുള്ള പുകയില വിരുദ്ധ മുന്നറിയിപ്പുകള്‍ ഇനി മുതല്‍ ഒടിടിയിലും പ്രദര്‍ശിപ്പിക്കണം. പുകയില ഉല്‍പന്നങ്ങളോ അവയുടെ ഉപയോഗമോ പ്രദര്‍ശിപ്പിക്കുമ്പോള്‍ സ്‌ക്രീനിന്റെ അടിയില്‍ പുകയില വിരുദ്ധ മുന്നറിയിപ്പ് പ്രദര്‍ശിപ്പിക്കണമെന്നാണ് വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്യുന്നത്. ഒടിടി പ്ലാറ്റ്ഫോമുകളുടെ വര്‍ദ്ധിച്ചുവരുന്ന ജനപ്രീതിയുടെ പശ്ചാത്തലത്തിലാണ് ഈ തീരുമാനം. ഭേദഗതി വരുത്തിയ നിയമം പുകയിലയുടെ ദുരുപയോഗത്തിനെതിരെ പോരാടാന്‍ സഹായിച്ചേക്കാമെന്നാണ് വിലയിരുത്തല്‍.
പുകയിലയുടെ പ്രത്യക്ഷവും പരോക്ഷവുമായ എല്ലാ പരസ്യങ്ങളും ഒഴിവാക്കി പുകയില ഉപയോഗം നിരുത്സാഹപ്പെടുത്തുന്നതിനായി, സര്‍ക്കാര്‍ സിഗരറ്റും മറ്റ് പുകയില ഉല്‍പന്നങ്ങളും (Prohibition of Advertisement and Regulation of Trade and Commerce, Production, Supply and Distribution) നിയമം 2004, നടപ്പാക്കിയിട്ടുണ്ട്. പുതിയ നിയമങ്ങള്‍ പാലിക്കുന്നതില്‍ പരാജയപ്പെട്ടാല്‍, ആരോഗ്യം, ഇന്‍ഫര്‍മേഷന്‍, ബ്രോഡ്കാസ്റ്റിംഗ്, ഇലക്ട്രോണിക്‌സ്, ഇന്‍ഫര്‍മേഷന്‍ ടെക്‌നോളജി മന്ത്രാലയങ്ങള്‍ ഉള്ളടക്കത്തില്‍ ഉചിതമായ മാറ്റങ്ങള്‍ വരുത്താന്‍ അറിയിപ്പ് പുറപ്പെടുവിക്കും.
