ഇന്ത്യൻ പ്രീമിയർ ലീഗിന്റെ നിലവിലെ മാർച്ച്-മേയ് മാസങ്ങളിലെ ഷെഡ്യൂൾ മാറ്റി ടൂർണമെന്റ് ജനുവരിയിൽ നടത്തണമെന്ന മുൻ ഐപിഎൽ ചെയർമാൻ ലളിത് മോദിയുടെ നിർദേശത്തെ പിന്തുണച്ച് കൊൽക്കത്ത നൈറ്റ് റൈഡേഴ്സ് സഹ ഉടമയായ ജൂഹി ചൗള. കടുത്ത വേനൽച്ചൂടിൽ ടൂർണമെന്റ് നടത്തുന്നത് ഒഴിവാക്കി ജനുവരിയിലേക്ക് മാറ്റുന്നത് കളിക്കാർക്ക് മികച്ച കാലാവസ്ഥയും കാണികൾക്കും മറ്റ് ഭാരവാഹികൾക്കും കൂടുതൽ സൗകര്യപ്രദമായ അന്തരീക്ഷവും നൽകുമെന്ന് അവർ അഭിപ്രായപ്പെട്ടു.
ഐപിഎല്ലിന്റെ സ്ഥാപകനായ ലളിത് മോദിയാണ് ടൂർണമെന്റിന്റെ സമയക്രമം പുനഃപരിശോധിക്കാൻ ബിസിസിഐയോട് അടുത്തിടെ ആവശ്യപ്പെട്ടത്. ആഗോളതലത്തിൽ വലിയ കായിക-വാണിജ്യ ബ്രാൻഡായി വളർന്ന ഐപിഎല്ലിന് ഇനി അന്താരാഷ്ട്ര ക്രിക്കറ്റ് കലണ്ടറിൽ പ്രത്യേക വിൻഡോയ്ക്കായി കാത്തിരിക്കേണ്ടതില്ലെന്നും, ഏത് സമയത്ത് നടത്തിയാലും ജനശ്രദ്ധ ആകർഷിക്കാൻ കഴിയുമെന്നും മോദി വാദിച്ചിരുന്നു.
