ബുധനാഴ്ച രാവിലെ ഒൻപതുമണിയോടെയാണ് നേപ്പാളിനെ നടുക്കിയ പ്രളയദുരന്തമുണ്ടായത്. ടിബറ്റിൽനിന്നുള്ള ഭോട്ടെ കോഷി നദിയിലുണ്ടായ മിന്നൽപ്രളയം നേപ്പാളിലെ വിവിധ ഗ്രാമങ്ങളിൽ വൻനാശനഷ്ടമാണ് വിതച്ചത്.
നോർക്കയുടെ സേവനം ഉപയോഗപ്പെടുത്തുന്നതിന് നോർക്ക ഗ്ലോബൽ കോണ്ടാക്ട് സെൻ്ററിൻ്റെ 18004253939 (ടോൾ ഫ്രീ നമ്പർ)+91-8802012345 (വിദേശത്തു നിന്നും മിസ്ഡ് കോൾ) എന്നീ നമ്പരുകളിൽ ബന്ധപ്പെടാം. പ്രവര്ത്തനങ്ങളുടെ ഏകോപനത്തിന് ഡല്ഹി എന്ആര്കെ ഡവലപ്മെൻ്റ് ഓഫീസറേയും ചുമതലപ്പെടുത്തി.
നേപ്പാൾ ദുരന്തത്തിൽ കാണാതായത് 250ലധികം ഇന്ത്യക്കാരെയാണെന്നാണ് റിപ്പോർട്ട്. തമിഴ്നാട്ടിൽ നിന്ന് പോയ 37 പേരെക്കുറിച്ച് വിവരം ലഭിച്ചിട്ടില്ല. ഇഷ ഫൗണ്ടേഷൻ വഴി പോയ 77 പേരെക്കുറിച്ചും വിവരം ലഭിച്ചില്ല. ഹെൽപ്പ്ലൈനിലേക്ക് നിരവധി ആളുകളുടെ ബന്ധുക്കൾ വിളിക്കുന്നു എന്ന് സർക്കാർ വൃത്തങ്ങൾ അറിയിച്ചു.
ടിബറ്റൻ അതിർത്തിയോട് ചേർന്ന വടക്കൻ നേപ്പാളിലുണ്ടായ മിന്നൽ പ്രളയത്തിൽ ഇതുവരെ 157 പേരാണ് മരിച്ചത്. നേപ്പാൾ ടൂറിസം ബോർഡ് ഇന്നലെ പ്രാഥമികമായി പുറത്തുവിട്ട വിവരങ്ങൾ അനുസരിച്ച് 384 വിനോദസഞ്ചാരികളെയാണ് കാണാതായത്. എന്നാൽ അപകടത്തിൽ ഇതുവരെ 800 ൽ അധികം പേരെ കാണാതായതായി റിപ്പോർട്ടുകൾ പുറത്തുവരുന്നുണ്ട്. ഇതിൽ 466 പേർ വിനോദ സഞ്ചാരികളാണെന്ന് നേപ്പാൾ സർക്കാർ വ്യക്തമാക്കി. 250 ഓളം ഇന്ത്യക്കാരെക്കുരിച്ച് വിവരമില്ലെന്നാണ് ഏറ്റവും പുതിയ വിവരം.
ഹെല്പ്പ് ലൈന് തുറന്ന് ഇന്ത്യന് എംബസി
അപകടത്തില്പ്പെട്ട ഇന്ത്യന് പൗരന്മാരെ എത്രയും പെട്ടെന്ന് സുരക്ഷിതരായി പുറത്തെത്തിക്കാനും രക്ഷാപ്രവര്ത്തനങ്ങള് ഏകോപിപ്പിക്കാനുമായി നേപ്പാള് സര്ക്കാരുമായി നിരന്തരം സമ്പര്ക്കം പുലര്ത്തുന്നുണ്ടെന്ന് ഇന്ത്യന് എംബസി വ്യക്തമാക്കി. പ്രളയബാധിതരായ ഇന്ത്യക്കാര്ക്ക് സഹായം ലഭ്യമാക്കുന്നതിനായി എംബസി പ്രത്യേക ഹെല്പ്പ് ലൈന് നമ്പറുകളും (+977 985 131 6807, +977 970 910 7500) തുറന്നിട്ടുണ്ട്.
രക്ഷാപ്രവർത്തനം പുരോഗമിക്കുന്നു
നേപ്പാൾ സൈന്യത്തിൻ്റെ നേതൃത്വത്തിൽ രക്ഷാപ്രവർത്തനം യുദ്ധകാലാടിസ്ഥാനത്തിൽ പുരോഗമിക്കുകയാണ്. 19 പാലങ്ങളും 40 കിലോമീറ്ററോളം റോഡുകളും നിരവധി കെട്ടിടങ്ങളും പ്രളയത്തിൽ തകർന്നു. മിന്നൽപ്രളയത്തിൻ്റെ പശ്ചാത്തലത്തിൽ മുൻകരുതൽ നടപടിയെന്ന നിലയിൽ ഉത്തർപ്രദേശ്, ബിഹാർ സംസ്ഥാനങ്ങളിലെ നദീതീരങ്ങളിൽ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
