വിസ പുതുക്കൽ ചെലവേറും; ഇന്ത്യക്കാർക്ക് ആശങ്കയായി ട്രംപിന്റെ പുതിയ നീക്കം

വാഷിംഗ്ടൺ: അമേരിക്കയിൽ ജോലി ചെയ്യുന്ന ആയിരക്കണക്കിന് ഇന്ത്യൻ പ്രൊഫഷണലുകൾക്കും തൊഴിലുടമകൾക്കും തിരിച്ചടിയായി എച്ച്-1ബി, എൽ-1 വിസകളുടെ കാലാവധി നീട്ടുന്നതിനുള്ള ചെലവ് കുത്തനെ കൂട്ടാൻ ട്രംപ് ഭരണകൂടം പദ്ധതിയിടുന്നു. നിലവിൽ പുതിയ അപേക്ഷകൾക്കും കമ്പനി മാറ്റങ്ങൾക്കും മാത്രം ഈടാക്കിയിരുന്ന അധിക ഫീസ്, സാധാരണയായി നടത്തുന്ന വിസ കാലാവധി നീട്ടൽ അപേക്ഷകൾക്കും കൂടി ബാധകമാക്കാനാണ് തീരുമാനം.

ഓരോ വർഷവും അനുവദിക്കുന്ന എച്ച്-1ബി വിസകളിൽ ഭൂരിഭാഗവും ലഭിക്കുന്നത് ഇന്ത്യൻ പൗരന്മാർക്കാണെന്നതിനാൽ, ഈ തീരുമാനം നടപ്പിലായാൽ ഏറ്റവും കൂടുതൽ ബാധിക്കപ്പെടുക ഇന്ത്യക്കാരായിരിക്കും. ‘9-11 റെസ്‌പോൺസ് ആൻഡ് ബയോമെട്രിക് എൻട്രി-എക്‌സിറ്റ് ഫീ’ നിയമത്തിന് കീഴിലുള്ള വിസ കാലാവധി നീട്ടൽ അപേക്ഷകളെക്കുറിച്ചുള്ള അന്തിമ ഉത്തരവ് ഏതാനും ആഴ്ചകൾക്കുള്ളിൽ പുറത്തിറങ്ങിയേക്കുമെന്ന് അമേരിക്കൻ ഹോംലാന്റ് സെക്യൂരിറ്റി ഡിപ്പാർട്ട്‌മെന്റ് അറിയിച്ചു.

നിലവിൽ പുതിയ അപേക്ഷകൾക്കും കമ്പനി മാറ്റങ്ങൾക്കും എച്ച്-1ബി വിസയ്ക്ക് 4,000 ഡോളറും എൽ-1 വിസയ്ക്ക് 4,500 ഡോളറും അധിക ഫീസായി നൽകണം. പുതിയ നിയമപ്രകാരം ജീവനക്കാരുടെ വിസ കാലാവധി നീട്ടുമ്പോഴും കമ്പനികൾ ഈ ഉയർന്ന തുക നൽകേണ്ടി വരും.

വിദഗ്ദ്ധരായ വിദേശ തൊഴിലാളികൾക്ക് പുതിയ എച്ച്-1ബി വിസ നൽകുന്നതിന് 1,00,000 ഡോളർ ഫീസ് ചുമത്താനുള്ള ട്രംപ് ഭരണകൂടത്തിന്റെ തീരുമാനം യു.എസ് ഫെഡറൽ അപ്പീൽ കോടതി കഴിഞ്ഞ മാസം റദ്ദാക്കിയിരുന്നു. അമേരിക്കക്കാർക്ക് കൂടുതൽ തൊഴിലവസരങ്ങൾ ഉറപ്പാക്കാനാണ് ഫീസ് പ്രഖ്യാപിച്ചതെങ്കിലും കോടതി ഇതിന് അനുമതി നൽകിയില്ല. ഇതിന് തൊട്ടുപിന്നാലെയാണ് വിസ പുതുക്കൽ ഫീസ് വർദ്ധിപ്പിക്കാനുള്ള നീക്കവുമായി ഭരണകൂടം മുന്നോട്ട് പോകുന്നത്.

വിസ ഉടമകൾ അറിയേണ്ട പ്രധാന കാര്യങ്ങൾ
നിലവിലുള്ള വിസകളുടെ സാധുതയെ ഈ തീരുമാനം ബാധിക്കില്ല.
പുതിയ നിയമം ഇതുവരെ പ്രാബല്യത്തിൽ വന്നിട്ടില്ല, വരും ആഴ്ചകളിൽ അന്തിമ തീരുമാനമുണ്ടാകും. ഈ അധിക ഫീസ് ജീവനക്കാരല്ല, മറിച്ച് തൊഴിൽ നൽകുന്ന കമ്പനികളാണ് അടയ്‌ക്കേണ്ടത്. ഫീസ് വർദ്ധനവ് വരുമ്പോൾ കമ്പനികൾക്ക് സാമ്പത്തിക ഭാരം ഉയരുന്നതിനാൽ, ജീവനക്കാരുടെ വിസ പുതുക്കുന്ന കാര്യത്തിൽ കമ്പനികൾ കൂടുതൽ നിയന്ത്രണങ്ങൾ കൊണ്ടുവന്നേക്കാം.

ഇന്ത്യക്കാരെ എങ്ങനെ ബാധിക്കും?
അമേരിക്ക പ്രതിവർഷം അനുവദിക്കുന്ന ഏകദേശം 85,000 എച്ച്-1ബി വിസകളിൽ 70 ശതമാനത്തോളവും ലഭിക്കുന്നത് ഇന്ത്യൻ പൗരന്മാർക്കാണ്. കൂടാതെ യു.എസ്.സി.ഐ.എസ് കണക്കുകൾ പ്രകാരം എച്ച്-1ബി വിസകളിൽ അധിക പങ്കും (ഏകദേശം 70 ശതമാനത്തിലധികം) കാലാവധി നീട്ടുന്നതുമായി ബന്ധപ്പെട്ടതാണ്. കമ്പനികൾക്ക് വിസ പുതുക്കൽ ചെലവേറുന്നത് ഐ.ടി മേഖലയിലടക്കം ജോലി ചെയ്യുന്ന ലക്ഷക്കണക്കിന് ഇന്ത്യൻ പ്രൊഫഷണലുകളുടെ തുടർ തൊഴിൽ സാധ്യതകളെ പ്രതികൂലമായി ബാധിച്ചേക്കാൻ സാധ്യതയുണ്ട്.