പ്രധാനമന്ത്രി നരേന്ദ്ര മോദി പ്രതിപക്ഷ പാർട്ടികൾ ഭരിക്കുന്ന കർണാടക, തെലങ്കാന സംസ്ഥാനങ്ങളിലെ വർഷങ്ങളായി മുടങ്ങിക്കിടക്കുന്നതും ചെലവ് വർധിച്ചതുമായ രണ്ട് വലിയ പദ്ധതികളെക്കുറിച്ച് അവലോകനം ചെയ്തു. ഈ പദ്ധതികളിൽ വേഗത്തിൽ പുരോഗതിയുണ്ടാക്കാൻ അദ്ദേഹം യോഗത്തിൽ സംസ്ഥാനങ്ങളോട് ആവശ്യപ്പെട്ടു.
2025 ഡിസംബർ 31നാണ് കർണാടക, തെലങ്കാന സംസ്ഥാനങ്ങളിലെ രണ്ട് വലിയ പദ്ധതികളെക്കുറിച്ച് അവലോകനന ചർച്ചകൾ നടന്നത്. ഈ പദ്ധതികളിൽ വേഗത്തിൽ പുരോഗതിയുണ്ടാക്കാൻ പ്രധാനമന്ത്രി സംസ്ഥാനങ്ങളോട് ആവശ്യപ്പെട്ടതായാണ് റിപ്പോർട്ട്. ബെംഗളൂരു സബർബൻ റെയിൽവേ പ്രോജക്റ്റും തെലങ്കാനയിലെ ജെ ചോക റാവു ദേവഡുല ലിഫ്റ്റ് ഇറിഗേഷൻ സ്കീമുമാണ് പ്രധാനമന്ത്രി അവലോകനം ചെയ്തത്.
ബെംഗളൂരു സബർബൻ റെയിൽ പദ്ധതി
ഐടി നഗരമായ ബെംഗളൂരുവിൻ്റെ ഗതാഗതത്തിന് കരുത്ത് പകരുന്ന ബെംഗളൂരു സബർബൻ റെയിൽവേ പ്രോജക്റ്റ് നാല് പതിറ്റാണ്ടായി ചർച്ചയിൽ തുടരുകയാണ്. 2020ൽ അംഗീകരിച്ച പദ്ധതി 2023ൽ പൂർത്തിയാക്കാൻ ലക്ഷ്യമിട്ടിരുന്നെങ്കിലും ഇപ്പോഴും പൂർത്തിയായിട്ടില്ല. നഗരത്തെയും നഗരപ്രാന്തങ്ങളെയും വിമാനത്താവളത്തെയും ബന്ധിപ്പിക്കുന്ന 148 കിലോമീറ്റർ ദൈർഘ്യമുള്ള ഈ പദ്ധതി ഏറെ തിരക്കുള്ള നഗരത്തിലെ ജനങ്ങൾക്ക് വലിയൊരു ആശ്വാസമാകുമായിരുന്നു. ഇതിനിടെ പദ്ധതിയുടെ ചെലവ് 15,767 കോടി രൂപയിൽ നിന്ന് 16,876 കോടി രൂപയായി ഏകദേശം 1,020 കോടി രൂപ വർധിച്ചു. 2023ൽ പ്രധാനമന്ത്രി തറക്കല്ലിട്ട ഈ പദ്ധതി 40 മാസത്തിനുള്ളിൽ പൂർത്തിയാക്കാനാണ് ലക്ഷ്യമിടുന്നത്. പ്രതിദിനം 10 ലക്ഷം ആളുകൾക്ക് ഇത് പ്രയോജനപ്പെടുമെന്ന് പ്രതീക്ഷിക്കുന്നു.
ജെ ചോക റാവു ദേവഡുല ലിഫ്റ്റ് ഇറിഗേഷൻ സ്കീം
തെലങ്കാനയിലെ ജെ ചോക റാവു ദേവഡുല ലിഫ്റ്റ് ഇറിഗേഷൻ സ്കീം 2001ൽ അന്നത്തെ മുഖ്യമന്ത്രി എൻ ചന്ദ്രബാബു നായിഡുവിന്റെ കാലത്ത് രൂപം കൊണ്ടതാണ്. ഈ പദ്ധതിയിലൂടെ വരങ്കൽ, കരീംനഗർ, നൽഗൊണ്ട ജില്ലകളിലെ 5.57 ലക്ഷം ഏക്കർ ഭൂമിക്ക് ജലം ലഭ്യമാക്കും. ഏഷ്യയിലെ രണ്ടാമത്തെ വലിയ പദ്ധതിയാണിത്. 2027ഓടെ ഇത് പൂർത്തിയാക്കാനാണ് ലക്ഷ്യമിടുന്നത്. പദ്ധതിയുമായി ബന്ധപ്പെട്ട് കേന്ദ്ര സർക്കാർ ഇടപെടൽ ഉണ്ടാകുന്ന സാചര്യത്തിൽ പദ്ധതിക്ക് വേഗം കൂടാനുള്ള സാധ്യതയാണ് നിലവിലുള്ളത്.
ബെംഗളൂരു സബർബൻ റെയിൽവേ പ്രോജക്റ്റ്, തെലങ്കാന ജെ ചോക റാവു ദേവഡുല ലിഫ്റ്റ് ഇറിഗേഷൻ സ്കീം പദ്ധതികൾക്ക് കാലതാമസം നേരിടുന്നത് പദ്ധതിച്ചെലവ് വർധിക്കാൻ കാരണമാകും. പദ്ധതികൾ വൈകുന്നത് ജനങ്ങളുടെ പ്രതീക്ഷകളെ തെറ്റിക്കുകയും ചെയ്യുന്നുണ്ട്. എന്നാൽ, പ്രധാനമന്ത്രിയുടെ ഇടപെടൽ പദ്ധതികളുടെ പുരോഗതിക്ക് വേഗത നൽകുമെന്നാണ് പ്രതീക്ഷിക്കുന്നത്. പ്രതിപക്ഷ പാർട്ടികൾ ഭരിക്കുന്ന സംസ്ഥാനങ്ങളിലെ വികസന പദ്ധതികളിൽ കേന്ദ്ര സർക്കാർ ശ്രദ്ധ കേന്ദ്രീകരിക്കുന്നത് രാഷ്ട്രീയപരമായും പ്രാധാന്യമർഹിക്കുന്നു. ഈ പദ്ധതികൾ സമയബന്ധിതമായി പൂർത്തിയാക്കുന്നത് ആ സംസ്ഥാനങ്ങളിലെ ജനജീവിതം മെച്ചപ്പെടുത്താൻ സഹായിക്കും.
