തമിഴ് സൂപ്പർതാരം ദളപതി വിജയ്യുടെ അവസാന ചിത്രമായ ‘ജനനായകൻ’ സിനിമയുടെ അഞ്ച് മിനിറ്റ് ദൈർഘ്യമുള്ള വീഡിയോ ക്ലിപ്പുകൾ സമൂഹമാധ്യമങ്ങളിൽ ചോർന്നു. സിനിമയുടെ ടൈറ്റിൽ ക്രെഡിറ്റ്സും വിജയ്യുടെ ഇൻട്രോ രംഗവുമാണ് ചോർന്നതെന്ന് സ്ഥിരീകരിക്കാത്ത റിപ്പോർട്ടുകൾ സൂചിപ്പിക്കുന്നു. വിജയ് പൂർണ്ണസമയ രാഷ്ട്രീയത്തിലേക്ക് ഇറങ്ങുന്നതിന് മുൻപുള്ള അവസാന ചിത്രമായതിനാൽ വലിയ പ്രതീക്ഷയോടെ കാത്തിരിക്കുന്ന ആരാധകരെ ഈ സംഭവം ഞെട്ടിച്ചിരിക്കുകയാണ്.
എഡിറ്റിംഗ് ടേബിളിൽ നിന്നാണ് ദൃശ്യങ്ങൾ ചോർന്നതെന്നാണ് പ്രാഥമിക നിഗമനം. വീഡിയോയുടെ അവസാനം ഒരാൾ ദൃശ്യങ്ങൾ പോസ് ചെയ്യുന്നത് കാണാമെന്നും റിപ്പോർട്ടുകളുണ്ട്. ദൃശ്യങ്ങൾ ചോർന്നതിന് പിന്നാലെ നിർമ്മാണ കമ്പനിയായ കെവിഎൻ പ്രൊഡക്ഷൻസ് രംഗത്തെത്തി.എക്സ് (ട്വിറ്റർ) ഉൾപ്പെടെയുള്ള പ്ലാറ്റ്ഫോമുകളിൽ നിന്ന് ദൃശ്യങ്ങൾ നീക്കം ചെയ്യാനുള്ള നടപടികൾ കമ്പനി ആരംഭിച്ച് കഴിഞ്ഞു. വീഡിയോ പങ്കുവെക്കുന്നവർക്കെതിരെ കർശന നിയമനടപടി സ്വീകരിക്കുമെന്ന് അണിയറ പ്രവർത്തകർ മുന്നറിയിപ്പ് നൽകി.
സിനിമയുടെ ദൃശ്യങ്ങൾ ചോർന്നതിന് പിന്നിൽ വ്യക്തമായ ഗൂഢാലോചനയുണ്ടെന്ന് വിജയ് ആരാധകർ ആരോപിക്കുന്നു. രാഷ്ട്രീയ പ്രവേശനത്തിന്റെ ഭാഗമായി തമിഴക വെട്രി കഴകം (ടിവികെ) എന്ന പാർട്ടി രൂപീകരിച്ച് വിജയ് നിയമസഭാ തിരഞ്ഞെടുപ്പിൽ മത്സരിക്കാനിരിക്കെയാണ് ഈ സംഭവം.
അതുകൊണ്ട് തന്നെ സിനിമയുടെ റിലീസിനെ ബാധിക്കുന്ന തരത്തിലുള്ള ബോധപൂർവ്വമായ ശ്രമങ്ങൾ നടക്കുന്നുണ്ടെന്നാണ് ആരാധകരുടെ പക്ഷം. വീഡിയോകൾ ഷെയർ ചെയ്യരുതെന്ന് ആരാധകർക്കിടയിൽ തന്നെ വ്യാപകമായ പ്രചരണവും നടക്കുന്നുണ്ട്.
സെൻസർ കുരുക്കും റിലീസ് പ്രതിസന്ധിയും
ജനുവരി 9-ന് തീയേറ്ററുകളിൽ എത്തേണ്ടിയിരുന്ന സിനിമയായിരുന്നു ജനനായകൻ. എന്നാൽ ചില രംഗങ്ങൾ പൊതുവികാരത്തെ വ്രണപ്പെടുത്തുമെന്ന് ചൂണ്ടിക്കാട്ടി സെൻസർ ബോർഡ് സർട്ടിഫിക്കറ്റ് തടഞ്ഞതോടെ സിനിമ പ്രതിസന്ധിയിലായി. സെൻസർ ബോർഡുമായുള്ള ഒരു മാസം നീണ്ട നിയമപോരാട്ടത്തിനൊടുവിൽ ചിത്രം റിവിഷൻ കമ്മിറ്റിക്ക് വിട്ടിരിക്കുകയാണ്. തമിഴ്നാട് നിയമസഭാ തിരഞ്ഞെടുപ്പിന് ശേഷം മാത്രമേ ചിത്രം പുറത്തിറങ്ങാൻ സാധ്യതയുള്ളൂ എന്നാണ് പുതിയ വിവരം.
500 കോടി രൂപ ബജറ്റിൽ ഒരുങ്ങുന്ന ചിത്രത്തിൽ വിജയ്ക്കൊപ്പം പൂജ ഹെഗ്ഡെ, ബോബി ഡിയോൾ, മമിത ബൈജു, ഗൗതം മേനോൻ, പ്രകാശ് രാജ്, പ്രിയാമണി തുടങ്ങിയ വലിയ താരനിര തന്നെ അണിനിരക്കുന്നുണ്ട്. വൻ ബജറ്റിൽ നിർമ്മിച്ച ചിത്രത്തിന്റെ ദൃശ്യങ്ങൾ ചോർന്നത് സിനിമയുടെ ബോക്സ് ഓഫീസ് കളക്ഷനെ ബാധിക്കുമോ എന്ന ആശങ്കയിലാണ് സിനിമ ലോകം.
