പുതിയ വാഗ്ദാനവുമായി കായികമന്ത്രി വി. അബ്ദുറഹിമാന്. കോഴിക്കോട് സ്റ്റേഡിയത്തിലെ ബൈക്ക് റേസ് ബോളിവുഡ് ചലച്ചിത്ര താരം സൽമാൻ ഖാൻ ഉദ്ഘാടനം ചെയ്യുമെന്നാണ് മന്ത്രിയുടെ പ്രഖ്യാപനം. അര്ജന്റീന ഫുട്ബോൾ ടീമും മെസ്സിയും കേരളത്തില് കളിക്കാനെത്തുമെന്ന പ്രഖ്യാപനത്തിനു പിന്നാലെ സൽമാൻ ഖാനെ എത്തിക്കുമെന്ന മന്ത്രിയുടെ പ്രഖ്യാപനം ഇതിനോടകം സമൂഹമാധ്യമങ്ങളിൽ ചർച്ചയ്ക്ക് വഴിയൊരുക്കിയിട്ടുണ്ട്.
‘‘അടുത്ത ദിവസം കോഴിക്കോട് സ്റ്റേഡിയത്തിൽ ഒരു ബൈക്ക് റേസ് നടക്കാൻ പോകുന്നുണ്ട്. അതു വളരെ വ്യത്യസ്തമാണ്. രാജ്യാന്തര തലത്തിൽ മൂന്നു രാജ്യങ്ങളിലായി നടക്കുന്ന റേസ്സാണ്. ഇന്ത്യയിൽ ഏറ്റവും അധികം ആളുകൾ ഇഷ്ടപ്പെടുന്ന സിനിമാ താരം സൽമാൻ ഖാൻ ആണ് അത് ഉദ്ഘാടനം ചെയ്യാൻ പോകുന്നത്.’’ -അബ്ദുറഹ്മാൻ പറഞ്ഞു.അർജന്റീന ദേശീയ ഫുട്ബോൾ ടീമിന്റെയു ലയണൽ മെസിയുടെയും കേരള സന്ദർശനം മാറ്റിവച്ചതായി കഴിഞ്ഞ ദിവസം സ്ഥിരീകരണം വന്നിരുന്നു.
അടുത്ത മാസം കൊച്ചിയിൽ നടക്കാനിരുന്ന സൗഹൃദ മത്സരം മാറ്റിവച്ചതായി പരിപാടിയുടെ സ്പോൺസർ അറിയിക്കുയായിരുന്നു. പിന്നാലെ കേരളത്തിലെ സൗഹൃദ മത്സരം അടുത്ത വിൻഡോയിൽ തന്നെ നടത്തുമെന്ന് സ്പോൺസറും റിപ്പോര്ട്ടര് ബ്രോഡ്കാസ്റ്റിംഗ് കമ്പനി പ്രൈവറ്റ് ലിമിറ്റഡ് എംഡിയുമായ ആന്റോ അഗസ്റ്റിൻ പ്രതികരിച്ചു. നവംബറിൽ കളി നടക്കില്ല എന്നതാണ് അർജന്റീന ഫുട്ബോൾ ഫെഡറേഷൻ അറിയിച്ചതെന്നും ഫിഫയുടെ അനുമതി കിട്ടിയാൽ അടുത്ത വിൻഡോയിൽ തന്നെ കളി നടത്തുമെന്നും അതിന് വേണ്ടി നടപടി ക്രമങ്ങൾ തുടരുമെന്നും അദ്ദേഹം അറിയിച്ചു.
