കൊച്ചി: സംസ്ഥാനത്തിലൂടെ സർവീസ് നടത്തുന്ന വന്ദേ ഭാരത് എക്സ്പ്രസുകൾക്ക് തെക്കൻ കേരളത്തിൽ പുതിയ സ്റ്റോപ്പ് അനുവദിക്കണമെന്ന ആവശ്യം ശക്തമാകുന്നു. മൂന്ന് ജില്ലക്കാർക്ക് പ്രയോജനപ്പെടുന്ന കായംകുളം റെയിൽവേ സ്റ്റേഷനിൽ മംഗളൂരു – തിരുവനന്തപുരം വന്ദേ ഭാരതിനും, തിരുവനന്തപുരം – കാസർകോട് വന്ദേ ഭാരതിനും സ്റ്റോപ്പ് അനുവദിക്കണമെന്നാണ് ആവശ്യം. നേരത്തെ തന്നെ വിവിധ എംപിമാർ ഉന്നയിച്ച ആവശ്യം നിലവിൽ കേന്ദ്ര റെയിൽവേ മന്ത്രി അശ്വിനി വൈഷ്ണവിന് മുന്നിലെത്തിച്ചിരിക്കുകയാണ് ആലപ്പുഴ എംപി കെസി വേണുഗോപാൽ.
നേരത്തെ ആലപ്പുഴ വഴി സർവീസ് നടത്തുന്ന മംഗളൂരു – തിരുവനന്തപുരം വന്ദേ ഭാരതിന് കായംകുളത്ത് സ്റ്റോപ്പ് അനുവദിക്കണമെന്ന ആവശ്യമാണ് ഉയർന്നതെങ്കിൽ കെസി വേണുഗോപാൽ രണ്ട് വന്ദേ ഭാരതുകൾക്കും കായംകുളത്ത് സ്റ്റോപ്പ് അനുവദിക്കണമെന്നാണ് റെയിൽവേ മന്ത്രിയോട് ആവശ്യപ്പെട്ടിരിക്കുന്നത്. നേരത്തെ മാവേലിക്കര എംപി കൊടിക്കുന്നിൽ സുരേഷും ആലപ്പുഴ മുൻ എംപി എഎം ആരിഫും ഇതേ ആവശ്യം റെയിൽവേയ്ക്ക് മുന്നിൽ ഉന്നയിച്ചിരുന്നു.
കേരളത്തിൽ സർവീസ് നടത്തുന്ന രണ്ട് വന്ദേ ഭാരതുകൾക്കും മികച്ച പ്രതികരണമാണ് ലഭിക്കുന്നത്. കോച്ചുകളുടെ എണ്ണം കൂട്ടിയിട്ടും സെമി ഹൈസ്പീഡ് ട്രെയിനിൽ ടിക്കറ്റുകൾ കിട്ടാനില്ലെന്ന പരാതിയാണ് യാത്രക്കാർ ഉന്നയിക്കുന്നത്. കൂടുതൽ വന്ദേ ഭാരതുകൾ അനുവദിക്കണമെന്ന ആവശ്യവും ഉയരുന്നതിനിടെയാണ് നിലവിലെ സർവീസുകൾക്ക് അധിക സ്റ്റോപ്പുകൾ എന്ന ആവശ്യവും വരുന്നത്.
കായംകുളത്ത് വന്ദേ ഭാരതിന് സ്റ്റോപ്പ് അനുവദിച്ചാൽ മൂന്ന് ജില്ലക്കാർക്കാണ് അതിവേഗ ട്രെയിനിൻ്റെ പ്രയോജനം ലഭിക്കുക. ഏറ്റവും കൂടുതൽ പ്രയോജനം പത്തനംതിട്ടക്കാർക്കാണ്. ഒപ്പം, ആലപ്പുഴ, കൊല്ലം യാത്രക്കാർക്കും ഇവിടെ നിന്ന് വന്ദേ ഭാരതിൽ യാത്ര ചെയ്യാൻ കഴിയും. കോട്ടയം വഴി സർവീസ് നടത്തുന്ന കാസർകോട് – തിരുവനന്തപുരം വന്ദേ ഭാരതിന് നിലവിൽ ചെങ്ങന്നൂരിൽ സ്റ്റോപ്പുണ്ട്. ഈ സാഹചര്യത്തിൽ കായംകുളത്ത് പുതിയ സ്റ്റോപ്പ് അനുവദിക്കുമോ എന്നത് സംശയമാണ്.
തിരുവനന്തപുരത്ത് നിന്ന് രാവിലെ 05:15ന് പുറപ്പെടുന്ന വന്ദേ ഭാരത് (20634) 06:03നാണ് കൊല്ലത്തെത്തുക. 06:37ന് കായംകുളം സ്റ്റേഷനിലൂടെ കടന്നുപോകുന്ന ട്രെയിനിന് 06:53ന് ചെങ്ങന്നൂരിൽ സ്റ്റോപ്പുണ്ട്. തുടർന്ന് 07:24ന് കോട്ടയത്തും എത്തും. മടക്കയാത്രയിൽ (20633) ഉച്ചയ്ക്ക് 02:30ന് കാസർകോട് നിന്ന് പുറപ്പെടുന്ന ട്രെയിൻ രാത്രി 08:46നാണ് ചെങ്ങന്നൂരിലെത്തുക. 09:03ന് കായംകുളം വഴി പോകുന്ന ട്രെയിൻ 09:34ന് കൊല്ലം ജങ്ഷനിലുമെത്തും.
മംഗളൂരുവിൽ നിന്ന് രാവിലെ 06:25ന് പുറപ്പെടുന്ന വന്ദേ ഭാരത് (20631) 12:38നാണ് ആലപ്പുഴയിലെത്തുന്നത്. 01:10ന് കായംകുളം വഴി കടന്നുപോകുന്ന ട്രെയിൻ 01:40ന് കൊല്ലത്തെത്തും. ഈ സർവീസിൽ കായംകുളത്തും സ്റ്റോപ്പ് അനുവദിക്കണമെന്ന് നാട്ടുകാരും രാഷ്ട്രീയ പാർട്ടികളും ആവശ്യപ്പെടുന്നത്. മടക്കയാത്രയിൽ (20632) വൈകീട്ട് 04:05ന് തിരുവനന്തപുരത്ത് നിന്ന് പുറപ്പെടുന്ന വന്ദേ ഭാരത് 04:53നാണ് കൊല്ലത്തെത്തുന്നത്. 05:24ന് കായംകുളം വഴി കടന്നുപോകുന്ന ട്രെയിൻ 05:55ന് ആലപ്പുഴയിലുമെത്തും.
നേരത്തെ തിരുവനന്തപുരം – മംഗളൂരു വന്ദേ ഭാരതിന് കായംകുളത്ത് സ്റ്റോപ്പ് അനുവദിക്കണമെന്ന ആശ്യത്തോട് അനുകൂലമായി പ്രതികരിച്ച ഡിആർഎം അധിക സ്റ്റോപ്പിൻ്റെ സാധ്യത പരിശോധിക്കുമെന്ന് കൊടിക്കുന്നിൽ സുരേഷിന് ഉറപ്പുനൽകിയിരുന്നു. എന്നാൽ പിന്നീട് ഇതിൽ പ്രഖ്യാപനങ്ങളൊന്നും ഉണ്ടായില്ല.
