മനുഷ്യരിലും മറ്റു ചില മൃഗങ്ങളിലും ഉണ്ടാകാവുന്ന ഒരു പകർച്ചവ്യാധി വൈറൽ രോഗമാണ് കുരങ്ങുവസൂരി അല്ലെങ്കിൽ വാനരവസൂരി എന്നറിയപ്പെടുന്ന മങ്കിപോക്സ്. പനി, വീർത്ത ലിംഫ് നോഡുകൾ, കുമിളകൾ രൂപപ്പെടുകയും പിന്നീട് പുറംതോട് രൂപപ്പെടുകയും ചെയ്യുന്ന ചുണങ്ങ് എന്നിവയാണ് ലക്ഷണങ്ങൾ. അണുബാധയുണ്ടായി 5 മുതൽ 21 ദിവസംത്തിനകം രോഗലക്ഷണങ്ങൾ പ്രത്യക്ഷപ്പെടുന്നു. രോഗലക്ഷണങ്ങളുടെ ദൈർഘ്യം സാധാരണയായി 2 മുതൽ 4 ആഴ്ച വരെയാണ്. നേരിയ ലക്ഷണങ്ങൾ ഉണ്ടാവുകയോ രോഗലക്ഷണങ്ങളൊന്നും അറിയാതെ രോഗബാധയുണ്ടാവുകയോ ചെയ്യാം. പനിയും മറ്റ് ലക്ഷണങ്ങളും എല്ലാ പകർച്ചയിലും പൊതുവായി കണ്ടെത്തിയിട്ടില്ല. പ്രത്യേകിച്ച്, കുട്ടികളിലോ ഗർഭിണികളിലോ പ്രതിരോധശേഷി കുറഞ്ഞവരിലോ രോഗാവസ്ഥ കഠിനമായേക്കാം.
ഓർത്തോപോക്സ് വൈറസ് ജനുസ്സിലെ സൂനോട്ടിക് വൈറസായ മങ്കിപോക്സ് വൈറസാണ് ഈ രോഗത്തിന് കാരണമാകുന്നത്. വസൂരിയുടെ കാരണക്കാരനായ വേരിയോള വൈറസും ഈ ജനുസ്സിൽ പെട്ടതാണ്. മനുഷ്യരിലെ രണ്ട് തരങ്ങളിൽ, പശ്ചിമാഫ്രിക്കൻ തരം മധ്യ ആഫ്രിക്കൻ (കോംഗോ ബേസിൻ) തരത്തേക്കാൾ കഠിനമായ രോഗത്തിന് കാരണമാകുന്നു. രോഗം ബാധിച്ച മൃഗങ്ങളിൽ നിന്നോ, രോഗം ബാധിച്ച മാംസം കൈകാര്യം ചെയ്യുന്നതിലൂടെയോ മൃഗങ്ങളുടെ കടികളിലൂടെയോ പോറലുകൾ വഴിയോ ഇത് പകരാം. രോഗബാധിതമായ ശരീര സ്രവങ്ങൾ, മലിനമായ വസ്തുക്കൾ, വായുവിലൂടെയുള്ള സമ്പർക്കം എന്നിവയിലൂടെ മനുഷ്യരിൽ നിന്ന് മനുഷ്യരിലേക്ക് പകരാം. രോഗലക്ഷണങ്ങളുടെ തുടക്കം മുതൽ രോഗം പൂർണ്ണമായി ഭേദമാകുന്നതുവരെ, ആളുകൾക്ക് വൈറസ് പകരാൻ കഴിയും. വൈറസിന്റെ ഡിഎൻഎ പരിശോധിച്ച് രോഗനിർണയം നടത്താം.
എംപോക്സിന് തെളിയിക്കപ്പെട്ട ചികിത്സയില്ല, പക്ഷേ ഇത് സാധാരണയായി സ്വയം മാറും. എംപോക്സിന് കൂടുതൽ സാധ്യതയുള്ളതിനാൽ വാക്സിനേഷൻ എടുക്കാൻ ആരോഗ്യ വിദഗ്ധർ ശുപാർശ ചെയ്യുന്നു. 1988-ൽ നടത്തിയ ഒരു പഠനത്തിൽ, വസൂരി വാക്സിൻ അടുത്ത സമ്പർക്കത്തിൽ അണുബാധ തടയുന്നതിനും രോഗത്തിന്റെ തീവ്രത കുറയ്ക്കുന്നതിനും ഏകദേശം 85% സംരക്ഷണമാണെന്ന് കണ്ടെത്തി. പരിഷ്കരിച്ച വാക്സിനിയ അങ്കാറയെ അടിസ്ഥാനമാക്കിയുള്ള ഒരു പുതിയ വസൂരി വാക്സിൻ അംഗീകരിച്ചു, എന്നാൽ ലഭ്യത പരിമിതമാണ്. വ്യക്തിശുചിത്വം പാലിക്കുക, രോഗികളും മറ്റ് മൃഗങ്ങളുമായുള്ള സമ്പർക്കം ഒഴിവാക്കുക എന്നിവയാണ് രോഗപ്പകർച്ച തടയാനുള്ള മറ്റു മാർഗ്ഗങ്ങൾ. ആൻറിവൈറൽ മരുന്നുകൾ, സിഡോഫോവിർ, ടെക്കോവിരിമാറ്റ്, വാക്സിനിയ ഇമ്യൂൺ ഗ്ലോബുലിൻ, വസൂരി വാക്സിൻ എന്നിവ രോഗപ്പകർച്ച നിയന്ത്രിക്കാൻ ഉപയോഗിക്കാം. രോഗം സാധാരണയായി സൗമ്യമാണ്. രോഗബാധിതരിൽ ഭൂരിഭാഗവും ചികിത്സ കൂടാതെ ഏതാനും ആഴ്ചകൾക്കുള്ളിൽ സുഖം പ്രാപിക്കും. മരണസാധ്യതയെക്കുറിച്ചുള്ള ഏകദേശ കണക്കുകൾ 10% വരെയാണ്. എന്നിരുന്നാലും 2017 മുതൽ കുരങ്ങുപനിയുടെ അനന്തരഫലമായി വളരെ കുറച്ച് മരണങ്ങൾ മാത്രമേ രേഖപ്പെടുത്തിയിട്ടുള്ളൂ
അടയാളങ്ങളും ലക്ഷണങ്ങളും : തലവേദന, പേശിവേദന, പനി, ക്ഷീണം എന്നിവയാണ് പ്രാരംഭ ലക്ഷണങ്ങൾ. ഇത് തുടക്കത്തിൽ ഇൻഫ്ലുവൻസ പോലെ പ്രത്യക്ഷപ്പെടാം. ഈ രോഗം ചിക്കൻപോക്സ്, അഞ്ചാംപനി, വസൂരി എന്നിവയോട് സാമ്യമുള്ളതാണ്, പക്ഷേ വീർത്ത ഗ്രന്ഥികളുടെ സാന്നിധ്യത്താൽ ഇത് വേർതിരിച്ചിരിക്കുന്നു. ചുണങ്ങു പ്രത്യക്ഷപ്പെടുന്നതിന് മുമ്പ് ചെവിക്ക് പിന്നിൽ, താടിയെല്ലിന് താഴെ, കഴുത്തിൽ അല്ലെങ്കിൽ ഞരമ്പിൽ ഇവ പ്രത്യക്ഷപ്പെടുന്നു. പനി വന്ന് ഏതാനും ദിവസങ്ങൾക്കുള്ളിൽ, മുഖത്ത് സ്വഭാവപരമായി ലക്ഷണങ്ങൾ പ്രത്യക്ഷപ്പെടുന്നു. എച്ച് ഐ വി ബാധിതരിൽ രോഗലക്ഷണങ്ങൾ വ്യത്യാസപ്പെടാം. 2022-ലെ കുരങ്ങുപനി പൊട്ടിപ്പുറപ്പെട്ട പല കേസുകളിലും ജനനേന്ദ്രിയത്തിലും പൊള്ളലുകൾ കാണപ്പെടുകയും പനി, വീർത്ത ലിംഫ് നോഡുകൾ, വിഴുങ്ങുമ്പോൾ വേദന എന്നിവയും ഉണ്ടായിരുന്നു.
രോഗം ബാധിച്ചവരിൽ കാലുകളിലും വായിലും, ജനനേന്ദ്രിയത്തിലും കണ്ണുകളിലും കുമിളകൾ കാണപ്പെട്ടു. അവ ചെറിയ പരന്ന പാടുകളായി ആരംഭിക്കുന്നു, കുമിളകൾ ദ്രവം നിറഞ്ഞ് പിന്നീട് പൊട്ടിത്തെറിക്കുകയും ചുണങ്ങുകയും ചെയ്യുന്നു. കുമിളകൾ ഒന്നുചേർന്ന് ചിലപ്പോൾ വലിയ മുറിവുകൾ ഉണ്ടാകാം. ശരീരത്തിന്റെ ഓരോ ബാധിത ഭാഗങ്ങളിലും, മുറിവുകൾ ഒരേ ഘട്ടത്തിൽ വികസിക്കുന്നു. ഇത് വസൂരിയുടെ ചുണങ്ങുപോലെ കാണപ്പെടുന്നു. ചുണങ്ങ് സാധാരണയായി പത്ത് ദിവസം നീണ്ടുനിൽക്കും. അസുഖമുള്ള ഒരാൾക്ക് രണ്ടോ നാലോ ആഴ്ച വരെ അങ്ങനെയിരിക്കാം. രോഗശാന്തിക്ക് ശേഷം, മുറിവുകൾ ഇരുണ്ട പാടുകളായി മാറുന്നതിന് മുമ്പ് വിളറിയ അടയാളങ്ങൾ അവശേഷിപ്പിച്ചേക്കാം.
ദ്വിതീയ അണുബാധകൾ: ന്യുമോണിയ, സെപ്സിസ്, എൻസെഫലൈറ്റിസ്, ഗുരുതരമായ നേത്ര അണുബാധയാണെങ്കിൽ കാഴ്ചശക്തി നഷ്ടപ്പെടൽ എന്നിവ സങ്കീർണതകളിൽ ഉൾപ്പെടുന്നു. ഗർഭാവസ്ഥയിൽ അണുബാധയുണ്ടായാൽ, ചാപിള്ള പ്രസവംമോ ജനന വൈകല്യങ്ങളോ ഉണ്ടാകാം. കുട്ടിക്കാലത്ത് വസൂരി വാക്സിനേഷൻ എടുക്കുന്നവരിൽ ഈ രോഗം കുറവായിരിക്കാം.
