ഡൽഹി : ബോളിവുഡ് നടൻ സുശാന്ത് സിംഗ് രജ്പുതിന്റെ മരണത്തിലെ അന്വേഷണവുമായി ബന്ധപ്പെട്ട് സുശാന്തിന്റെ കുടുംബത്തിന് പിന്തുണ അറിയിച്ച് നിർഭയയുടെ അമ്മ ആശാദേവി. രണ്ട് മാസത്തിലധികമായി സുശാന്തിന്റെ മരണത്തെക്കുറിച്ചുള്ള അന്വേഷണങ്ങൾ പുരോഗമിച്ചു കൊണ്ടിരിക്കുകയാണ്. നീതിക്ക് വേണ്ടിയുള്ള പോരാട്ടത്തിലാണ് സുശാന്തിന്റെ കുടുംബം. ഇവരുടെ കുടുംബത്തിന് ഉറപ്പായും നീതി ലഭിക്കുമെന്ന് ആശാദേവി പറഞ്ഞു.
‘രാജ്യം മുഴുവനും നിങ്ങൾക്കൊപ്പമുണ്ടെന്ന് സുശാന്തിന്റെ കുടുംബത്തോട് പറയാൻ ഞാൻ ആഗ്രഹിക്കുന്നു.’ ആശാദേവി ടൈംസ് നൗവിനോട് പറഞ്ഞു. സത്യം പുറത്തു വരുമെന്ന് സുശാന്തിന്റെ സഹോദരി ശ്വേത സിംഗ് കൃതിയോട് അവർ പറഞ്ഞു. സുപ്രീം കോടതിയും ഈ രാജ്യത്തെ ജനങ്ങളും നിങ്ങൾക്കൊപ്പമുണ്ട്. സുപ്രീം കോടതിയെ ഉറച്ച് വിശ്വസിക്കാൻ സുശാന്തിന്റെ പിതാവ് കെ കെ സിംഗിനോട് ആശാദേവി ആവശ്യപ്പെട്ടു. മകന്റെ മരണത്തെക്കുറിച്ച് സിബിഐ അന്വേഷണത്തിന് ഉത്തരവ് ഉണ്ടാകുമെന്ന് അദ്ദേഹത്തെ ആശാദേവി ആശ്വസിപ്പിക്കുകയും ചെയ്തു.
