മുല്ലപ്പെരിയാർ അണക്കെട്ട് (Mullapperiyar dam) ശക്തിപ്പെടുത്തുന്നതിനുള്ള നിർദേശങ്ങൾ നൽകി മെട്രോമാൻ ഇ. ശ്രീധരൻ. വയനാട്ടിലെ ഉരുൾപൊട്ടലിനുശേഷം, നൂറ്റാണ്ടുകൾ പഴക്കമുള്ള ഡാമിന്റെ സുരക്ഷയെക്കുറിച്ചുള്ള ഭയം വീണ്ടും ചർച്ചാവിഷയമായി മാറിയിരുന്നു. ബുധനാഴ്ച കോഴിക്കോട് നടന്ന ഒരു പരിപാടിയെ അഭിസംബോധന ചെയ്യവെ, തമിഴ്‌നാടിന് വെള്ളം നൽകുന്നതിന് റിസർവോയറിൽ നിന്ന് പുറത്തേക്ക് തുരങ്കം നിർമ്മിക്കണമെന്ന് ശ്രീധരൻ നിർദ്ദേശിച്ചു.
അണക്കെട്ട് ഡീകമ്മീഷൻ ചെയ്യണമെന്നാവശ്യപ്പെട്ട് കേരളം മുറവിളി തുടരുമ്പോൾ അയൽ സംസ്ഥാനമായ തമിഴ്‌നാട് സുപ്രീം കോടതിയിൽ മറിച്ചുള്ള വാദവുമായി രംഗത്തുണ്ട്.. ജലസേചന ആവശ്യങ്ങൾക്കായി തമിഴ്‌നാട് ആശ്രയിക്കുന്നത് മുല്ലപ്പെരിയാർ അണക്കെട്ടിനെയാണ്.
സംരക്ഷണ ഭിത്തികൾ നിർമ്മിക്കുന്നത് ഘടനയെ ശക്തിപ്പെടുത്തുമെന്നും 50 വർഷത്തേക്ക് ഡാമിന്റെ സുരക്ഷയെക്കുറിച്ചുള്ള ഭയം ഇല്ലാതാക്കുമെന്നും ശ്രീധരൻ പറഞ്ഞു. പുതിയ അണക്കെട്ട് നിർമ്മിക്കുന്നത് ചെലവേറിയതാണെന്നും കുറഞ്ഞത് 12 മുതൽ 15 വർഷം വരെ എടുക്കുമെന്നും ശ്രീധരൻ പറഞ്ഞു.
നാലോ അഞ്ചോ ചെക്ക് ഡാമുകൾ നിർമ്മിക്കുന്നത് തമിഴ്‌നാട്ടിലെ ജലസേചന ആവശ്യങ്ങൾക്കായി വെള്ളം തിരിച്ചുവിടാൻ സഹായിക്കുമെന്ന് അദ്ദേഹം പറഞ്ഞു. സംഭരണം സുരക്ഷിതമായ തലത്തിൽ നിലനിർത്താൻ തൻ്റെ നിർദ്ദേശങ്ങൾ സഹായിക്കുമെന്ന് അദ്ദേഹം അവകാശപ്പെട്ടു. മുല്ലപ്പെരിയാറിലെ പരമാവധി സംഭരണ ശേഷി 152 അടിയാണ്.
ഡാമിന്റെ സുരക്ഷിതത്വത്തെ കുറിച്ച് ഒരുപാട് തെറ്റിദ്ധാരണകൾ നിലനിൽക്കുന്നുണ്ടെന്നും അദ്ദേഹം പറഞ്ഞു. അണക്കെട്ടിൻ്റെ സുരക്ഷയെക്കുറിച്ചുള്ള ആശങ്ക അടുത്തിടെ കോൺഗ്രസ് എം.പി. ഡീൻ കുര്യാക്കോസ് ലോക്സഭയിൽ ഉന്നയിച്ചിരുന്നു. അണക്കെട്ടിനെ ‘വാട്ടർബോംബ്’ എന്ന് വിശേഷിപ്പിച്ച ഡീൻ, ഡാം ഡീകമ്മീഷൻ ചെയ്യണമെന്നും ആവശ്യപ്പെട്ടിരുന്നു.
അണക്കെട്ടിൻ്റെ സുരക്ഷയിൽ ആശങ്കപ്പെടേണ്ടതില്ലെന്ന് മുഖ്യമന്ത്രി പിണറായി വിജയൻ പിന്നീട് പറഞ്ഞു. 1895ലാണ് മുല്ലപ്പെരിയാർ അണക്കെട്ട് നിർമ്മിച്ചത്. അണക്കെട്ട് തികച്ചും സുരക്ഷിതമാണെന്ന് തമിഴ്‌നാട് വാദിക്കുമ്പോൾ, നിലവിലുള്ള ഘടനയ്ക്ക് സമീപം പുതിയ അണക്കെട്ട് നിർമ്മിക്കണമെന്ന ആവശ്യത്തിൽ കേരളം ശക്തമായി രംഗത്തുണ്ട്.
