ചെന്നൈയില്‍ ബിരിയാണിയെ ചൊല്ലിയുണ്ടായ തര്‍ക്കത്തിനിടെ 22കാരനെ മൂന്നംഗ സംഘം വെട്ടിക്കൊന്നു. സ്വകാര്യ കമ്പനി ജീവനക്കാരനായിരുന്ന ബാലാജിയാണ് കൊല്ലപ്പെട്ടത്. സുഹൃത്തുക്കളോടൊപ്പം മണ്ണൂര്‍പേട്ട ബസ് സ്റ്റോപ്പിന് സമീപം അത്താഴം കഴിക്കാനെത്തിയതായിരുന്നു ബാലാജി.
ബാലാജിയും സുഹൃത്തുക്കളും ബിരിയാണി വാങ്ങുന്നതിനിടയില്‍ മൂന്ന് പേര്‍ കടയിലേക്ക് മദ്യപിച്ചെത്തി. ഇവരും ബിരിയാണി തന്നെ ആവശ്യപ്പെട്ടു. എന്നാല്‍ കടയുടമ ബാലാജിക്ക് ആദ്യം ബിരിയാണി നല്‍കിയത് പ്രതികള്‍ ചോദ്യം ചെയ്തു. ഇത് പിന്നീട് വാക്കേറ്റത്തിലും കയ്യാങ്കളിയിലേക്കുമെത്തി.
തുടര്‍ന്ന് കൈവശമുണ്ടായിരുന്ന അരിവാള്‍ കൊണ്ട് മൂന്നംഗ സംഘം ബാലാജിയെ ആക്രമിക്കുകയായിരുന്നു. ഇതിന് പിന്നാലെ സ്ഥലത്തുണ്ടായിരുന്നവര്‍ പൊലീസില്‍ വിവരമറിയിച്ചു. ബാലാജിയെ ഉടന്‍ ആശുപത്രിയിലെത്തിക്കുകയും ചെയ്തു. എന്നാല്‍ ഇയാളെ രക്ഷിക്കാനായില്ല. സംഭവത്തിന്റെ മുഴുവന്‍ ദൃശ്യങ്ങളും സമീപത്തെ സിസിടിവി ക്യാമറയില്‍ പതിഞ്ഞിട്ടുണ്ട്. മൂന്ന് പ്രതികളെയും ചെന്നൈ പോലീസ് അറസ്റ്റ് ചെയ്തു. കേസില്‍ കൂടുതല്‍ അന്വേഷണം നടക്കുകയാണ്.
