ആലപ്പുഴ: വിദ്യാര്‍ഥികള്‍ക്ക് ഭക്ഷ്യ വിഷബാധ. പുന്നപ്ര അംബേദ്കര്‍ മോഡല്‍ റസിഡന്‍ഷ്യല്‍ ഹൈസ്‌കൂള്‍, ഹയര്‍ സെക്കന്‍ഡറി ക്ലാസ്, ഹോസ്റ്റലില്‍ താമസിച്ചു പഠിക്കുന്ന വിദ്യാര്‍ഥികള്‍ എന്നിവര്‍ക്കാണ് ഭക്ഷ്യ വിഷബാധയേറ്റത്. വയറുവേദനയും ഛര്‍ദ്ദിയും അനുഭവപ്പെട്ട 13 കുട്ടികളെ ആലപ്പുഴ ജനറല്‍ ആശുപത്രിയില്‍ പ്രവേശിപ്പിച്ചു.
ഉച്ചയ്ക്ക് ഭക്ഷണം കഴിച്ച ശേഷമാണ് വിദ്യാര്‍ഥികള്‍ക്ക് വയറു വേദനയും ഛര്‍ദ്ദിയും അനുഭവപ്പെട്ടത്. കാന്റീനില്‍ നിന്ന് ചോറും സാമ്പാറുമാണ് വിദ്യാര്‍ഥികള്‍ കഴിച്ചത്. ഭക്ഷണം മോശമായിരുന്നെന്ന് വിദ്യാര്‍ഥികള്‍ പരാതിപ്പെട്ടിരുന്നു. പിന്നാലെയാണ് കുട്ടികള്‍ക്ക് അസ്വസ്ഥത അനുഭവപ്പെട്ടത്.
ആലപ്പുഴ ജില്ലാ കളക്ടര്‍ ഹരിത വി കുമാര്‍ ആശുപത്രിയിലെത്തി വിദ്യാര്‍ഥികളെ സന്ദര്‍ശിച്ചു. വിദ്യാര്‍ഥികളുടെ ആരോഗ്യസ്ഥിതി കളക്ടര്‍ വിലയിരുത്തി. ഭക്ഷണത്തെ കുറിച്ചുള്ള പരാതി വിദ്യാര്‍ഥികള്‍ കളക്ടറെ അറിയിച്ചു. അന്വേഷണം നടത്തുമെന്ന് കളക്ടര്‍ കുട്ടികള്‍ക്ക് ഉറപ്പ് നല്‍കി.
