വിവാദങ്ങളും വിലക്കുകളും വകവയ്ക്കാതെ പുതിയ ചിത്രവുമായി ശ്രീനാഥ് ഭാസി (Shreenath Bhasi). സോഹൻ സീനുലാൽ സംവിധാനം ചെയ്യുന്ന ‘ഡാൻസ് പാർട്ടി’യുടെ ഷൂട്ടിങ് ആരംഭിച്ചു. മുൻപും താരത്തിന്റെ പേരിൽ വിലക്കും വിവാദങ്ങളും നിലനിന്നിരുന്നെങ്കിലും അധികം വൈകാതെ ശ്രീനാഥ് അഭിനയ രംഗത്തേക്ക് തിരിച്ചെത്തിയിരുന്നു. കഴിഞ്ഞ വർഷം സിനിമയുടെ പ്രമോഷൻ ഭാഗമായെത്തിയ അഭിമുഖത്തിൽ അവതാരികയോട് മോശമായി സംസാരിച്ചെന്നു ആരോപിച്ച് താരത്തിന്റെ പേരിൽ അവതാരിക കേസ് കൊടുത്തിരുന്നു. ഈ സംഭവത്തോട് അനുബന്ധിച്ച് ശ്രീനാഥിനെ സിനിമാ സംഘടനകൾ വിലക്കിയിരുന്നു. എന്നാൽ അവതാരിക തന്നെ അധികം വൈകാതെ കേസ് പിൻവലിക്കുകയും ചെയ്തിരുന്നു.
പിന്നാലെയാണ് നിർമ്മാതാക്കളുമായി സഹകരിക്കുന്നില്ലെന്ന് ചൂണ്ടിക്കാട്ടി വീണ്ടും ഷെയ്ൻ നിഗത്തിനും(Shane Nigam) ശ്രീനാഥ് ഭാസിയ്ക്കും എതിരെ സിനിമാ സംഘടനകൾ വിലക്കുമായി രംഗത്തെത്തിയത്. ഏപ്രിൽ 25 മുതലാണ് ഷെയ്ൻ നിഗത്തിനും ശ്രീനാഥ് ഭാസിയ്ക്കും സിനിമാ സംഘടനകൾ വിലക്കേർപ്പെടുത്തിയത്. ഇരുവർക്കുമെതിരെ ഒട്ടേറെ പരാതികൾ ലഭിച്ചതിനാലാണ് രണ്ട് പേരെയും വിലക്കാൻ തീരുമാനിച്ചതെന്നാണ് വാർത്താ സമ്മേളനത്തിൽ ‘അമ്മ’ സംഘടന വ്യക്തമാക്കിയത്. ഷെയ്ൻ നിഗത്തിനും ശ്രീനാഥ് ഭാസിക്കുമെതിരെ കടുത്ത വിമർശനവും സിനിമ മേഖലയിൽ നിന്നും ഉയർന്നിരുന്നു. വിമർശനങ്ങൾക്കിടയിലും ഇരുവർക്കും പിന്തുണയുമായി നടൻ ഷൈൻ ടോം ചാക്കോ ഉൾപ്പെടെയുള്ളവർ എത്തിയിരുന്നു. കാലാകാലം ആരെയും വിലക്കാൻ പറ്റില്ലെന്നും ലിസ്റ്റ് നിരത്താനാണെങ്കിൽ ജോലി ചെയ്തിട്ട് കാശ് കിട്ടാത്തതിന്റെ ലിസ്റ്റ് തങ്ങളും നിരത്തുമെന്ന് ഷൈൻ ടോം ചാക്കോ ഇതിനോട് പ്രതികരിച്ചു.
താനും ശ്രീനാഥ് ഭാസിയും ഷെയ്ൻ നിഗവും ഒരുമിച്ച് സിനിമ ചെയ്യാൻ തുടങ്ങിയവരാണെന്നും വിലക്കാൻ ആണെങ്കിൽ അവർ വിലക്കട്ടെ എന്നാണ് ഷൈൻ പറയുന്നത്. അതിൽ കൂടുതൽ എന്താണ് സംഭവിക്കുകയെന്നും തിലകനെ വിലക്കിയിരുന്നില്ലേയെന്നും ഷൈൻ ചോദിക്കുന്നു. തൊഴിൽ ചെയ്യുന്നവരെ വിലക്കാൻ ആർക്കും അധികാരമില്ലെന്നും സസ്പെൻഷൻ കൊടുക്കുമെന്നും എന്നാൽ കാലാകാലം ആരെയും വിലക്കാൻ പറ്റില്ലെന്നും ഷൈൻ വ്യക്തമാക്കി. തങ്ങൾക്കും ലിസ്റ്റ് വയ്ക്കാനുണ്ടെന്നും ജോലി ചെയ്തിട്ട് കാശ് കിട്ടാത്തതിന്റെ ലിസ്റ്റ് തങ്ങളും നിരത്തുമെന്നും ഷൈൻ ടോം ചാക്കോ കൂട്ടിച്ചേർത്തു. അതേസമയം മലയാള സിനിമയിലെ പ്രശ്നക്കാരായ താരങ്ങളെ ഉൾപ്പെടുത്തി സിനിമയെടുക്കുമ്പോൾ അതിന്റെ പൂർണ ഉത്തരവാദിത്തം ആ സിനിമയുടെ നിർമ്മാതാക്കൾ തന്നെ ഏറ്റെടുക്കണമെന്ന് സിനിമ സംഘടനകൾ വ്യക്തമാക്കിയിരുന്നു.
ഇതിന് പിന്നാലെയാണ് ഡാൻസ് പാർട്ടി എന്ന ചിത്രവുമായി ശ്രീനാഥ് ഭാസി മുൻപോട്ട് പോകുന്നത്. കൊച്ചി നഗരത്തിൽ ഡാൻസും പാർട്ടിയുമൊക്കെയായി ജീവിതം ആഘോഷിക്കുന്ന ചെറുപ്പക്കാർക്കിടയിൽ ഉണ്ടാകുന്ന ചില സംഭവങ്ങളും അതിനെ തരണം ചെയ്യാൻ അവർ നടത്തുന്ന ശ്രമങ്ങളുമാണ് ചിത്രത്തിലെ പ്രമേയം. വിഷ്ണു ഉണ്ണികൃഷ്ണൻ, ശ്രീനാഥ് ഭാസി, ഷൈൻ ടോം ചാക്കോ, പ്രയാഗ മാർട്ടിൻ, ലെന, സാജു നവോദയ, പുതുമുഖം ശ്രിന്ദ, നാരായണൻകുട്ടി എന്നിവരാണ് സിനിമയിൽ മറ്റു പ്രധാന താരങ്ങളെ അവതരിപ്പിക്കുന്നത്.
