തൃശൂര്‍ രാമവര്‍മ്മപുരം പൊലീസ് അക്കാദമിയില്‍ ദിവസ വേതനക്കാരുടെ നിയമനം മാനദണ്ഡങ്ങളില്ലാതെ. എംപ്ലോയ്മെന്റ് എക്സ്ചേഞ്ചിനെ മറികടന്ന് നിയമനം നേടിയവരില്‍ പെന്‍ഷന്‍ പ്രായം പിന്നിട്ടവരും ഉണ്ടെന്നാണ് വിവരാവകാശ രേഖ.
59 ദിവസത്തിന് ശേഷം പുതിയ ആളുകളെ നിയോഗിക്കണമെന്ന ചട്ടത്തിലാണ് അട്ടിമറി നടത്തിയത്.
കാലാവധി പൂര്‍ത്തിയാക്കുന്ന മുറയ്ക്ക് നിലവിലുള്ളവരുടെ സ്ഥിരപ്പെടുത്താല്‍ തുടരുന്നു. സ്വീപ്പര്‍, കുക്ക്, ബാര്‍ബര്‍ തുടങ്ങിയ തസ്‌തികകളില്‍ 18,225 രൂപ പ്രതിമാസ ശമ്ബളത്തിലാണ് ദിവസവേതന അടിസ്ഥാനത്തില്‍ ജോലി ചെയ്യുന്നത്. 2006ലെ സര്‍ക്കാര്‍ ഉത്തരവ് പ്രകാരം എംപ്ലോയ്മെന്റ് എക്സ്ചേഞ്ച് വഴി 59 ദിവസത്തേക്കാണ് നിയമനം നല്‍കുന്നത്.
ഇക്കാര്യത്തില്‍ ഡിജിപിയുടെ സര്‍ക്കുലര്‍ നിലവിലുണ്ട്. എന്നാല്‍ കാലാവധി പൂര്‍ത്തിയാകുമ്ബോള്‍ നിലവില്‍ തൊഴിലെടുക്കുന്നവരെ സാങ്കേതികപരമായി പിരിച്ചുവിട്ട് അടുത്ത ദിവസം തന്നെ വീണ്ടും നിയമനം നല്‍കുന്ന വിചിത്ര രീതിയാണ് തൃശൂര്‍ പൊലീസ് അക്കാദമിയിലേത്. ബിപിഎല്‍കാരെ പരിഗണിക്കണമെന്ന വ്യവസ്ഥയും അട്ടിമറിക്കുന്നു. ഇത്തരം നിയമനത്തില്‍ പരിശോധനയോ അന്വേഷണമോ നടത്താതെ ആഭ്യന്തര വകുപ്പ് മൗനം പാലിക്കുന്നു.
