വർഷത്തിൽ ഒരിക്കൽ മാത്രം ഓടുന്ന ഈ ട്രെയിൻ 15 ദിവസം കൊണ്ട് സഞ്ചരിക്കുന്നത് ഏകദേശം 8,000 കിലോമീറ്ററാണ്. ലോകത്തിലെ തന്നെ ഏറ്റവും വലിയ സംരംഭക യാത്ര കൂടെയാണിത്. 2028-ൽ ആരംഭിച്ച സർവീസ് പ്രയോജനപ്പെടുത്തിയത് ആയിരക്കണക്കിന് യുവാക്കൾ. ഇതിൽ സംരംഭങ്ങൾ തുടങ്ങിയവരുമുണ്ട്.
ട്രെയിനിൽ 15 ദിവസം കൊണ്ട് ഇന്ത്യ ചുറ്റിക്കറങ്ങാം. ചെറു പട്ടണങ്ങളും ഗ്രാമങ്ങളും കാണാം. പക്ഷേ ട്രെയിൻ വർഷത്തിൽ ഒരിക്കൽ മാത്രമാണ് ഓടുക. എല്ലാ വർഷവും ഒരു പ്രത്യേക തീയതിയിലും സമയത്തുമായിരിക്കും ട്രെയിൻ സർവീസ്. യുവ സംരംഭകർക്ക് ഇന്ത്യൻ ബിസിനസ് നേതാക്കളെ കാണാനും സംവദിക്കാനുമൊക്കെയുള്ള അവസരം നൽകുന്ന സെപെഷ്യൽ ട്രെയിൻ സർവീസാണിത്.
15 ദിവസത്തിനുള്ളിൽ ഇന്ത്യയിലെ വിവിധ സ്ഥലങ്ങൾ സന്ദർശിക്കാൻ കഴിയുന്ന ഈ ട്രെയിൻ യാത്ര പക്ഷേ എല്ലാവർക്കും നടത്താൻ ആകില്ല. സംരംഭക രംഗത്ത് മികവുതെളിയിക്കാൻ ആഗ്രഹിക്കുന്ന യുവാക്കൾക്കാണ് അവസരം. ജാഗ്രതി എന്ന ലാഭരഹിത സംഘടനയാണ് ഇതിന് അവസരം നൽകുന്നത്.
രാജ്യത്തെ 500 ഓളം യുവാക്കളെ രാജ്യത്തുടനീളം ഒരു സ്പെഷ്യൽ ട്രെയിൻ യാത്രക്കായി തെരഞ്ഞെടുക്കും. ജോലി അന്വേഷിക്കുന്നവർ എന്നതിൽ നിന്ന് ജോലി നൽകുന്നവരായി യുവാക്കളെ മാറ്റുകയാണ് ലക്ഷ്യം. വിജയിച്ച ബിസിനസുകാരുടെ കഥകൾ യുവാക്കളെ പരിചയപ്പെടുത്തും. നെറ്റ് വർക്കിംഗിന് അവസരമുണ്ടാകുകയും ചെയ്യും. സമൂഹത്തിൽ മാറ്റങ്ങളുണ്ടാക്കാൻ യുവാക്കളെ പ്രചോദിപ്പിക്കുന്നതിനാണ് ഈ യാത്ര രൂപകൽപ്പന ചെയ്തിരിക്കുന്നത്. 15 സ്ഥലങ്ങളിൽ സ്റ്റോപ്പുകളുള്ള ട്രെയിനിൽ ഏകദേശം 8,000 കിലോമീറ്റർ ദൂരം സഞ്ചരിക്കാനാകും.
വർഷത്തിൽ ഒരിക്കൽ മാത്രമാണ് ട്രെയിൻ ഓടുന്നത്. ഓരോ വർഷവും ജാഗ്രതി യാത്രക്കായി 500 പേരെ മാത്രമാണ് തെരഞ്ഞെടുക്കുക. മുംബൈയിൽ നിന്നാണ് യാത്ര ആരംഭിക്കുന്നത്. ആദ്യ സ്റ്റോപ്പ് അഹമ്മദാബാദിലാണ്. അവിടെ നിന്ന്, ബെംഗളൂരു വഴി നീങ്ങുന്ന ട്രെയിൻ ഒടുവിൽ തമിഴ്‌നാട്ടിലെ മധുരയിൽ എത്തുന്നു. തുടർന്ന് ഒഡീഷയിലേക്ക് യാത്ര ചെയ്യും. ഇന്ത്യയുടെ മധ്യഭാഗത്തെ സംസ്ഥാനങ്ങളും കണ്ട് ഒടുവിൽ മുംബൈയിലേക്ക് മടക്കം. പ്രമുഖ ബിസിനസ് കേന്ദ്രങ്ങൾ സന്ദർശിക്കാനുമാകും. ഒരു ലാഭരഹിത സംഘടനയായ ജാഗ്രതി സേവാ സൻസ്ഥാൻ 2008-മുതലാണ് ജാഗ്രതി യാത്ര ആരംഭിച്ചത്. ഇപ്പോൾ 15-ലധികം യാത്രകൾ പൂർത്തിയാക്കി. ആയിരക്കണക്കിന് യുവാക്കൾ സ്റ്റാർട്ടപ്പുകൾ ആരംഭിക്കുകയോ, സാമൂഹിക സംരംഭങ്ങളുടെ ഭാഗമാവുകയോ ചെയ്തിട്ടുണ്ട്. ഇന്ത്യയെ കണ്ടെത്തുക മാത്രമല്ല, സ്വന്തം വഴി കണ്ടെത്താൻ യുവാക്കളെ സഹായിക്കുന്ന ഒരു യാത്ര കൂടിയാണിത്.
എല്ലാ വർഷവും നവംബറിലാണ് ജാഗ്രതി യാത്ര. 2025 ലെ യാത്ര നവംബർ ഏഴിന് ആരംഭിച്ച് നവംബർ 22-ന് അവസാനിക്കും. എന്നാൽ രജിസ്ട്രേഷൻ വളരെ മുൻകൂട്ടി പൂർത്തിയാക്കണമെന്ന് ജാഗ്രിതിയുടെ ഔദ്യോഗിക ഇൻസ്റ്റാഗ്രാം അക്കൗണ്ട് സൂചിപ്പിക്കുന്നു. അപേക്ഷകർ 21 വയസിനും 27 വയസിനും ഇടയിൽ പ്രായമുള്ളവരായിരിക്കണം. സീറ്റ് ഉറപ്പാക്കാൻ, ഔദ്യോഗിക വെബ്സൈറ്റ് സന്ദർശിക്കാം. https://www.jagritiyatra.com/. എന്ന വെബ്സൈറ്റിലൂടെ യാത്ര ബുക്ക് ചെയ്യാം. 2025 ഒക്ടോബർ 15 വരെ രജിസ്ട്രേഷന് അവസരമുണ്ടായിരിക്കും.
