ഗുജറാത്തില്‍ കലാപകാലത്ത് ദെലോള്‍ ഗ്രാമത്തില്‍ ആറ് പേര്‍ കൊല്ലപ്പെട്ട സംഭവത്തില്‍ എല്ലാ പ്രതികളെ വെറുതെവിട്ട് കോടതി. ഹാലോളിലെ അഡീഷണല്‍ ജില്ലാ കോടതിയാണ് കേസിലെ 22 പ്രതികളെയും കുറ്റവിമുക്തരാക്കിയത്. കുറ്റപത്രത്തില്‍ ആകെ 22 പേരുടെ പേരുകള്‍ ഉണ്ടായിരുന്നു. അതില്‍ എട്ട് പേര്‍ മരിച്ചു. ബാക്കി 14 പേരെയാണ് ചൊവ്വാഴ്ച കുറ്റവിമുക്തരാക്കിയത്.
2002ലെ ഗുജറാത്ത് കലാപത്തിനിടെ ദെലോള്‍ ഗ്രാമത്തില്‍ ആള്‍ക്കൂട്ടം ആറ് പേരെ കൊലപ്പെടുത്തിയിരുന്നു. പ്രതികളെ പിടികൂടി 18 വര്‍ഷത്തിന് ശേഷമാണ് കോടതി വിധി വന്നത്. പ്രതികള്‍ വര്‍ഷങ്ങളോളം ജയിലില്‍ കഴിഞ്ഞിരുന്നു. എന്നാല്‍ പ്രതികളെ കോടതി കുറ്റവിമുക്തരാക്കിയതിന്റെ കാരണം വ്യക്തമല്ല.
ഗുജറാത്ത് കലാപം
2002 ഫെബ്രുവരി 27 ന് ഗുജറാത്തിലെ ഗോധ്രയില്‍ വെച്ച് അയോധ്യയില്‍ നിന്ന് മടങ്ങുകയായിരുന്ന കര്‍സേവകര്‍ സഞ്ചരിച്ച സബര്‍മതി എക്സ്പ്രസിന്റെ കോച്ച് കത്തി 58 പേര്‍ മരിച്ചു. ഇത് സംസ്ഥാനത്തുടനീളം വലിയ തോതിലുള്ള കലാപത്തിന് കാരണമായി. സൈന്യത്തെ അയക്കാന്‍ കേന്ദ്ര സര്‍ക്കാരിനെ നിര്‍ബന്ധിതരാക്കി.
ഔദ്യോഗിക കണക്കുകള്‍ പ്രകാരം 790 മുസ്ലീങ്ങളും 254 ഹിന്ദുക്കളും ഉള്‍പ്പെടെ 1,044 പേര്‍ കൊല്ലപ്പെട്ട ഇന്ത്യയിലെ ഏറ്റവും മോശമായ വര്‍ഗീയ കലാപങ്ങളിലൊന്നാണിത്. കലാപത്തിന്റെ മറവില്‍ ബലാത്സംഗങ്ങളും കൊള്ളയും സ്വത്തുക്കള്‍ നശിപ്പിക്കലും വീടുകളും കടകളും കത്തിക്കുകയും ഉള്‍പ്പെടെ റിപ്പോര്‍ട്ട് ചെയ്യപ്പെട്ടു. രണ്ട് ലക്ഷത്തോളം പേരെ മാറ്റിപ്പാര്‍പ്പിച്ചു. അവരില്‍ പലര്‍ക്കും സ്വന്തം വീടുകളിലേക്ക് മടങ്ങാന്‍ കഴിയാതെ പുതിയ സ്ഥലങ്ങളില്‍ താമസമാക്കേണ്ടി വന്നു.
‘സത്യം മറച്ചുവെക്കാനാവില്ല’; ബിബിസി വിവാദത്തില്‍ പ്രതികരിച്ച് രാഹുല്‍ ഗാന്ധി
ബിബിസി ഡോക്യുമെന്ററി വിവാദത്തില്‍ പ്രതികരിച്ച് കോണ്‍ഗ്രസ് നേതാവ് രാഹുല്‍ ഗാന്ധി. പ്രധാനമന്ത്രി നരേന്ദ്ര മോദിയെക്കുറിച്ചുള്ള ഡോക്യുമെന്ററി ഇന്ത്യ നിരോധിച്ചു, എന്നാല്‍ സത്യം മറച്ചുവെക്കാനാവില്ലെന്നായിരുന്നു രാഹുലിന്റെ പ്രതികരണം. പ്രതിരോധത്തിലൂന്നിയാണ് വിദേശകാര്യ മന്ത്രാലയത്തിന്റെ നിലപാട്. അതിനാല്‍ ഇത് അസഹിഷ്ണുതയുടെ രാഷ്ട്രീയമാണെന്ന് താന്‍ കരുതുന്നതായും രാഹുല്‍ കൂട്ടിച്ചേര്‍ത്തു.
സത്യം മറച്ചുവെക്കാനാവില്ല. അത് പ്രകാശിക്കും. നമ്മുടേത് ഒരു ജനാധിപത്യ രാജ്യമാണ്. സത്യം എത്ര മറച്ചുവെച്ചാലും അത് വിജയിക്കുമെന്നും അദ്ദേഹം പറഞ്ഞു. യുകെയുടെ ഔദ്യോഗിക ബ്രോഡ്കാസ്റ്ററായ ബിബിസിയുടെ ഡോക്യുമെന്ററി പക്ഷപാതപരവും വസ്തുനിഷ്ഠവുമല്ലെന്ന് വിശേഷിപ്പിച്ച് ഇന്ത്യ തള്ളിക്കളഞ്ഞിരുന്നു. പിന്നാലെ സീരീസ് പോസ്റ്റ് ചെയ്ത YouTube ചാനലുകളും ട്വിറ്റര്‍ അക്കൗണ്ടുകളും ബ്ലോക്ക് ചെയ്യാന്‍ കേന്ദ്രം നീക്കം ആരംഭിച്ചു. ബിബിസിയുടെ രണ്ട് ഭാഗങ്ങളുള്ള സീരീസ് ഒരു പ്രത്യേക അപകീര്‍ത്തികരമായ വിവരണത്തിലൂടെ രൂപകല്‍പ്പന ചെയ്ത ഒരു പ്രചരണ ശകലമാണെന്ന് ചൂണ്ടിക്കാട്ടിയായിരുന്നു നടപടി.
