ചെന്നൈ വിമാനത്താവളത്തിലെത്തിയ യാത്രക്കാരനില്‍ നിന്നും 1128 ഗ്രാം സ്വര്‍ണം കസ്റ്റംസ് പിടികൂടി. ദുബായില്‍ നിന്നെത്തിയ യുവാവ് പേസ്റ്റ് രൂപത്തിലാക്കി, കാലില്‍ കെട്ടിവച്ചാണ് സ്വര്‍ണം കടത്താന്‍ ശ്രമിച്ചത്.
പിടികൂടിയ സ്വര്‍ണത്തിന് വിപണിയില്‍ 60.58 ലക്ഷം രൂപ വിലവരുമെന്ന് കസ്റ്റംസ് അറിയിച്ചു.
വിസിറ്റിങ് വിസയില്‍ ദുബായില്‍ പോയി മടങ്ങിയ യുവാവില്‍ നിന്നാണ് സ്വര്‍ണം പിടികൂടിയത്. കസ്റ്റംസ് ലഗേജ് പരിശോധന നടത്തുന്നതിനിടെയാണ് യുവാവില്‍ സംശയം തോന്നിയത്. പിന്നീട് സ്വകാര്യ മുറിയിലേയ്ക്ക് കൊണ്ടു പോയി പരിശോധിച്ചു. കാലില്‍ ഇയാള്‍ ബാന്‍ഡേജുകള്‍ ഇട്ടിട്ടുണ്ടായിരുന്നു. കാര്യം അന്വേഷിച്ചപ്പോള്‍ സന്ധിവേദനയാണെന്നും ഡോക്ടര്‍ നിര്‍ദ്ദേശിച്ച പ്രകാരമാണ് ബാന്‍ഡേജ് ധരിച്ചതെന്നും പറഞ്ഞു.
പിന്നീട് കസ്റ്റംസ് ഉദ്യോഗസ്ഥര്‍ ബാന്‍ഡേജ് അഴിച്ച്‌ പരിശോധിച്ചപ്പോഴാണ് സ്വര്‍ണം കണ്ടെത്തിയത്. പേസ്റ്റ് രൂപത്തിലാക്കിയ സ്വര്‍ണം പ്രത്യേക കവറിലാക്കി, ബാന്‍ഡേജില്‍ തുന്നിച്ചേര്‍ത്ത നിലയിലായിരുന്നു. രണ്ടു ബാഗുകളിലായാണ് സ്വര്‍ണം സൂക്ഷിച്ചിരുന്നത്. ചെന്നൈ സ്വദേശിയായ ഇയാളെ കസ്റ്റംസ് കൂടുതല്‍ ചോദ്യം ചെയ്തു വരികയാണ്.
