കോഴിക്കോട്: കോഴിക്കോട് മെഡിക്കൽ കോളേജിലെ ലേഡീസ് ഹോസ്റ്റലിനു മുന്നിൽ വിദ്യാർഥിനികളുടെ പ്രതിഷേധം. രാത്രി പത്ത് മണിക്ക് ഹോസ്റ്റൽ അടയ്ക്കുമെന്ന ചട്ടം നിർബന്ധമാക്കിയതിനെത്തുടർന്നാണ് വിദ്യാർഥിനികൾ റോഡിലിറങ്ങി പ്രതിഷേധിച്ചത്.
പത്തു മണിക്ക് ശേഷം വിദ്യാർഥിനികൾക്ക് ഹോസ്റ്റലിൽ കയറാൻ സാധ്യമല്ലെന്നാണ് അധികൃതർ വ്യക്തമാക്കുന്നത്. സുരക്ഷാപ്രശ്നങ്ങളാണ് ചൂണ്ടികാണിക്കുന്നതെങ്കിലും സ്ട്രീറ്റ് ലൈറ്റ്, സിസിടിവി തുടങ്ങിയ സംവിധാനങ്ങളൊന്നും ഇവിടെയില്ലെന്നും വിദ്യാർഥിനികൾ ആരോപിക്കുന്നു.
ആൺകുട്ടികൾക്കും പെൺകുട്ടികൾക്കും 9.30 ക്ക് ഹോസ്റ്റലിൽ കയറണമെന്നാണ് നിബന്ധനയെങ്കിലും ആൺകുട്ടികളുടെ കാര്യത്തിൽ ഇത്തരം നിയന്ത്രണങ്ങളൊന്നും ബാധകമാകാറില്ലെന്നാണ് വിദ്യാർഥിനികൾ പറയുന്നത്. നിയമം പാലിക്കുന്നില്ലെങ്കിൽ ഹോസ്റ്റലിൽ നിന്നും ഇറങ്ങാനാണ് ലഭിച്ച വിവരമെന്നും ഇവർ വ്യക്തമാക്കുന്നു. ഇതിന് മുൻപും വിഷയം ചൂണ്ടിക്കാട്ടിയിരുന്നെങ്കിലും അധികൃതരുടെ ഭാഗത്തു നിന്നും നടപടിയൊന്നും ഉണ്ടായില്ല. പ്രിൻസിപ്പൽ സ്ഥലത്തില്ലാത്തതിനാൽ നാളെ ചർച്ച ചെയ്യാമെന്ന ഉറപ്പിൽ നിലവിൽ വിദ്യാർഥിനികൾ പ്രതിഷേധം അവസാനിപ്പിച്ചു.
