ഭരണഘടനയ്ക്കെതിരായ വിവാദ പരാമർശത്തിൽ മന്ത്രി സജി ചെറിയാനിൽനിന്ന് മുഖ്യമന്ത്രി വിശദീകരണം തേടി.

0
45

തിരുവനന്തപുരം: ഭരണഘടനയ്ക്കെതിരായ വിവാദ പരാമർശത്തിൽ മന്ത്രി സജി ചെറിയാനിൽനിന്ന് മുഖ്യമന്ത്രി വിശദീകരണം തേടി. വിഷയത്തിൽ രാജ്ഭവൻ ഇടപെട്ടതിന് പിന്നാലെയാണ് മുഖ്യമന്ത്രി മന്ത്രിയിൽനിന്ന് വിശദീകരണം തേടിയത്.

അതേസമയം, ഭരണഘടനയെ വിമർശിച്ചിട്ടില്ല, ഭരണകൂടത്തെയാണ് വിമർശിച്ചതെന്നാണ് മന്ത്രി നൽകിയ മറുപടിയെന്നാണ് വിവരം. പ്രസംഗം വിവാദമായതിന്റെ പശ്ചാത്തലത്തിൽ സംഭവത്തിൽ വിശദീകരണം നൽകാൻ മന്ത്രി സജി ചെറിയാൻ വൈകാതെ മാധ്യമങ്ങളെ കാണും.

ജനങ്ങളെ കൊള്ളയടിക്കാൻ സഹായിക്കുന്നതാണ് ഇന്ത്യയിലെ ഭരണഘടനയെന്നായിരുന്നു സജി ചെറിയാന്റെ പരാമർശം. ബ്രിട്ടീഷുകാരൻ പറഞ്ഞതാണ് ഇന്ത്യാക്കാർ എഴുതിവെച്ചതെന്നും സാധാരണക്കാരെ ചൂഷണം ചെയ്യുക എന്നതുമാത്രമാണ് ഇതിന്റെ ഉദ്ദേശ്യമെന്നും അദ്ദേഹം പറഞ്ഞിരുന്നു.

മന്ത്രിയുടെ പരാമർശം വിവാദമായതോടെ ഗവർണറും വിഷയത്തിൽ ഇടപെട്ടിട്ടുണ്ട്. പ്രസംഗത്തിന്റെ വീഡിയോ ഹാജരാക്കാൻ ഗവർണർ ചീഫ് സെക്രട്ടറിക്ക് നിർദേശം നൽകി. പ്രസംഗം പരിശോധിച്ചതിന് ശേഷം ഗൗരവതരമെങ്കിൽ ഗവർണർ രാഷ്ട്രപതിക്ക് റിപ്പോർട്ട് നൽകും.

 

LEAVE A REPLY

Please enter your comment!
Please enter your name here