വിദ്യാർത്ഥികളിൽ സാമ്പത്തിക അവബോധം വർധിപ്പിക്കുന്നതിനും ധനകാര്യ മേഖലയിലെ തൊഴിൽസാധ്യതകൾ മെച്ചപ്പെടുത്തുന്നതിനുമായി ഒഡിഷ ഉന്നത വിദ്യാഭ്യാസ വകുപ്പ്. ഇതിനായി സംസ്ഥാനത്തെ സർവകലാശാലകളിലും കോളേജുകളിലും ‘എൻഎസ്ഇ ബി.എഫ്.എസ്.ഐ സ്കിൽ പ്രോഗ്രാം’ നടപ്പാക്കും. ഓഹരി വിപണി, മ്യൂച്വൽ ഫണ്ടുകൾ, ബാങ്കിങ്, ഇൻഷുറൻസ്, സാമ്പത്തിക ഇടപാടുകൾ തുടങ്ങിയ വിഷയങ്ങളിൽ വിദ്യാർത്ഥികൾക്ക് സൗജന്യ പരിശീലനം നൽകുന്നതാണ് പദ്ധതി.
ഉന്നത വിദ്യാഭ്യാസ വകുപ്പ് പുറത്തിറക്കിയ മാർഗനിർദേശപ്രകാരം, ബി.കോം, ബി.ബി.എ, ബി.എം.എസ്, ഇക്കണോമിക്സ്, കൊമേഴ്സ്, എം.ബി.എ, എം.കോം കോഴ്സുകളിലെ വിദ്യാർത്ഥികൾക്കാണ് പദ്ധതിയുടെ പ്രയോജനം ലഭിക്കുക. അർഹരായ വിദ്യാർത്ഥികൾക്ക് മ്യൂച്വൽ ഫണ്ടുകളെക്കുറിച്ചുള്ള 30 മണിക്കൂർ ദൈർഘ്യമുള്ള പ്രൊഫഷണൽ സർട്ടിഫിക്കറ്റ് കോഴ്സും സൗജന്യമായി നൽകും.
നാഷണൽ സ്കിൽ ഡെവലപ്മെന്റ് മിഷന്റെ ഭാഗമായി നാഷണൽ സ്റ്റോക്ക് എക്സ്ചേഞ്ച് ഓഫ് ഇന്ത്യ ലിമിറ്റഡുമായി (NSEIL) സഹകരിച്ചാണ് പദ്ധതി നടപ്പാക്കുന്നത്. സാമ്പത്തിക വിപണികളെക്കുറിച്ചുള്ള പ്രായോഗിക അറിവ് വിദ്യാർത്ഥികൾക്ക് പകർന്നുനൽകുന്നതിനൊപ്പം ബാങ്കിങ്, ധനകാര്യം, ഇൻഷുറൻസ്, നിക്ഷേപ സേവനങ്ങൾ തുടങ്ങിയ മേഖലകളിലെ തൊഴിൽസാധ്യതകൾ വർധിപ്പിക്കുകയുമാണ് പദ്ധതിയുടെ ലക്ഷ്യം.
പ്രധാന നഗരങ്ങളുടെ 100 കിലോമീറ്റർ പരിധിയിലുള്ള 97 തിരഞ്ഞെടുത്ത കോളേജുകളിലും സർവകലാശാലകളിലും പദ്ധതി ഘട്ടംഘട്ടമായി നടപ്പാക്കും.ഭുവനേശ്വർ, ബെർഹാംപൂർ, ഭദ്രക്, ധെങ്കനാൽ, ജയ്പൂർ, കേന്ദ്രപാറ, കിയോഞ്ജർ, റൂർക്കേല, സംബൽപൂർ എന്നിവയുൾപ്പെടെയുള്ള നഗരങ്ങളാണ് ആദ്യം വരിക.
പദ്ധതിയുടെ കാര്യക്ഷമമായ നടത്തിപ്പ് ഉറപ്പാക്കുന്നതിനായി പങ്കെടുക്കുന്ന ഓരോ സർവകലാശാലയും കോളേജും ഓരോ നോഡൽ ഓഫീസറെ നിയമിക്കണമെന്ന് വകുപ്പ് നിർദേശിച്ചിട്ടുണ്ട്. കൊമേഴ്സ്, മാനേജ്മെന്റ്, ഇക്കണോമിക്സ് വിഭാഗങ്ങളിലെ അധ്യാപകരിൽ ഒരാളെ ഇതിനായി നിയോഗിക്കുന്നതാണ് ഉചിതമെന്നും നിർദേശത്തിൽ വ്യക്തമാക്കുന്നു.
2026 ജൂലൈ 15-ന് ഉന്നത വിദ്യാഭ്യാസ വകുപ്പ് പദ്ധതിയുമായി ബന്ധപ്പെട്ട മാർഗനിർദേശങ്ങൾ പുറത്തിറക്കിയിരുന്നു. തിരഞ്ഞെടുത്ത വിദ്യാഭ്യാസ സ്ഥാപനങ്ങളിൽ പദ്ധതി എത്രയും വേഗം നടപ്പാക്കുന്നതിനുള്ള നടപടികൾ സ്വീകരിക്കാൻ വൈസ് ചാൻസലർമാർക്കും കോളേജ് പ്രിൻസിപ്പൽമാർക്കും വകുപ്പ് നിർദേശം നൽകിയിട്ടുണ്ട്.
