കഴിഞ്ഞ ദിവസമാണ് സംസ്ഥാന സർക്കാരിന്റെ ദീർഘകാലമായുള്ള ആവശ്യം പരിഗണിച്ച് കൊണ്ട് കേരളത്തിന്റെ പേര് ‘കേരളം’ എന്നാക്കി മാറ്റുന്നതിന് കേന്ദ്ര മന്ത്രിസഭ അംഗീകാരം നൽകിയത്. കേരള നിയമസഭ 2023 ഓഗസ്റ്റിലും 2024 ജൂണിലും ഏകകണ്ഠമായി പാസാക്കിയ പ്രമേയങ്ങളെ തുടർന്നാണിത്. കേരളം ഉടൻ ഔദ്യോഗികമായി ‘കേരളം’ ആയി മാറുമെങ്കിലും, പതിറ്റാണ്ടുകളായി പേരുമാറ്റത്തിന് ശ്രമിക്കുന്ന പശ്ചിമ ബംഗാൾ ഇപ്പോഴും കാത്തിരിപ്പിലാണ്.
സംസ്ഥാനത്തിന്റെ പേര് ‘ബംഗ്ലാ’ എന്നാക്കാനുള്ള നിർദ്ദേശം ഒന്നിലധികം നിയമസഭാ പ്രമേയങ്ങളിലൂടെ അവതരിപ്പിച്ചിട്ടും ഇപ്പോഴും കേന്ദ്രത്തിന്റെ പരിഗണനയിലാണ്. നേരത്തെ ‘പശ്ചിം ബംഗോ’ അല്ലെങ്കിൽ ‘ബംഗോ’ തുടങ്ങിയ പേരുകളും സംസ്ഥാന സർക്കാർ നിർദ്ദേശിച്ചിരുന്നു. എന്നാൽ 2018-ലെ ‘ബംഗ്ലാ’ എന്ന പേരടക്കം സംസ്ഥാനം സമർപ്പിച്ച ഒരു നിർദ്ദേശവും ഇതുവരെ കേന്ദ്രം അംഗീകരിച്ചിട്ടില്ല.
കേരളത്തിന്റെ പേരുമാറ്റത്തിന് അംഗീകാരം നൽകിയതിനോട് പ്രതികരിച്ച പശ്ചിമ ബംഗാൾ മുഖ്യമന്ത്രി മമത ബാനർജി, ഞങ്ങൾക്ക് ഒരു സംസ്ഥാനത്തോടും വിരോധമില്ലെന്നും ബിജെപിയും സിപിഎമ്മും തമ്മിലുള്ള ധാരണയുള്ളതിനാലാണ് കേരളത്തിന്റെ നിർദ്ദേശം അംഗീകരിക്കപ്പെട്ടതെന്നും വ്യക്തമാക്കി. എല്ലാ കാലത്തും ബിജെപി തന്നെ അധികാരത്തിലുണ്ടാകില്ലെന്നും ഒരു കാലത്ത് തങ്ങൾക്ക് തങ്ങളുടെ പേര് ലഭിക്കുമെന്നും അതിനായുള്ള ശ്രമങ്ങൾ സംസ്ഥാന സർക്കാർ ഇനിയും തുടരുമെന്നും മമത പറഞ്ഞു.
പശ്ചിമ ബംഗാളിന്റെ പേരുമാറ്റ നിർദ്ദേശങ്ങളും കേന്ദ്ര നിലപാടും
1999-ൽ ജ്യോതി ബസുവിന്റെ നേതൃത്വത്തിലുള്ള ഇടതുമുന്നണി സർക്കാരാണ് പശ്ചിമ ബംഗാളിന്റെ പേര് ‘പശ്ചിം ബംഗ്ലാ’ എന്നോ ‘ബംഗ്ലാ’ എന്നോ മാറ്റാൻ ആദ്യം നിർദ്ദേശിച്ചത്. പിന്നീട് 2011-ൽ മമത ബാനർജി അധികാരത്തിൽ വന്നപ്പോൾ ഇംഗ്ലീഷിലും ബംഗ്ലായിലും ‘പശ്ചിം ബംഗ’ എന്ന് മാറ്റാൻ നിർദ്ദേശിച്ചെങ്കിലും കേന്ദ്രം അത് നിരസിച്ചു.
2016-ൽ മമത സർക്കാർ മൂന്നു പേരുകളാണ് നിർദ്ദേശിച്ചത്; ഇംഗ്ലീഷിൽ ബംഗാൾ, ബംഗ്ലായിൽ ‘ബംഗ്ലാ’, ഹിന്ദിയിൽ ‘ബംഗാൾ’ എന്നിങ്ങനെ. എന്നാൽ മൂന്ന് ഭാഷകളിൽ മൂന്ന് പേരുകൾ നൽകുന്നത് അംഗീകരിക്കില്ലെന്ന് അറിയിച്ച കേന്ദ്രം, സംസ്ഥാനത്തിന് ഒരൊറ്റ പേര് മാത്രമേ സ്വീകരിക്കാൻ കഴിയൂ എന്ന് വ്യക്തമാക്കി. തുടർന്ന് 2018-ൽ ‘ബംഗ്ലാ’ എന്ന ഏകീകൃത പേര് നിയമസഭ പാസാക്കിയെങ്കിലും അക്ഷരമാലാ ക്രമത്തിൽ മുന്നിലെത്താനുള്ള രാഷ്ട്രീയ തന്ത്രമാണിതെന്ന് പറഞ്ഞ് കേന്ദ്രം വീണ്ടും തടഞ്ഞു.
വിദേശകാര്യ വകുപ്പിന്റെ എതിർപ്പ്
‘ബംഗ്ലാ’ എന്ന പേരിന് അയൽരാജ്യമായ ബംഗ്ലാദേശിന്റെ പേരുമായി സാമ്യമുള്ളതിനാൽ അന്താരാഷ്ട്ര വേദികളിൽ ഇത് ആശയക്കുഴപ്പമുണ്ടാക്കുമെന്ന് വിദേശകാര്യ മന്ത്രാലയം എതിർപ്പ് ഉന്നയിച്ചതായി ദി ഹിന്ദു റിപ്പോർട്ട് ചെയ്തിരുന്നു. 2016 ലെ നിർദ്ദേശത്തിലും വിദേശകാര്യ മന്ത്രാലയം സമാനമായ ആശങ്കകൾ ഉന്നയിച്ചതായി 2017 ൽ ദി ന്യൂ ഇന്ത്യൻ എക്സ്പ്രസ് റിപ്പോർട്ട് ചെയ്തിരുന്നു.
2023 ഓഗസ്റ്റിൽ മുഖ്യമന്ത്രി പിണറായി വിജയൻ അവതരിപ്പിച്ച പ്രമേയം നിയമസഭ ഏകകണ്ഠമായി പാസാക്കിയതോടെയാണ് ഈ നടപടികൾക്ക് തുടക്കമായത്. സംസ്ഥാനത്തിന്റെ പേര് മലയാളത്തിൽ കേരളം എന്നാണ്. ഭരണഘടനയുടെ ഒന്നാം പട്ടികയിൽ കേരളം എന്നാണ് രേഖപ്പെടുത്തിയിരിക്കുന്നത്. ഭരണഘടനയുടെ ആർട്ടിക്കിൾ 3 പ്രകാരം പേര് മാറ്റാൻ അടിയന്തര നടപടികൾ ആവശ്യമാണെന്ന് മുഖ്യമന്ത്രി 2023-ൽ വ്യക്തമാക്കിയിരുന്നു.
പേരുമാറ്റത്തിനുള്ള നടപടിക്രമങ്ങൾ
കേരളത്തിന്റെ പേരുമാറ്റത്തിന് ഇനിയും നടപടിക്രമങ്ങൾ ബാക്കിയുണ്ട്. രാഷ്ട്രപതി ഈ ബില്ല് കേരള നിയമസഭയ്ക്ക് അയച്ച് അഭിപ്രായം തേടിയ ശേഷം, ഭരണഘടനയുടെ ഒന്നാം പട്ടികയിൽ ഭേദഗതി വരുത്താനായി പാർലമെന്റിൽ ബില്ല് അവതരിപ്പിക്കാൻ രാഷ്ട്രപതി അനുമതി നൽകും. പാർലമെന്റിന്റെ ഇരുസഭകളും ഈ ബില്ല് പാസാക്കണം. തുടർന്ന് രാഷ്ട്രപതിയുടെ അനുമതി കൂടി ലഭിച്ചാൽ ഗസറ്റിൽ വിജ്ഞാപനം വരികയും പേരുമാറ്റം ഔദ്യോഗികമാവുകയും ചെയ്യും.
കേരളത്തിന്റെ പേരുമാറ്റത്തിന് അംഗീകാരം ലഭിച്ചെങ്കിലും പശ്ചിമ ബംഗാളിന് ഇനിയും കാത്തിരിക്കേണ്ടി വരും. രാഷ്ട്രീയ ആരോപണങ്ങൾ കൂടി ഉന്നയിക്കുന്നതോടെ വിഷയത്തെ വീണ്ടും ദേശീയ ശ്രദ്ധയിലേക്ക് കൊണ്ടുവരാനാണ് മമത ശ്രമിക്കുന്നത്.
