ഭക്ഷണത്തിന്റെ ഗുണനിലവാരം ഉറപ്പാക്കാൻ ‘ഇ-മൂക്ക്’, ‘ഇ-നാക്ക്’ മെഷീനുകൾ;

ഇ–നോസ് (E-Nose – Electronic Nose), ഇ–ടങ് (E-Tongue – Electronic Tongue)  എന്നിവ ഭക്ഷണപാനീയങ്ങളുടെ ഗുണനിലവാരം, മണം, രുചി എന്നിവ തിരിച്ചറിയാൻ ഉപയോഗിക്കുന്ന അത്യാധുനിക സെൻസർ സാങ്കേതികവിദ്യകളാണ്. മനുഷ്യന്റെ മണം പിടിക്കാനുള്ള കഴിവിനെ ഇ-നോസും, രുചി തിരിച്ചറിയാനുള്ള കഴിവിനെ ഇ-ടങും അനുകരിക്കുന്നു. ഇവ ഭക്ഷണ വ്യവസായത്തിൽ മലിനീകരണം കണ്ടെത്താനും കൃത്യമായ ഗുണനിലവാരം ഉറപ്പാക്കാനും സഹായിക്കുന്നു

ഇ–നോസ് (E-Nose – Electronic Nose)

• പ്രവർത്തനം:ഗന്ധങ്ങൾ (ഗ്യാസ് അല്ലെങ്കിൽ വോളറ്റൈൽ ഓർഗാനിക് സംയുക്തങ്ങൾ) തിരിച്ചറിയുന്ന സെൻസറുകൾ ഉപയോഗിക്കുന്നു.
• ഉപയോഗം:ഭക്ഷണത്തിലെ അഴുകൽ, വായുവിന്റെ ഗുണനിലവാരം, സുഗന്ധവ്യഞ്ജനങ്ങളുടെ തനിമ, സ്‌ഫോടകവസ്തുക്കൾ കണ്ടെത്തൽ എന്നിവയ്ക്കായി ഉപയോഗിക്കുന്നു.

ഇ–ടങ് (E-Tongue – Electronic Tongue)

• പ്രവർത്തനം:ദ്രാവകങ്ങളിലെ രാസ ഘടകങ്ങൾ വിശകലനം ചെയ്ത് രുചി (മധുരം, കയ്പ്പ്, പുളിപ്പ് തുടങ്ങിയവ) തിരിച്ചറിയുന്നു.
• ഉപയോഗം:പാനീയങ്ങൾ, പാലും പാലുൽപ്പന്നങ്ങളും, നെയ്യ് തുടങ്ങിയവയുടെ ഗുണനിലവാരം പരിശോധിക്കാൻ ഉപയോഗിക്കുന്നു.

പ്രധാന നേട്ടങ്ങൾ:

• കൃത്യത:മനുഷ്യർക്ക് തിരിച്ചറിയാൻ കഴിയാത്ത ചെറിയ വ്യത്യാസങ്ങൾ പോലും കണ്ടെത്തുന്നു (ഉദാഹരണത്തിന് തിരുപ്പതി പ്രസാദത്തിലെ നെയ്യ് പരിശോധന).
• വേഗത:വേഗത്തിലുള്ള വിശകലനം.
• സുരക്ഷ:ഭക്ഷ്യവസ്തുക്കളിലെ മാലിന്യങ്ങൾ, കീടനാശിനികൾ, ഭക്ഷ്യ സുരക്ഷ, മരുന്ന് നിർമ്മാണം, പരിസ്ഥിതി നിരീക്ഷണം, കൃഷി എന്നീ മേഖലകളിൽ ഈ സാങ്കേതികവിദ്യ വിപ്ലവാത്മകമായ മാറ്റങ്ങൾ കൊണ്ടുവരുന്നു.

തിരുപ്പതി തിരുമല ക്ഷേത്രത്തിലെ പ്രസാദത്തിന്റെയും ഭക്തർക്ക് നൽകുന്ന ഭക്ഷണത്തിന്റെയും ഗുണനിലവാരം ഉറപ്പാക്കാൻ അത്യാധുനിക ഭക്ഷ്യ പരിശോധനാ ലാബ് ഉടൻ സജ്ജമാകും. ആന്ധ്രാപ്രദേശ് സർക്കാരും ഫുഡ് സേഫ്റ്റി ആൻഡ് സ്റ്റാൻഡേർഡ് അതോറിറ്റി ഓഫ് ഇന്ത്യയും (FSSAI) ചേർന്നാണ് 25 കോടി രൂപ ചെലവിൽ ഈ ലാബ് സ്ഥാപിക്കുന്നത്.

ഫ്രാൻസിൽ നിന്ന് 3.5 കോടി രൂപ ചെലവഴിച്ചാണ് ഇ-മൂക്ക്, ഇ-നാക്ക് (ഇ-ടങ്, ഇ-നോസ്) മെഷീനുകൾ ഇറക്കുമതി ചെയ്യുന്നത്. നെയ്യിന്റെ ഗുണനിലവാരത്തിലുണ്ടാകുന്ന ഏറ്റവും ചെറിയ മാറ്റങ്ങൾ പോലും ഈ യന്ത്രങ്ങൾ ഉപയോഗിച്ച് കണ്ടെത്താനാകും. നെയ്യ്, കശുവണ്ടി, ഏലക്ക, പഞ്ചസാര ഉൾപ്പെടെ പ്രസാദനിർമാണത്തിന് ഉപയോഗിക്കുന്ന 60-ഓളം അസംസ്‌കൃത വസ്തുക്കൾ ഇവിടെ പരിശോധിക്കും. കൂടാതെ ഭക്ഷണത്തിലെ കീടനാശിനികൾ, ലോഹങ്ങൾ, ആന്റിബയോട്ടിക് അംശങ്ങൾ എന്നിവ കണ്ടെത്താൻ കഴിയുന്ന 50-ഓളം ആധുനിക ഉപകരണങ്ങളും ലാബിലുണ്ടാകും.