അർജുൻ ടെണ്ടുൽക്കർ വിവാഹിതനാകുന്നു

ഇന്ത്യൻ ക്രിക്കറ്റ് ഇതിഹാസം സച്ചിൻ ടെണ്ടുൽക്കറിൻ്റെ മകൻ അർജുൻ ടെണ്ടുൽക്കർ വിവാഹിതനാകുന്നു. പ്രമുഖ വ്യവസായി രവി ഘായുടെ കൊച്ചുമകളായ സാനിയ ചന്ദോക് ആണ് വധു. ചൊവ്വാഴ്ച പ്രധാനമന്ത്രി നരേന്ദ്ര മോദിയെ സന്ദർശിച്ച സച്ചിൻ ടെണ്ടുൽക്കർ വിവാഹത്തിന് നേരിട്ട് ക്ഷണിച്ചു.

മകൻ്റെ വിവാഹത്തിന് പ്രധാനമന്ത്രിയെ ക്ഷണിക്കാൻ കഴിഞ്ഞത് വലിയ ബഹുമതിയായി കാണുന്നുവെന്ന് സച്ചിൻ സോഷ്യൽ മീഡിയയിൽ കുറിച്ചു. യുവദമ്പതികൾക്കായി പ്രധാനമന്ത്രി നൽകിയ വിലപ്പെട്ട നിർദ്ദേശങ്ങൾക്കും അനുഗ്രഹങ്ങൾക്കും സച്ചിൻ നന്ദി രേഖപ്പെടുത്തി.

പ്രധാനമന്ത്രിക്ക് പുറമെ പ്രതിപക്ഷ നേതാവ് രാഹുൽ ഗാന്ധിയെയും സച്ചിൻ ടെണ്ടുൽക്കർ വിവാഹത്തിന് ക്ഷണിച്ചിട്ടുണ്ട്. രാഹുൽ ഗാന്ധിയുമായുള്ള കൂടിക്കാഴ്ചയുടെ ചിത്രങ്ങൾ സച്ചിൻ പങ്കുവെച്ചു.

തങ്ങളുടെ കുടുംബത്തിന് രാഹുൽ ഗാന്ധിയെ നേരിട്ട് കാണാനും അർജുൻ-സാനിയ വിവാഹത്തിന് ക്ഷണിക്കാനും അവസരം ലഭിച്ചുവെന്നും അദ്ദേഹം നൽകിയ സ്നേഹത്തിനും സ്വീകരണത്തിനും നന്ദി പറയുന്നുവെന്നും സച്ചിൻ കുറിച്ചു. മുംബൈയിലെ പ്രമുഖ വ്യവസായ കുടുംബങ്ങളിലൊന്നായാണ് സാനിയയുടെ കുടുംബം അറിയപ്പെടുന്നത്.

മുംബൈയിലെ അറിയപ്പെടുന്ന ബിസിനസ് കുടുംബത്തിൽ നിന്നുള്ള വ്യക്തിയാണ് സാനിയ ചന്ദോക്. സാനിയയുടെ മുത്തച്ഛൻ പ്രശസ്തമായ ഗ്രേവിസ് ഗ്രൂപ്പിന്റെ തലവനാണ്.

ലോകപ്രശസ്ത ഐസ്ക്രീം ബ്രാൻഡുകളായ ദ ബ്രൂക്ലിൻ ക്രീമറി (The Brooklyn Creamery), ബാസ്കിൻ-റോബിൻസ് (Baskin-Robbins) എന്നിവയുടെ ഉത്തരവാദിത്തം ഈ ഗ്രൂപ്പിനാണ്. കോർപ്പറേറ്റ് കാര്യ മന്ത്രാലയത്തിന്റെ രേഖകൾ പ്രകാരം സാനിയ നിലവിൽ മുംബൈയിലെ ‘മിസ്റ്റർ പോസ് പെറ്റ് സ്പാ ആൻഡ് സ്റ്റോർ’ (Mr. Paws Pet Spa and Store LLP) എന്ന സ്ഥാപനത്തിന്റെ ഡയറക്ടറും പാർട്ണറുമാണ്.

ഇടങ്കയ്യൻ ഫാസ്റ്റ് ബൗളറായാണ് അർജുൻ ടെണ്ടുൽക്കർ തന്റെ ക്രിക്കറ്റ് കരിയർ വളർത്തിയെടുത്തത്. ആഭ്യന്തര ക്രിക്കറ്റിൽ ഗോവയെ പ്രതിനിധീകരിക്കുന്ന അർജുൻ മുൻപ് ഐപിഎല്ലിൽ മുംബൈ ഇന്ത്യൻസിന് വേണ്ടി കളിച്ചിട്ടുണ്ട്. നിലവിൽ 22 ഫസ്റ്റ് ക്ലാസ് മത്സരങ്ങളിൽ നിന്നായി 48 വിക്കറ്റുകളും 620 റൺസും അർജുൻ നേടിയിട്ടുണ്ട്. ലിസ്റ്റ് എ ക്രിക്കറ്റിൽ 23 മത്സരങ്ങളിൽ നിന്ന് 25 വിക്കറ്റുകളും 155 റൺസുമാണ് സമ്പാദ്യം.

ഐപിഎൽ 2026 സീസണിന് മുന്നോടിയായുള്ള മെഗാ ലേലത്തിന് മുൻപ് അർജുൻ ടെണ്ടുൽക്കറെ മുംബൈ ഇന്ത്യൻസ് ലഖ്നൗ സൂപ്പർ ജയന്റ്സിലേക്ക് ട്രേഡ് ചെയ്തിരുന്നു. മുൻ ഇന്ത്യൻ താരം യോഗരാജ് സിംഗ് ഉൾപ്പെടെയുള്ളവർ അർജുന്റെ പ്രകടനത്തെയും കഴിവിനെയും അഭിനന്ദിച്ചിട്ടുണ്ട്.

പിതാവിനെപ്പോലെ ബാറ്റിംഗിൽ മികച്ച പ്രകടനം കാഴ്ചവെക്കാൻ അർജുന് സാധിക്കുമെന്നും കൂടുതൽ അവസരങ്ങൾ ലഭിക്കുകയാണ് വേണ്ടതെന്നും അദ്ദേഹം പറഞ്ഞിരുന്നു. വിവാഹനിശ്ചയം കഴിഞ്ഞതോടെ അർജുന്റെ ക്രിക്കറ്റ് ജീവിതത്തിനൊപ്പം പുതിയൊരു വ്യക്തിജീവിതത്തിനും തുടക്കമാവുകയാണ്.