ആലപ്പുഴ: ഇടവേളയ്ക്ക് ശേഷം ആലപ്പുഴ, കോട്ടയം ജില്ലകളിൽ പക്ഷിപ്പനി (Bird Flu) സ്ഥിരീകരിച്ചു. ആലപ്പുഴ ജില്ലയിൽ എട്ട് പഞ്ചായത്തുകളിലായി ഓരോ വാർഡിലും, കോട്ടയം ജില്ലയിൽ നാല് വാർഡുകളിലുമാണ് രോഗബാധ കണ്ടെത്തിയത്.
ഭോപ്പാലിലെ ലാബിൽ നടത്തിയ സാംപിൾ പരിശോധനയിലാണ് പക്ഷിപ്പനി സ്ഥിരീകരിച്ചതെന്ന് അധികൃതർ അറിയിച്ചു.
ആലപ്പുഴ ജില്ലയിൽ നെടുമുടി, ചെറുതന, കരുവാറ്റ, കാർത്തികപ്പള്ളി, അമ്പലപ്പുഴ തെക്ക്, പുന്നപ്ര തെക്ക്, തകഴി, പുറക്കാട് എന്നീ പഞ്ചായത്തുകളിലാണ് രോഗബാധ.
നെടുമുടിയിൽ കോഴികളിലാണ് രോഗം സ്ഥിരീകരിച്ചതെങ്കിൽ മറ്റ് പ്രദേശങ്ങളിൽ താറാവുകളിലാണ് വൈറസ് ബാധ കണ്ടെത്തിയത്.
കോട്ടയം ജില്ലയിൽ കുറുപ്പന്തറ, മാഞ്ഞൂർ, കല്ലുപുരയ്ക്കൽ, വേളൂർ എന്നീ വാർഡുകളിലാണ് പക്ഷിപ്പനി റിപ്പോർട്ട് ചെയ്തത്. കാട, കോഴി തുടങ്ങിയ പക്ഷികളിലാണ് രോഗം സ്ഥിരീകരിച്ചത്.
പരിശോധനാ ഫലങ്ങൾ മൃഗസംരക്ഷണ വകുപ്പിന് കൈമാറിയതായും, ഇതിന്റെ അടിസ്ഥാനത്തിൽ നിയന്ത്രണ നടപടികൾ ശക്തമാക്കാൻ അടിയന്തര നിർദ്ദേശങ്ങൾ നൽകിയതായും അധികൃതർ അറിയിച്ചു.
