മഹാരാഷ്ട്രയിലെ റായ്ഗഡ് ജില്ലയിലെ ഇർഷൽവാഡി ഗ്രാമത്തിലുണ്ടായ മണ്ണിടിച്ചിലിൽ 25 പേർ മരിച്ചു. 86 പേരെ കണ്ടെത്താനുണ്ടെന്ന് അധികൃതർ അറിയിച്ചു. രക്ഷാപ്രവർത്തനം മൂന്നാം ദിവസം പുനരാരംഭിച്ചു. മുംബൈയിൽ നിന്ന് 80 കിലോമീറ്റർ അകലെ, ഖലാപൂർ തഹസിലിനു താഴെ കുന്നിൻ ചെരുവിൽ സ്ഥിതി ചെയ്യുന്ന ആദിവാസി ഗ്രാമത്തിലാണ് മണ്ണിടിച്ചിലുണ്ടായത്.
മരണസംഖ്യ 16 ആയിരുന്നത് ശനിയാഴ്ച 25 ആയി ഉയർന്നു. മരിച്ചവരിൽ ഒമ്പത് പുരുഷന്മാരും സ്ത്രീകളും നാല് കുട്ടികളും ഉൾപ്പെടുന്നു. ദുരന്തത്തിൽ ഒരു കുടുംബത്തിലെ ഒമ്പത് പേർ മരിച്ചതായി അധികൃതർ അറിയിച്ചു. ദേശീയ ദുരന്ത നിവാരണ സേനയും (എൻ‌ഡി‌ആർ‌എഫും) മറ്റ് സർക്കാർ ഏജൻസികളും നിർത്തി വച്ച തിരച്ചിൽ പുനരാരംഭിച്ചു. കനത്ത മഴയെത്തുടർന്ന് വെള്ളിയാഴ്ച വൈകുന്നേരം 6 മണിയോടെ തിരച്ചിൽ നിർത്തിവച്ചിരുന്നു. നാലു എൻഡിആർഎഫ് ടീമുകളും മറ്റ് ഏജൻസികളും ഇന്ന് രാവിലെ പ്രവർത്തനം പുനരാരംഭിച്ചെന്ന് എൻഡിആർഎഫ് ഉദ്യോഗസ്ഥൻ പറഞ്ഞു. ഗ്രാമത്തിലെ 48 വീടുകളിൽ കുറഞ്ഞത് 17 എണ്ണം മണ്ണിടിച്ചിലിന്റെ അവശിഷ്ടങ്ങൾക്കിടയിൽ പൂർണ്ണമായും ഭാഗികമായും മണ്ണിനടിയിലായി.
റായ്ഗഡ് ജില്ലാ ദുരന്ത നിവാരണ ഓഫീസിന്റെ കണക്കനുസരിച്ച്, 229 ഗ്രാമവാസികളിൽ 25 പേർ മരിച്ചു. 10 പേർക്ക് പരിക്കേറ്റു. 111 പേർ സുരക്ഷിതരാണ്. 86 പേരെ ഇനിയും കണ്ടെത്താനുണ്ട്. വെള്ളിയാഴ്ച മൃതദേഹം പുറത്തെടുത്ത ആറ് പേരിൽ മൂന്ന് പുരുഷന്മാരും മൂന്ന് സ്ത്രീകളുമാണ്. ആറ് മാസം മുതൽ നാല് വയസ്സ് വരെ പ്രായമുള്ള നാല് കുട്ടികളും മരിച്ചവരിൽ ഉൾപ്പെടുന്നുവെന്ന് അധികൃതർ പറഞ്ഞു. സംഭവത്തിൽ മരിച്ച ഒരു കുടുംബത്തിലെ ഒമ്പത് അംഗങ്ങളിൽ മൂന്ന് വയസുള്ള ആൺകുട്ടിയും ആറ് മാസം പ്രായമുള്ള പെൺകുട്ടിയും ഉൾപ്പെടുന്നു.
സംഭവത്തിൽ മൂന്ന് കന്നുകാലികളും ചത്തു. 21 മൃഗങ്ങളെ രക്ഷപ്പെടുത്തി. കുന്നിൻ ചുവട്ടിൽ നിന്ന് ഏകദേശം ഒന്നര മണിക്കൂർ കൊണ്ട് ഇർഷൽവാടിയിലെത്താം. പ്രശസ്തമായ ട്രെക്കിംഗ് കേന്ദ്രമാണ് ഇർഷൽഗഡ് കോട്ട. ഈ ഗ്രാമത്തിന് റോഡില്ലാത്തതിനാൽ മണ്ണ് നീക്കുന്ന യന്ത്രങ്ങളും എക്‌സ്‌കവേറ്ററുകളും എളുപ്പത്തിൽ നീക്കാൻ കഴിയില്ല. എങ്കിലും രക്ഷാപ്രവർത്തനങ്ങൾ നടക്കുന്നുണ്ടെന്ന് ഉദ്യോഗസ്ഥർ പറഞ്ഞു.
രക്ഷപ്പെട്ടവരോട് 60 ഓളം കണ്ടെയ്‌നറുകൾ ക്യാമ്പുകൾ ഉപയോഗിക്കാൻ അഭ്യർത്ഥിച്ചിട്ടുണ്ട്. അവയിൽ 40 എണ്ണം ഇതിനകം സ്ഥലത്ത് എത്തിയിട്ടുണ്ടെന്നും കൊങ്കൺ ഡിവിഷൻ ഡെപ്യൂട്ടി ഡയറക്ടർ ഓഫ് പബ്ലിസിറ്റി ഓഫീസ് പുറത്തിറക്കിയ പ്രസ്താവനയിൽ അറിയിച്ചു. കൂടാതെ, 20 താൽക്കാലിക കക്കൂസുകളും തുല്യമായ ബാത്ത്‌റൂമുകളും സ്ഥലത്ത് ഒരുക്കിയിട്ടുണ്ട്.
അതേസമയം, സംസ്ഥാനത്ത് ഉരുൾപൊട്ടൽ സാധ്യതയുള്ള എല്ലാ പ്രദേശങ്ങളിലെയും താമസക്കാരെ സുരക്ഷിത സ്ഥാനങ്ങളിലേക്ക് മാറ്റാൻ സർക്കാർ തീരുമാനിച്ചതായി മുഖ്യമന്ത്രി ഏകനാഥ് ഷിൻഡെ നിയമസഭയെ അറിയിച്ചു. എന്നാൽ ഉരുൾപൊട്ടൽ സാധ്യതയുള്ള പ്രദേശങ്ങളുടെ പട്ടികയിൽ ഇർഷൽവാഡി ഗ്രാമം ഇല്ലെന്നും അദ്ദേഹം പറഞ്ഞു. 2021 ജൂലൈ 22 ന് റായ്ഗഡ് ജില്ലയിലെ മഹദ് തഹസിൽ താലിയെ ഗ്രാമത്തിലുണ്ടായ മണ്ണിടിച്ചിലിൽ 87 പേർ മരിച്ചിരുന്നു.
