തന്റെ രാഷ്ട്രീയവും മതപരവുമായ കാഴ്ചപ്പാടുകളിൽ വ്യക്തതവരുത്തി ബോളിവുഡ് താരവും ബിജെപി എംപിയുമായ കങ്കണ റണാവത്ത്. മുൻപ് താനൊരു ‘മിതവാദിയായ ഹിന്ദു’ ആയിരുന്നുവെന്നും എന്നാൽ ഇപ്പോൾ ‘ഉണർന്ന ഹിന്ദു’ ആയി മാറിയെന്നും കങ്കണ റണാവത്ത് വ്യക്തമാക്കി.
തന്റെ ഔദ്യോഗിക ഇൻസ്റ്റാഗ്രാം അക്കൗണ്ടിലൂടെയാണ് കങ്കണ ഈ പ്രതികരണം പങ്കുവെച്ചത്. സമൂഹം, മതം, രാഷ്ട്രീയം എന്നിവയുമായി ബന്ധപ്പെട്ട വിഷയങ്ങളിൽ മുമ്പും ശക്തമായ നിലപാടുകൾ സ്വീകരിച്ചിട്ടുള്ള കങ്കണ, ഇത്തവണ തന്റെ വ്യക്തിപരമായ ആശയപരമായ മാറ്റത്തെക്കുറിച്ചാണ് തുറന്നുപറഞ്ഞത്.
“ഇതുവരെ ഞാൻ ഒരു മിതവാദിയായ ഹിന്ദുവായിരുന്നു. ഇനി ഞാൻ ഉണർന്ന ഹിന്ദുവാണ്,” എന്നായിരുന്നു കങ്കണയുടെ കുറിപ്പ്. ഈ പ്രസ്താവന സോഷ്യൽ മീഡിയയിൽ വ്യാപകമായ ചർച്ചകൾക്ക് വഴിവെച്ചിട്ടുണ്ട്. അനുകൂലിച്ചും വിമർശിച്ചും നിരവധി പ്രതികരണങ്ങളാണ് വിവിധ പ്ലാറ്റ്ഫോമുകളിൽ ഉയരുന്നത്.
നിലവിൽ ഹിമാചൽ പ്രദേശിലെ മണ്ടി മണ്ഡലത്തിൽ നിന്ന് ലോക്സഭാംഗമായ കങ്കണ, ദേശീയ രാഷ്ട്രീയ വിഷയങ്ങളിലും സാംസ്കാരിക വിഷയങ്ങളിലും തന്റെ അഭിപ്രായങ്ങൾ ശക്തമായി പ്രകടിപ്പിക്കുന്ന വ്യക്തിയാണ്. പുതിയ പ്രസ്താവനയും രാഷ്ട്രീയ-സാമൂഹിക തലങ്ങളിൽ ചർച്ചയാകുകയാണ്.
