രാജ്യത്തെ പൊതു-സ്വകാര്യ മേഖലകളിലെ ജീവനക്കാർക്ക് വർഷം മുഴുവനും തുല്യ എണ്ണം അവധികൾ ഉറപ്പാക്കുന്ന ഏകീകൃത അവധി നയം യുഎഇ നടപ്പാക്കിയിട്ടുണ്ട്.
ദുബായ്: യുഎഇ ദേശീയ ദിനാഘോഷത്തോടനുബന്ധിച്ച് സ്വകാര്യ മേഖലയിലെ ജീവനക്കാർക്കും അവധി പ്രഖ്യാപിച്ചു. സർക്കാർ മേഖലയ്ക്ക് പിന്നാലെയാണ് സ്വകാര്യ മേഖല ജീവനക്കാർക്കും നാല് ദിവസത്തെ അവധി ലഭ്യമായത്. ഡിസംബർ 1, 2 തീയതികളിലാണ് ശമ്പളത്തോടുകൂടിയുള്ള അവധി. ഫെഡറൽ അതോറിറ്റി ഫോർ ഗവൺമെൻ്റ് ഹ്യൂമൻ റിസോഴ്സസ് പൊതുമേഖലയ്ക്കും സമാനമായ അവധി പ്രഖ്യാപിച്ചതോടെ, വാരാന്ത്യവും ഉൾപ്പെടെ നാല് ദിവസത്തെ അവധി ലഭിക്കും.
മാനവ വിഭവശേഷി, സ്വദേശിവൽക്കരണ മന്ത്രാലയമാണ് അവധി പ്രഖ്യാപനം നടത്തിയത്. യുഎഇയുടെ സ്ഥാപകരെ ആദരിക്കാനും രാജ്യത്തിൻ്റെ നേട്ടങ്ങൾ അനുസ്മരിക്കാനുമുള്ള അവസരമാണ് ഈ ദിനമെന്ന് അധികൃതർ പറഞ്ഞു. ഡിസംബർ ഒന്ന്, തിങ്കളാഴ്ചയും രണ്ട്, ചൊവ്വാഴ്ചയുമാണ് ഈ പ്രഖ്യാപനങ്ങളോടെ, വാരാന്ത്യമായ ശനി, ഞായർ ദിവസങ്ങൾ കൂടി കണക്കിലെടുക്കുമ്പോൾ, പൊതു-സ്വകാര്യ മേഖലകളിലെ ജീവനക്കാർക്ക് നാല് ദിവസത്തെ നീണ്ട അവധി ലഭിക്കും.
യുഎഇയുടെ നേതാക്കൾക്കും പൗരന്മാർക്കും താമസക്കാർക്കും അധികൃതർ ദേശീയ ദിന ആശംസകൾ നേർന്നു. യൂണിയൻ ദിനം രാജ്യത്തിൻ്റെ സ്ഥാപകരെ ആദരിക്കാനും രാജ്യത്തിൻ്റെ നേട്ടങ്ങളെക്കുറിച്ച് ചിന്തിക്കാനുമുള്ള ഒരു സുപ്രധാന നിമിഷമാണ്. ഷാർജയിൽ അഞ്ച് ദിവസത്തെ ദേശീയ ദിന അവധി പ്രഖ്യാപിച്ചിട്ടുണ്ട്.
ഈദ് അൽ ഇത്തിഹാദ് വാരാന്ത്യത്തിൽ അബുദാബി, ദുബായ്, മറ്റ് എമിറേറ്റുകൾ എന്നിവിടങ്ങളിൽ പ്രത്യേക പരിപാടികളും ആഘോഷങ്ങളും ഉണ്ടാകും. സാംസ്കാരിക പ്രദർശനങ്ങൾ, പൈതൃക പരേഡുകൾ, കുടുംബ വിനോദങ്ങൾ, വൈവിധ്യമാർന്ന പാചക വിഭവങ്ങൾ എന്നിവ ഉൾപ്പെടെയുള്ള ആഘോഷങ്ങളാൽ നഗരങ്ങൾ നിറയും.
ദുബായിൽ, എമിറാത്തി സൂപ്പർ സ്റ്റാർ ബൽഖീസിൻ്റെ ലൈവ് കൺസേർട്ടുകൾ, കോമഡി ഷോകൾ, തിയേറ്റർ പ്രൊഡക്ഷനുകൾ, കായിക മത്സരങ്ങൾ, ഒപ്പം ആകാശത്ത് വർണവിസ്മയം തീർക്കുന്ന കരിമരുന്ന് പ്രയോഗങ്ങൾ എന്നിവയും താമസക്കാർക്ക് ആസ്വദിക്കാൻ കഴിയും.
