‘ഗോരെഹബ്ബ ഉത്സവം’ (Gorehabba festival)

തമിഴ്‌നാട്-കർണാടക അതിർത്തിയിലുള്ള തലവാടി മലനിരകളിൽ പരസ്പരം ചാണകം ( “ഗോരെഹബ്ബ” )എറിഞ്ഞുള്ള ഒരു വിചിത്ര ഉത്സവം അരങ്ങേറി. തമിഴ്‌നാട്ടിൽ നിന്നും കർണാടകയിൽ നിന്നുമായി ആയിരത്തിലധികം ആളുകളാണ് ഈ ആഘോഷത്തിൽ പങ്കെടുത്തത്. നൂറ് വർഷത്തിലധികം പഴക്കമുള്ള ഈ ഗോരെഹബ്ബ ഉത്സവത്തിൽ ആളുകൾ പരസ്പരം ചാണക(Cow Dung)മാണ്  എറിഞ്ഞു കളിക്കുന്നത്. ദീപാവലി(Diwali) ഉത്സവത്തിന്റെ സമാപനത്തോടനുബന്ധിച്ച് ആണ് ഗോരെഹബ്ബ ഉത്സവ ആഘോഷം നടക്കുന്നത്.

ഈറോഡ് ജില്ലയിലെ സത്യമംഗലം അടുത്തുള്ള തലവാടി മലനിരകളിലെ കുമ്തപുരം ഗ്രാമത്തിൽ 300 വർഷം പഴക്കമുള്ള പീരേശ്വരർ ക്ഷേത്രം സ്ഥിതിചെയ്യുന്നുണ്ട്.എല്ലാ വർഷവും ദീപാവലി ആഘോഷത്തിന് ശേഷമുള്ള മൂന്നാം ദിവസമാണ് ഈ ക്ഷേത്രത്തിൽ ചാണകമേറ് ഉത്സവം നടക്കാറ്. അതനുസരിച്ച് ഇക്കൊല്ലത്തെ ഉത്സവം ഇന്ന് പ്രത്യേക പൂജകളോടെ ആരംഭിച്ചു. ഇതിനായി ഗ്രാമത്തിലെ മുഴുവൻ ചാണകവും ശേഖരിച്ച് ക്ഷേത്രത്തിന്റെ പിന്നിൽ കൂട്ടിയിട്ടു. വൈകുന്നേരം അടുത്തുള്ള കുളത്തിൽ നിന്ന് സ്വാമിയെ ക്ഷണിക്കുന്ന ചടങ്ങ് നടന്നു.

ഗ്രാമത്തിലെ മുതിർന്നവരുടെ സാന്നിധ്യത്തിൽ നടന്ന ഈ ചടങ്ങിൽ, പുല്ലുകൊണ്ട് മീശ വെച്ച് അലങ്കരിച്ച ഒരാളെ കഴുതയുടെ മുകളിൽ ഇരുത്തി തറൈ തപ്പത്തുകളുടെ അകമ്പടിയോടെ ഘോഷയാത്രയായി സ്വാമി ക്ഷേത്രത്തിലേക്ക് കൊണ്ടുവന്നു. തുടർന്ന് ക്ഷേത്രത്തിലെ ശ്രീകോവിലിൽ അലങ്കരിച്ച പീരേശ്വരറിന് പൂജകൾ നടന്ന ശേഷം, ക്ഷേത്രത്തിന് പിന്നിൽ കൂട്ടിയിട്ടിരുന്ന ചാണകം ഉപയോഗിച്ച് 200-ൽ അധികം കുട്ടികളും യുവാക്കളും ചാണക ഉരുളകളുണ്ടാക്കി പരസ്പരം എറിഞ്ഞ് കളിച്ചു. ഏകദേശം 2 മണിക്കൂറോളം ചാണകമേറ് ചടങ്ങ് നീണ്ടു നിന്നു. അതിനുശേഷം എല്ലാവരും കുളത്തിൽ മുങ്ങിക്കുളിച്ച് പീരേശ്വരരെ ആരാധിക്കാൻ ക്ഷേത്രത്തിലേക്ക് പോവുകയായിരുന്നു.