ബാങ്ക് അക്കൗണ്ടുകളില് വന് ഇടപെടലുമായി സര്ക്കാര്. പണം ഇനി ബാങ്കുകളില് കെട്ടികിടക്കില്ല. നവംബര് 1 മുതല് പ്രാബല്യത്തില് വരുന്ന പുതിയ നോമിനേഷന് മാറ്റങ്ങള് അറിയൂ, മനസിലാകൂ…
ഒരോ മാസവും ഒരുപിടി മാറ്റങ്ങളുടേത് കൂടിയാണ്. ഇത്തരം മാറ്റങ്ങള് ബാങ്കുമായി ബന്ധപ്പെട്ടതാകുമ്പോള് പ്രധാന്യമേറും. 2025 ലെ ബാങ്കിംഗ് നിയമ ഭേദഗതി പ്രകാരം 2025 നവംബര് 1 മുതല് പ്രാബല്യത്തില് വരുമെന്ന് ധനകാര്യ മന്ത്രാലയം വ്യക്തമാക്കിയ ചില മാറ്റങ്ങളാണ് ഇനി പറയുന്നത്. ഈ മാറ്റങ്ങള് പ്രധാനമായും അക്കൗണ്ട് നോമിനേഷനുമായി ബന്ധപ്പെട്ടിരിക്കുന്നു.
മാറ്റങ്ങള് എന്തെല്ലാം?
നിക്ഷേപ അക്കൗണ്ടുകള്, സുരക്ഷിതമായി സൂക്ഷിക്കുന്ന വസ്തുക്കള്, ബാങ്കുകളില് സൂക്ഷിക്കുന്ന സുരക്ഷാ ലോക്കറുകളുടെ ഉള്ളടക്കം എന്നിവയുമായി ബന്ധപ്പെട്ട നാമനിര്ദ്ദേശ സൗകര്യങ്ങളിലാണ്് (നോമിനേഷന്) മാറ്റങ്ങള് വരുന്നത്. 2025 ഏപ്രില് 15 -ന് വിജ്ഞാപനം ചെയ്ത ഈ പരിഷ്കാരങ്ങളില് പ്രധാനമായും അഞ്ച് നിയമനിര്മ്മാണങ്ങളിലായി ആകെ 19 ഭേദഗതികള് ഉള്പ്പെടുന്നു.
ഒന്നിലധികം നോമിനേഷനുകള്
ഇനി മുതല് ഉപയോക്താക്കള്ക്ക് അവുടെ ബാങ്ക് സേവനങ്ങളില് ഒരേസമയം അല്ലെങ്കില് തുടര്ച്ചയായി നാല് വ്യക്തികളെ വരെ നോമിനിയായി ആഡ് ചെയ്യാം. ഇത് നിക്ഷേപകര്ക്കും, അവരുടെ നോമിനികള്ക്കും വേണ്ടിയുള്ള ക്ലെയിം സെറ്റില്മെന്റ് ലളിതമാക്കുന്നു.
നിക്ഷേപകര്ക്ക് അവരുടെ ഇഷ്ടാനുസരണം ഒരേസമയം അല്ലെങ്കില് തുടര്ച്ചയായ നാമനിര്ദ്ദേശങ്ങള് ഡെപ്പോസിറ്റ് അക്കൗണ്ടുകളിലും നടത്താം. അതേസമയം സേഫ് കസ്റ്റഡി, സേഫ്റ്റി ലോക്കറുകളിലെ വസ്തുക്കള്ക്കുള്ള നാമനിര്ദ്ദേശത്തിലേയ്ക്ക് വരുമ്പോള് തുടര്ച്ചയായ നാമനിര്ദ്ദേശങ്ങള് മാത്രമേ അനുവദിക്കൂ.
എത്രപേരെ നോമിനിയാക്കാം?
നിക്ഷേപകര്ക്ക് നാല് പേരെ വരെ നാമനിര്ദ്ദേശം ചെയ്യാനും, ഓരോ നോമിനിക്കും അവകാശത്തിന്റെ വിഹിതമോ ശതമാനമോ വ്യക്തമാക്കാനും ഇനിമുതല് കഴിയും. അതേസമയം ഈ വിഹിതങ്ങള് മൊത്തം 100 ശതമാനത്തിന് തുല്യമായിരിക്കണം.
എന്താണ് തുടര്ച്ചയായ നാമനിര്ദേശം?
തുടര്ച്ചയായ നാമനിര്ദ്ദേശം അല്ലെങ്കില് സക്സസീവ് നോമിനേഷന് എന്ന നിങ്ങള് മനസിലാക്കിയിരിക്കണം. ഇവിടെയും ഉപയോക്താവിന് നാല് നോമിനേഷന് വരെ നല്കാനാകും. നിക്ഷേപങ്ങള്, സേഫ് കസ്റ്റഡിയിലുള്ള വസ്തുക്കള്, ലോക്കറുകള് എന്നിവയ്ക്ക് ഇവ ബാധകമാണ്. എന്നാല് ഇവിടെ ആദ്യ നോമിനിയുടെ മരണശേഷം മാത്രമേ അടുത്ത നോമിനി പ്രാബല്യത്തില് വരികയുള്ളൂ. ഇത് സെറ്റില്മെന്റില് തുടര്ച്ചയും, പിന്തുടര്ച്ചയുടെ വ്യക്തതയും ഉറപ്പാക്കുന്നു.
ഈ പുതിയ നീക്കങ്ങള് ക്ലെയിം സെറ്റില്മെന്റുകള് ലളിതമാക്കുന്നതിനും, വേഗത്തിലാക്കുന്നതിനും, സുതാര്യത വര്ധിപ്പിക്കുന്നതിനും, നിക്ഷേപകര്ക്ക് അവരുടെ ആസ്തികളുടെ പിന്തുടര്ച്ച കൈകാര്യം ചെയ്യുന്നതില് കൂടുതല് വഴക്കം നല്കുന്നതിനും ഇടയാക്കുമെന്നാണ് വിലയിരുത്തല്. നിലവില് അവകാശികളിലാതെ ബാങ്കുകളില് കെട്ടികിടക്കുന്നത് കോടികളുടെ സമ്പത്താണ്. ഇത്തരമൊരു പ്രശ്നം ഭാവിയില് ഉടലെടുക്കാതിരിക്കാനാണ് നോമിനേഷന് നടപടികളിലെ ഇടപെടല്.
എല്ലാ ബാങ്കുകളിലും ഈ മാറ്റങ്ങള് നടപ്പിലാക്കുന്നതിനുള്ള വിശദമായ നടപടിക്രമങ്ങളും, ഫോമുകളും ഉറപ്പാക്കും. 1934 ലെ റിസര്വ് ബാങ്ക് ഓഫ് ഇന്ത്യ ആക്ട്, 1949 ലെ ബാങ്കിംഗ് റെഗുലേഷന് ആക്ട്, 1955 ലെ സ്റ്റേറ്റ് ബാങ്ക് ഓഫ് ഇന്ത്യ ആക്ട്, 1970, 1980 കളിലെ ബാങ്കിംഗ് കമ്പനികള് (അക്വിസിഷന് ആന്ഡ് ട്രാന്സ്ഫര് ഓഫ് അണ്ടര്ടേക്കിംഗ്സ്) ആക്ട് എന്നിവയിലാണ് ഇടപെടല് ഉണ്ടായിരിക്കുന്നത്
