ടെലിഫോൺ ചോർത്തിയെന്ന പരാതിയിൽ തൃണമൂൽ കോൺഗ്രസ് നേതാവും മുൻ എംഎൽഎയുമായിരുന്ന പി.വി. അൻവറിനെതിരേ മലപ്പുറം പോലീസ് കേസെടുത്തു. കൊല്ലം സ്വദേശി മുരുകേശ് നരേന്ദ്രൻ നൽകിയ പരാതിയിലാണ് കേസെടുത്തിരിക്കുന്നത്. മുരുകേശിന്റെ മൊഴി പോലീസ് രേഖപ്പെടുത്തിയിട്ടുണ്ട്.
2024 സെപ്റ്റംബർ ഒന്നിന് പി.വി. അൻവർ നടത്തിയ വാർത്താസമ്മേളനത്തിൽ ചില ഉദ്യോഗസ്ഥരുടെ ഫോൺ ചോർത്തിയതായുള്ള വിവരങ്ങൾ പറഞ്ഞിരുന്നു. ഇതിന് പിന്നാലെയാണ് കൊല്ലം സ്വദേശിയായ മുരുകേശ് നരേന്ദ്രൻ പരാതിയുമായി രംഗത്തെത്തിയത്.
അൻവറിനെതിരേ നിരന്തരം പരാതികൾ നൽകിയിട്ടുള്ള ആളാണ് താൻ. അതുകൊണ്ടുതന്നെ തന്റെ ഫോണും അൻവർ ചോർത്തിയേക്കാമെന്ന് ചൂണ്ടിക്കാട്ടിയാണ് മുരുകേശ് നരേന്ദ്രൻ പരാതി നൽകിയിരുന്നത്. എന്നാൽ, ഇതിൽ പോലീസ് നടപടികൾ കൈക്കൊണ്ടിരുന്നില്ല.
തെളിവുകളില്ലെന്നായിരുന്നു പോലീസിന്റെ വിശദീകരണം. തുടർന്ന് പരാതിക്കാരൻ ഹൈക്കോടതിയെ സമീപിക്കുകയായിരുന്നു.തെളിവ് കണ്ടെത്തേണ്ടത് പോലീസിന്റെ കടമയാണെന്നും പരാതിക്കാരന്റെ ബാധ്യതയല്ലെന്നും ഹൈക്കോടതി പറഞ്ഞു. തുടർന്നാണ് പരാതിക്കാരനെ വിളിച്ച് പോലീസ് കേസെടുത്തത്. ഐടി വകുപ്പും ടെലി കമ്യൂണിക്കേഷൻ ആക്ടും അനുസരിച്ചാണ് അൻവറിനെതിരേ കേസെടുത്തത്.
