തിരുവനന്തപുരം: ഗായകൻ എം.ജി. ശ്രീകുമാറിന്റെ (M.G. Sreekumar) വീട്ടിൽ നിന്നു കൊച്ചി കായലിലേക്കു മാലിന്യപ്പൊതി വീഴുന്ന വീഡിയോ പകർത്തിയ വ്യക്തിക്ക് തദ്ദേശവകുപ്പ് പാരിതോഷികം നൽകി. നെടുമങ്ങാട് സ്വദേശി എൻ.ബി. നസീമിനാണു 2500 രൂപയുടെ ചെക്ക് കൈമാറിയത്. കുറച്ച് മാസങ്ങൾ മുൻപ് കായലിൽ ബോട്ടിൽ സഞ്ചരിക്കുമ്പോൾ നസീം പകർത്തിയ വീഡിയോ സമൂഹമാധ്യമത്തിൽ പോസ്റ്റ് ചെയ്തിരുന്നു, അത് മന്ത്രി എം.ബി.രാജേഷിനെ ടാഗ് ചെയ്തതോടു കൂടിയായിരുന്നു നടപടി. തുടർന്ന് മന്ത്രിയുടെ നിർദേശപ്രകാരം ഇത് തദ്ദേശവകുപ്പിന്റെ വാട്സാപ് നമ്പറിലും അയച്ചു. ഈ അടിസ്ഥാനത്തിലാണ് എം.ജി. ശ്രീകുമാറിന് 25,000 രൂപ പിഴ ചുമത്തിയത്, അദ്ദേഹം അടുത്ത ദിവസം പിഴ അടച്ചതും.
ശ്രീകുമാർ പിന്നീട് വ്യക്തമാക്കിയത്, താൻ വീട്ടിൽ ഇല്ലാതിരുന്നപ്പോൾ ജോലിക്കാരി പഴകിയ മാങ്ങ കടലാസിൽ പൊതിഞ്ഞു കായലിലേക്കു വലിച്ചെറിഞ്ഞതാണെന്നും, നിയമലംഘനം വ്യക്തമായ സാഹചര്യത്തിലും ഉത്തരവാദിത്തപ്പെട്ട പൗരനെന്ന നിലയിൽ പിഴ അടച്ചതാണെന്നും പറയുകയുണ്ടായി.
