കൊല്ലം: സംസ്ഥാനത്തെ റോഡുകളെല്ലാം അന്താരാഷ്ട്ര നിലവാരത്തിലേക്ക് ഉയരുന്ന കാഴ്ചയാണ് കഴിഞ്ഞ ഏതാനം വർഷങ്ങളായി കാണുന്നത്. ഗ്രാമീണ റോഡുകൾ മുതൽ ദേശീയപാതകൾ വരെ നവീകരണത്തിൻ്റെ പാതയിലാണ്. ദേശീയപാത 66 ആറുവരി പാതയായി വികസിപ്പിക്കുമ്പോൾ മറ്റുപല ദേശീയപാതകളും നാലുവരിയായി ഉയർത്തുകയാണ്. കൊല്ലത്ത് നിന്ന് ആരംഭിക്കുന്ന ദേശീയപാത 183, 183 എ എന്നിവയുടെ അലൈമെൻ്റിൽ മാറ്റം വരുത്താനുള്ള സാധ്യതകളും തെളിയുകയാണ്. ദേശീയപാതകളുടെ നീളം കൂട്ടിനഗരത്തിലെ ഗതാഗതക്കുരുക്ക് ഒഴിവാക്കാനുള്ള ശ്രമങ്ങളാണ് ആരംഭിച്ചത്.
നിലവിൽ കൊല്ലം കടവൂരിൽ നിന്ന് ആരംഭിക്കുന്ന ദേശീയപാത 183 വികസനം ഹൈസ്കൂൾ ജങ്ഷൻ മുതൽ ആരംഭിക്കണമെന്നതാണ് ആവശ്യം. ഇതിനോടൊപ്പം ഭരണിക്കാവ് മുതൽ നടത്തുന്ന ദേശീയപാത 183 എ വികസനം കെഎംഎംഎൽ ടൈറ്റാനിയം ജങ്ഷൻവരെ നീട്ടണമെന്ന ആവശ്യവും ദേശീയപാത അതോറിറ്റിയുടെ മുന്നിലുണ്ട്.
റോഡുകൾ ദീർഘിപ്പിക്കുന്നതും കൂടുതൽ സ്ഥലം ചേർക്കുന്നതും സംബന്ധിച്ച വിഷയം കൊല്ലം എംപി എൻകെ പ്രേമചന്ദ്രൻ ലോക്സഭയിൽ ഉന്നയിച്ചിരുന്നു. ചട്ടം 377 പ്രകാരമാണ് വിഷയം ലോക്സഭയിൽ ഉന്നയിച്ചത്. ദേശീയപാത 183 കൊല്ലം ഹൈസ്കൂൾ ജങ്ഷൻമുതൽ ദിണ്ടിഗൽ വരെയാണ്. എന്നാൽ അലൈമെൻ്റ് നിശ്ചയിച്ചപ്പോൾ ദേശീയപാതകൾ പരസ്പരം ബന്ധിപ്പിച്ചാൽ മതിയെന്ന സർക്കാർ നയം അനുസരിച്ച് കൊല്ലം ഹൈസ്കൂൾ ജങ്ഷൻമുതൽ കടവൂർവരെയുള്ള ഭാഗം ഒഴിവാക്കപ്പെടുകയായിരുന്നു.
ദേശീയപാത 66ലെ കടവൂർമുതലാണ് നിലവിൽ ദേശീയപാത 183ന്‍റെ അലൈൻമെൻ്റ് അംഗീകരിച്ചിരിക്കുന്നത്. കൊല്ലം ഹൈസ്കൂൾ ജങ്ഷൻമുതൽ കടവൂർവരെ ഗതാഗതത്തിരക്ക് കൂടുതലാണ്. ഈ പ്രദേശത്ത് റോഡ് വികസനം നടപ്പായില്ലെങ്കിൽ ഗതാഗതകുരുക്ക് കൂടുകയല്ലാതെ കുറയുകയില്ല. ദേശീയപാത നാലുവരിപ്പാതയായി വികസിപ്പിക്കുമ്പോൾ ഹൈസ്കൂൾ ജങ്ഷനും ഉൾപ്പെടുത്തണമെന്നാണ് നാട്ടുകാരുടെ ആവശ്യം.
ദേശീയപാത 183 എ ഭരണിക്കാവിൽനിന്ന്‌ ദേശീയപാത 66 ലെ കെഎംഎംഎൽ ടൈറ്റാനിയം ജങ്‌ഷനുമായി ബന്ധിപ്പിക്കുന്ന തരത്തിൽ ദീർഘിപ്പിക്കുന്നതിനുള്ള നിർദേശം കേന്ദ്ര സർക്കാരിന്‍റെ പരിഗണനയിലാണ്. ഐആർഇഎൽ, കെഎംഎംഎൽ, നീണ്ടകര തുറമുഖം എന്നിവ ദേശീയപാത 66 ലെ ടൈറ്റാനിയം ജങ്‌ഷന് വളരെ അടുത്താണ് അതുകൊണ്ട് തന്നെ ദേശീയപാത ഇവിടേക്ക് ദീർഘിപ്പിക്കണമെന്നാണ്
ദേശീയപാത 66 ഉം ദേശീയപാത 183 ഉം ബന്ധിപ്പിക്കുന്ന ഭരണിക്കാവിൽനിന്ന്‌ ടൈറ്റാനിയം വരെയുള്ള ദേശീയപാത 183 എ തമിഴ്നാട്ടിലേക്കുള്ള ഗതാഗതത്തിന്‌ എളുപ്പമുള്ളതാണ്. ഈ സാഹചര്യത്തിൽ കൊല്ലം ഹൈസ്കൂൾ ജങ്ഷൻ – കടവൂർ റോഡ് വികസനം ദേശീയപാത 183 ന്‍റെ ഭാഗമായും, ടൈറ്റാനിയം ജങ്ഷൻ – ഭരണിക്കാവ് ദേശീയപാത വിപുലീകരണം 183 എയു ടെ ഭാഗമായും എറ്റെടുക്കണമെന്ന്‌ എംപി ലോക്സഭയിൽ ആവശ്യപ്പെട്ടു.
