ഭാര്യയെ മര്‍ദിച്ചു കൊലപ്പെടുത്തി മുന്‍ കസാഖ് മന്ത്രി. കസാഖിസ്ഥാനിലെ മുന്‍ ധനകാര്യമന്ത്രി കുവാന്‍ഡിക് ബിഷിംബായേവ് 31-കാരിയായ ഭാര്യ സാള്‍ട്ടാനത്ത് നുകെനോവയെ മര്‍ദിച്ചു കൊലപ്പെടുത്തിയെന്നാണ് കേസ്. കേസില്‍ വിചാരണ തുടങ്ങിയതോടെ സംഭവം രാജ്യത്ത് ചര്‍ച്ചാവിഷയമായി മാറിയിട്ടുണ്ട്. നീതിയുക്തവും തുല്യത നിറഞ്ഞതുമായ ഒരു സമൂഹം കെട്ടിപ്പടുക്കുമെന്ന പ്രസിഡന്റ് കാസിം-ജോമാര്‍ട്ട് ടോകയേവിന്റെ വാഗ്ദാനത്തിന്മേലുള്ള അഗ്നിപരീക്ഷണമായാണ് സംഭവം വിലയിരുത്തപ്പെടുന്നത്. കുവാന്‍ഡിക് ബിഷിംബായേവിന്റെ ബന്ധുവിന്റെ ഉടമസ്ഥതയിലുള്ള റസ്റ്റൊറന്റില്‍ കഴിഞ്ഞ നവംബറിലാണ് സാള്‍ട്ടാനത്ത് നുകെനോവയെ മരിച്ച നിലയില്‍ കണ്ടെത്തിയത്. ദമ്പതികള്‍ ഒരു രാത്രിയും പകലും ഈ റെസ്റ്റൊറന്റില്‍ ചെലവഴിച്ചിരുന്നു. മര്‍ദനത്തെത്തുടര്‍ന്ന് മണിക്കൂറുകളോളം ഇവര്‍ അബോധാവസ്ഥയിരുന്നുവെന്ന് റിപ്പോര്‍ട്ടുകള്‍ വ്യക്തമാക്കുന്നു. 44 കാരനായ കുവാന്‍ഡിക് ഭാര്യയെ മര്‍ദിക്കുന്ന എട്ട് മണിക്കൂര്‍ നീളുന്ന വീഡിയോ വിചാരണയ്ക്കിടെ കോടതിയില്‍ പ്രദര്‍ശിപ്പിച്ചിരുന്നു. തന്റെ കുടുംബത്തിന്റെ ഉടമസ്ഥതയിലുള്ള റെസ്റ്റൊറന്റില്‍വെച്ച് ഭാര്യയെ ഇയാള്‍ ആവര്‍ത്തിച്ച് ചവിട്ടുകയും അടിക്കുകയും ചെയ്യുന്നത് ദൃശ്യങ്ങളില്‍ കാണാം. മറ്റൊരു റൂമിലേക്ക് ഭാര്യയെ ഇയാള്‍ മുടിയില്‍ പിടിച്ചുവലിച്ച് കൊണ്ടുപോകുന്നതും കാണാം.
ഭാര്യ രക്തത്തില്‍ കുളിച്ച് തറയില്‍ ബോധരഹിതയായി കിടക്കുമ്പോള്‍ കുവാന്‍ഡിക് ജ്യോതിഷിയെ വിളിച്ചു. ഭാര്യ സുഖമായിരിക്കുമെന്ന് ജ്യോതിഷി കുവാന്‍ഡിക്കിന് ഉറപ്പു നല്‍കി. 12 മണിക്കൂര്‍ വൈകിയാണ് ആംബുലന്‍സ് റെസ്റ്റോറന്റില്‍ എത്തിയത്. എന്നാല്‍, അപ്പോഴേക്കും അവര്‍ മരിച്ചിരുന്നതായി മെഡിക്കല്‍ സ്റ്റാഫ് അറിയിച്ചു. മസ്തിഷ്‌കാഘാതം മൂലമാണ് സാള്‍ട്ടാനത്ത് മരിച്ചതെന്ന് കണ്ടെത്തി. മൂക്കിലെ എല്ലുകളിലൊന്ന് പൊട്ടുകയും മുഖത്തും തലയിലും കൈകളിലും ചതവുകള്‍ കണ്ടെത്തുകയും ചെയ്തിരുന്നു.
