ന്യൂഡൽഹി: രാജ്യത്ത് ഓഹരി വിപണികളിൽ കുതിപ്പ്. സെന്‍സെക്‌സും നിഫ്റ്റിയും വീണ്ടും റെക്കോഡ് ഉയരം കുറിച്ചു. ശക്തമായ സാമ്പത്തിക സൂചകങ്ങളും സംസ്ഥാന നിയമസഭാ തെരഞ്ഞെടുപ്പുകളിൽ ഭരണകക്ഷിയായ ബിജെപിയുടെ വിജയവുമാണ് ഓഹരി വിപണിയിൽ പ്രതിഫലിച്ചതെന്നാണ് വിലയിരുത്തൽ.
ബിഎസ്ഇ സെന്‍സെക്‌സ് 902 (1.64%) പോയന്റ് ഉയര്‍ന്ന് 68,587.82ലും നിഫ്റ്റി 286 പോയന്റ് (1.41%) ഉയർന്ന് 20,602.50ലുമാണ് 10 മണിയോടെ വ്യാപാരം നടന്നത്. ഓഹരികള്‍ കുതിച്ചതോടെ നിക്ഷേപകരുടെ ആസ്തിയില്‍ നിമിഷനേരംകൊണ്ട് നാല് ലക്ഷം കോടി രൂപയുടെ വര്‍ധനവാണുണ്ടായത്.
അദാനി ഓഹരികള്‍ കുതിപ്പിന്റെ പതയിലാണ്. സെന്‍സെക്‌സ് ഓഹരികളില്‍, എസ്ബിഐ, ഐസിഐസിഐ ബാങ്ക്, എല്‍ആന്‍ഡ്ടി, എന്‍ടിപിസി, എയര്‍ടെല്‍ എന്നിവ രണ്ട് ശതമാനം ഉയര്‍ന്നു. മഹീന്ദ്ര ആന്‍ഡ് മഹീന്ദ്ര, എച്ച്ഡിഎഫ്‌സി ബാങ്ക്, ബജാജ് ഫിനാന്‍സ്, ആക്‌സിസ് ബാങ്ക് തുടങ്ങിയ ഓഹരികളും നേട്ടത്തിലാണ്. നെസ്‌ലെ മാത്രമാണ് നഷ്ടത്തില്‍.
അദാനി എനര്‍ജി സൊലൂഷന്‍സ് 14 ശതമാനവും അദാനിന്‍ ഗ്രീന്‍ എനര്‍ജി 12 ശതമാനവും ഉയര്‍ന്നു. അദാനി എന്റര്‍പ്രൈസസ്, ടോട്ടല്‍ ഗ്യാസ്, അദാനി വില്‍മര്‍ എന്നിവയിലെ മുന്നേറ്റം 6-8 ശതമാനമാണ്.
