ആരാധകരെ വിശേഷങ്ങള്‍ നേരിട്ടറിയിക്കാന്‍ വാട്‌സാപ്പ് ചാനല്‍ തുടങ്ങി മലയാളത്തിന്റെ പ്രിയതാരങ്ങളായ മോഹന്‍ലാലും മമ്മൂട്ടിയും. വരുംകാല സിനിമകളുടെ അപ്‌ഡേറ്റുകള്‍ നേരിട്ടറിയിക്കും എന്ന് പറഞ്ഞുകൊണ്ടാണ് താരങ്ങള്‍ ഇരുവരും ചാനലില്‍ ആദ്യ മെസേജ് പങ്കുവെച്ചിരിക്കുന്നത്. ടെലിഗ്രാമിലെ ചാനലിന് സമാനമായ ഫീച്ചറാണ് വാട്സാപ്പിലും വന്നിരിക്കുന്നത്.
‘ഹലോ, മോഹന്‍ലാല്‍ ആണ്. നിങ്ങളെ എന്റെ വാട്ട്സ്ആപ്പ് ചാനലിലേക്ക് സ്വാഗതം ചെയ്യുന്നു! നിങ്ങള്‍ ഇവിടെയെത്തിയതില്‍ സന്തോഷം, എന്റെ എല്ലാ പ്രോജക്റ്റ് അപ്ഡേറ്റുകളും അതാത് സമയങ്ങളില്‍ ഇവിടെ അറിയിക്കും. തുടക്കക്കാർക്കായി, ഞാന്‍ ഇപ്പോള്‍ തിരുവനന്തപുരത്താണ്, സംവിധായകന്‍ ജീത്തു ജോസഫിനും ടീമിനുമൊപ്പം ഞങ്ങളുടെ വരാനിരിക്കുന്ന പ്രൊജക്റ്റായ നേരിന്റെ ഷൂട്ടിലാണ്. കൃത്യമായി അപ്‌ഡേറ്റുകള്‍ ലഭ്യമാകാന്‍ ഈ ചാനലില്‍ ചേരാന്‍ ഓര്‍ക്കുക. നന്ദി’- എന്നാണ് മോഹന്‍ലാല്‍ കുറിച്ചത്.
”എന്റെ ഔദ്യോഗിക വാട്ട്സ്ആപ്പ് ചാനലിന്റെ ലോഞ്ച് പ്രഖ്യാപിച്ചതില്‍ സന്തോഷമുണ്ട്. എന്നെക്കുറിച്ചുള്ള വിവരണങ്ങളും അപ്ഡേറ്റുകളും പോസ്റ്റുചെയ്യാന്‍ ഞാന്‍ ഈ ചാനല്‍ ഉപയോഗിക്കുന്നതിനാല്‍ ഇതില്‍ ചേരാന്‍ നിങ്ങളെ എല്ലാവരെയും ഞാന്‍ ക്ഷണിക്കുകയാണ്’– മമ്മൂട്ടി കുറിച്ചു.
ശനിയാഴ്ചയാണ് ഇരുവരും ചാനല്‍ ആരംഭിച്ചത്. നിലവില്‍ ചാനല്‍ തുടങ്ങാനുള്ള ഒപ്ഷന്‍ എല്ലാ ഉപഭോക്താക്കള്‍ക്കും ലഭിച്ച് തുടങ്ങിയിട്ടില്ല.
