സാമൂഹിക പ്രവര്‍ത്തകനും ഇന്ത്യന്‍ ഭരണഘടനയുടെ പിതാവുമായ ഡോ. ബി ആര്‍ അംബേദ്ക്കര്‍ക്കെതിരെ അപകീര്‍ത്തികരമായ പരാമര്‍ശം നടത്തിയതിന് മുന്‍ വിശ്വഹിന്ദു പരിഷത്ത് (വിഎച്ച്പി) നേതാവ് ആര്‍ബിവിഎസ് മണിയനെ ചെന്നൈ പൊലീസ് അറസ്റ്റ് ചെയ്തു. സോഷ്യല്‍ മീഡിയയില്‍ വൈറലായ ഒരു വീഡിയോയില്‍, വിഎച്ച്പി തമിഴ്നാട് ഘടകത്തിന്റെ മുന്‍ വൈസ് പ്രസിഡന്റായിരുന്ന മണിയന്‍, അംബേദ്കര്‍ക്കെതിരെ ജാതീയമായ അധിക്ഷേപങ്ങള്‍ നടത്തുന്നതായി കാണാം.
ഇന്ത്യന്‍ ഭരണഘടനയുടെ പിതാവായ ഡോ. ബി ആര്‍ അംബേദ്കറെ ‘ഗുമസ്തന്‍, ടൈപ്പിസ്റ്റ്, പ്രൂഫ് റീഡര്‍’ എന്നും അദ്ദേഹം പരാമര്‍ശിച്ചു. വീഡിയോ വൈറലായതോടെ മണിയനെതിരെ നിരവധിപേര്‍ രംഗത്തെത്തി. ‘അംബേദ്കര്‍ നമുക്ക് ഭരണഘടന നല്‍കിയെന്ന് പലരും പറഞ്ഞുകൊണ്ടേയിരിക്കുന്നു. അവര്‍ അദ്ദേഹത്തെ സ്തുതിച്ചുകൊണ്ടേയിരിക്കുന്നു. ഭരണഘടന രൂപപ്പെടുത്തുമ്പോള്‍ അദ്ദേഹം സ്വന്തമായി ഒന്നും കൊണ്ടുവന്നിട്ടില്ല. അവിടെ ഒരുപാട് ചര്‍ച്ചകള്‍ ഉണ്ടാകും. അതെല്ലാം ഒരു സ്റ്റെനോഗ്രാഫറാണ് എഴുതിയത്. സ്റ്റെനോഗ്രാഫര്‍ അത് ടൈപ്പ് ചെയ്തു. അപ്പോള്‍ ടൈപ്പ് ചെയ്തത് ശരിയാണോ എന്ന് ഒരാള്‍ പരിശോധിക്കണം. അതായിരുന്നു അംബേദ്കറുടെ ജോലി’ അദ്ദേഹം പറഞ്ഞു.
പരാതിയുടെ അടിസ്ഥാനത്തില്‍, സെക്ഷന്‍ 153, 505, ഐപിസി സെക്ഷനിലെ മറ്റ് വകുപ്പുകളും എസ്സി-എസ്ടി നിയമത്തിലെ പ്രസക്തമായ വകുപ്പുകള്‍ പ്രകാരവും മണിയനെതിരെ കേസ് രജിസ്റ്റര്‍ ചെയ്തതായി ചെന്നൈ പൊലീസ് പറഞ്ഞു.
