തമിഴ്നാട് ഗവർണർ ആർഎൻ രവിക്കെതിരെ രൂക്ഷ വിമർശനവുമായി ദ്രാവിഡ മുന്നേറ്റ കഴകം ഡിഎംകെ. ഗവർണർ ഗൂഢലക്ഷ്യത്തോടെയാണ് പ്രവർത്തിക്കുന്നതെന്ന് ഡിഎംകെ ഓർഗനൈസിംഗ് സെക്രട്ടറി ആർ എസ് ഭാരതി ആരോപിച്ചു. സംസ്ഥാന പബ്ലിക് സർവീസ് കമ്മിഷൻ മേധാവികളുടെ നിയമനവുമായി ബന്ധപ്പെട്ട ഫയൽ മടക്കി അയച്ച ഗവർണറുടെ തീരുമാനത്തോട് പ്രതികരിക്കുകയായിരുന്നു അദ്ദേഹം. സർക്കാർ അയച്ച എല്ലാ നിർദ്ദേശങ്ങളും ഗവർണർ നിരസിക്കുകയാണെന്നും അദ്ദേഹം ആരോപിച്ചു.
എംകെ സ്റ്റാലിന്റെ നേതൃത്വത്തിലുള്ള തമിഴ്നാട് സർക്കാർ തമിഴ്നാട് പിഎസ്‌സി ചെയർമാൻ സ്ഥാനത്തേക്കും മറ്റ് എട്ട് അംഗങ്ങളിലേക്കും മുൻ പോലീസ് ഡയറക്ടർ ജനറൽ സി ശൈലേന്ദ്രബാബുവിന്റെ പേര് ശുപാർശ ചെയ്തു. എന്നാൽ, ഈ സ്ഥാനാർത്ഥികളുടെ പേരുകൾ എങ്ങനെയാണ് അന്തിമമാക്കിയതെന്നും സുപ്രീം കോടതി പുറപ്പെടുവിച്ച മാർഗ്ഗനിർദ്ദേശങ്ങൾ പാലിച്ചോ എന്നും ചോദ്യങ്ങൾ ഉന്നയിച്ച് ഗവർണർ ഫയൽ മടക്കുകയായിരുന്നു.
നാഷണൽ എലിജിബിലിറ്റി കം എൻട്രൻസ് ടെസ്റ്റിൽ (നീറ്റ്) നിന്ന് ഒഴിവാക്കാനുള്ള സംസ്ഥാന ബില്ലിന് അംഗീകാരം നൽകുന്നതിൽ അദ്ദേഹം വിമുഖത കാട്ടിയതിനെ തുടർന്നാണ് വിയോജിപ്പുകൾ ശക്തിപ്പെട്ടത്. നിലവിൽ രാഷ്ട്രപതിയുടെ പരിഗണനയിലുള്ള ബിൽ താൻ ഒരിക്കലും പാസാക്കില്ലെന്ന് ഗവർണർ രവി പരസ്യമായി പ്രഖ്യാപിച്ചു.
പ്രതിഷേധങ്ങൾ ശക്തമാകുന്നതിനിടെ തമിഴ്നാട് യുവജനക്ഷേമ മന്ത്രി ഉദയനിധി സ്റ്റാലിൻ ഗവർണറെ ആർഎസ്എസ് രവി എന്ന് വിളിച്ച് ആക്ഷേപിച്ചതും ഏറെ വിവാദമായിരുന്നു.
