ജൂലൈ 24ന് നടക്കാനിരിക്കുന്ന രാജ്യസഭാ തിരഞ്ഞെടുപ്പിലേക്ക് മുതിർന്ന നേതാക്കളായ ഡെറിക് ഒബ്രിയാനും സാകേത് ഗോഖലെയും ഉൾപ്പെടെ ആറ് സ്ഥാനാർത്ഥികളുടെ പട്ടിക തൃണമൂൽ കോൺഗ്രസ് (ടിഎംസി) തിങ്കളാഴ്‌ച പ്രഖ്യാപിച്ചു. ദോല സെൻ, സുഖേന്ദു ശേഖർ റേ, സമീറുൾ ഇസ്ലാം, പ്രകാശ് ചിക് ബറൈക് എന്നിവരാണ് മറ്റ് സ്ഥാനാർത്ഥികൾ.
“ഡെറിക് ഒബ്രിയാൻ, ഡോല സെൻ, സുഖേന്ദു ശേഖർ, സമീറുൾ ഇസ്ലാം, പ്രകാശ് ചിക് ബറൈക്, സാകേത് ഗോഖലെ എന്നിവരുടെ സ്ഥാനാർത്ഥിത്വത്തെ ആസന്നമായ രാജ്യസഭാ തിരഞ്ഞെടുപ്പിൽ പ്രഖ്യാപിക്കുന്നതിൽ ഞങ്ങൾക്ക് അതിയായ സന്തോഷമുണ്ട്” തൃണമൂൽ കോൺഗ്രസ് ഔദ്യോഗിക ട്വീറ്റിൽ അറിയിച്ചു.
“ജനങ്ങളെ സേവിക്കുന്നതിനുള്ള അവരുടെ സമർപ്പണത്തിൽ അവർ ഉറച്ചുനിൽക്കട്ടെ, തൃണമൂലിന്റെ അജയ്യമായ ചൈതന്യത്തിന്റെയും ഓരോ ഇന്ത്യക്കാരന്റെയും അവകാശങ്ങൾക്കുവേണ്ടി വാദിക്കുന്നതിന്റെ സ്ഥായിയായ പൈതൃകം ഉയർത്തിപ്പിടിക്കട്ടെ. എല്ലാവർക്കും ഞങ്ങളുടെ ഹൃദയംഗമമായ ആശംസകൾ”, പാർട്ടി ട്വീറ്റ് ചെയ്‌തു.
ഡെറിക് ഒബ്രിയൻ, സുഖേന്ദു ശേഖർ റേ, ഡോല റേ എന്നിവരുടെ രാജ്യസഭാ കാലാവധി അവസാനിക്കുകയാണ്, അതിനാലാണ് ടിഎംസി വീണ്ടും സ്ഥാനാർത്ഥിത്വം പ്രഖ്യാപിക്കാൻ തീരുമാനിച്ചത്. ഗോവ, ഗുജറാത്ത്, പശ്ചിമ ബംഗാൾ എന്നിവിടങ്ങളിലെ 10 രാജ്യസഭാ സീറ്റുകളിലേക്കുള്ള തിരഞ്ഞെടുപ്പ് ജൂലൈ 24ന് നടക്കുമെന്ന് നേരത്തെ തിരഞ്ഞെടുപ്പ് കമ്മീഷൻ അറിയിച്ചിരുന്നു.
