ഹോളിവുഡ് താരവും ഓസ്കർ പുരസ്കാരജേതാവുമായ അലൻ അർക്കിൻ (89) അന്തരിച്ചു. ക്യാച്ച്-22, എഡ്വേർഡ് സിസ്‌സർഹാൻഡ്‌സ്, ലിറ്റിൽ മിസ് സൺഷൈൻ തുടങ്ങിയ ചിത്രങ്ങളിലെ ശ്രദ്ധേയമായ പ്രകടനത്തിന് അദ്ദേഹം പ്രശസ്തനായിരുന്നു.
മക്കളായ ആദം, മാത്യു, ആന്റണി എന്നിവരാണ് ഇക്കാര്യം അറിയിച്ചത്. ഒരു കലാകാരനെന്ന നിലയിലും മനുഷ്യനെന്ന നിലയിലും പ്രകൃതിയുടെ അതുല്യമായ കഴിവുള്ള ഒരു ശക്തിയായിരുന്നു അലനെന്ന് മക്കൾ വെള്ളിയാഴ്ച പുറത്തിറക്കിയ പ്രസ്താവനയിൽ പറഞ്ഞു.
ന്യൂയോർക്കിൽ ജനിച്ച് ലോസ് ഏഞ്ചൽസിൽ വളർന്ന നടനും സംവിധായകനും തിരക്കഥാകൃത്തുമാണ് അലൻ ആർക്കിൻ. 1955-ൽ ദ ടാരിയേഴ്സ് എന്ന നാടോടി സംഗീത ബാൻഡ് രൂപീകരിക്കുന്നതിന് മുമ്പ് അർക്കിൻ ലോസ് ആഞ്ജിലിസിലെ വിവിധ നാടക കോളേജുകളിലേക്കുള്ള സ്കോളർഷിപ്പുകൾ നേടി. 1956-ലെ ദി ബനാന ബോട്ട് സോങ്ങ് ടാരിയേഴ്സ് ബാൻഡിന്റെ വഴിയിലെ നാഴികക്കല്ലായി. സംഗീത ജീവിതവും അഭിനയവും ഒരുപോലെ തുടർന്നു. ചിക്കാഗോയിലെ സെക്കൻഡ് സിറ്റി ഇംപ്രൊവൈസേഷണൽ ട്രൂപ്പിലെ അംഗമായിരുന്നു അദ്ദേഹം. 1957-ലെ കാലിപ്‌സോ ഹീറ്റ് വേവിൽ ദ ടാരിയേഴ്‌സിനൊപ്പം ആദ്യമായി വലിയ സ്‌ക്രീനിൽ പ്രത്യക്ഷപ്പെട്ടു.
ഫ്രം ദി സെക്കൻഡ് സിറ്റി എന്ന ചിത്രത്തിലൂടെ അദ്ദേഹം ബ്രോഡ്‌വേയിൽ അരങ്ങേറ്റം കുറിച്ചു. ഇത് ശ്രദ്ധിക്കപ്പെട്ടതോടെ എന്റർ ലാഫിംഗ് എന്ന പ്രശസ്തമായ ചിത്രത്തിലെ ഒരു വേഷം അർക്കിനെ തേടിയെത്തി. ഇതിലൂടെ അദ്ദേഹം ടോണി പുരസ്കാരവും നേടി. 1966-ലെ ദി റഷ്യൻസ് ആർ കമിംഗ്, ദി റഷ്യൻസ് ആർ കമിംഗ് എന്ന ചിത്രമായിരുന്നു അർക്കിന്റെ ആദ്യ ഫീച്ചർ ചിത്രം. ഇതിലെ ചാരനെന്ന് തെറ്റിദ്ധരിക്കപ്പെട്ട സോവിയറ്റ് നാവികൻ റോസനോവ് എന്ന കഥാപാത്രത്തിലൂടെ മികച്ച നടനുള്ള ഓസ്കർ നാമനിർദേശവും ആർക്കിന് ലഭിച്ചു.
1967-ൽ ഓഡ്രി ഹെപ്ബേണിനൊപ്പം വെയ്റ്റ് അൺടിൽ ഡാർക്ക്, 1968-ൽ ദി ഹാർട്ട് ഈസ് എ ലോൺലി ഹണ്ടർ എന്നീ ചിത്രങ്ങളിലാണ് പിന്നീട് അദ്ദേഹം പ്രത്യക്ഷപ്പെട്ടത്. ഹാർട്ട് ഈസ് എ ലോൺലി ഹണ്ടറിലെ വേഷത്തിന് അദ്ദേഹത്തിന് രണ്ടാമത്തെ ഓസ്കർ നോമിനേഷൻ ലഭിച്ചു. ജോസഫ് ഹെല്ലറുടെ ഏറ്റവുമധികം വിറ്റഴിക്കപ്പെട്ട ട്രാജി-കോമിക് യുദ്ധ നോവലിന്റെ ചലച്ചിത്രാവിഷ്‌കാരമായ 1970-ലെ ‘ക്യാച്ച് 22’-ലാണ് അർക്കിന്റെ ഏറ്റവും മികച്ച പ്രകടനം ഉണ്ടായതെന്നാണ് നിരൂപകരുടെ അഭിപ്രായം.
2006-ൽ പുറത്തിറങ്ങിയ ലിറ്റിൽ മിസ് സൺഷൈൻ, 2013-ൽ പുറത്തിറങ്ങിയ ആർഗോ എന്നീ ചിത്രങ്ങളിലൂടെ മികച്ച സഹനടനുള്ള ഓസ്കർ പുരസ്കാരങ്ങൾ അലൻ അർക്കിനെ തേടിയെത്തി. 2018-ൽ പുറത്തിറങ്ങിയ നെറ്റ്ഫ്ളിക്സ് പരമ്പര ദ കോമിൻസ്കി മെത്തേഡിലും അർക്കിൻ ശ്രദ്ധേയമായ കഥാപാത്രത്തെ അവതരിപ്പിച്ചു.
