ഇടുക്കി: മഴ വലിയ തോതിൽ ശക്തിപ്രാപിച്ചില്ലങ്കിലും തണുപ്പ് ഹൈറേഞ്ച് മേഖലയിലെങ്ങും ശക്തമായി തുടങ്ങിയിട്ടുണ്ട്. ഇടുക്കിയുടെ കുളിരും മഴയും നുകരാൻ സഞ്ചാരികളുടെ വരവിലും വർധനവുണ്ടാകുന്നുണ്ട്. വാഗമൺ, കുമളി, പീരുമേട്, കുട്ടിക്കാനം, പുള്ളിക്കാനം, കാൽവരിമൗണ്ട്, മൂന്നാർ, മറയൂർ, വട്ടവട മേഖലയിലെല്ലാം മൺസൂൺ ടൂറിസം ശക്തിപ്രാപിച്ചിരിക്കുകയാണ്.
അവധി ദിവസങ്ങളിലാണ് സഞ്ചാരികളുടെ തിരക്കേറുന്നത്. ഒന്നു രണ്ടു ദിവസം തങ്ങി തണുപ്പ് നുകർന്ന് പോകാൻ എത്തുന്നവരാണ് ഏറെയും. എന്നാൽ വരും നാളുകളിൽ മഴ കൂടുതൽ കനക്കുന്നതോടെ ജാഗ്രതാ നിർദേശങ്ങൾ പുറപ്പെടുവിക്കുന്നതിന് പിന്നാലെ ചിലയിടങ്ങളിലെ വിനോദ സഞ്ചാരത്തിന് നിയന്ത്രണം ഏർപ്പെടുത്താനുള്ള സാധ്യത കൂടുതലാണ്. ഇത്തരം സന്ദർഭങ്ങളിൽ വിനോദ സഞ്ചാര മേഖല അൽപം പിന്നാക്കം പോകാനുള്ള സാധ്യത കൂടുതലാണ്.
കോടമഞ്ഞും തണുപ്പും കുളമാവ് നാടുകാണി വ്യൂ പോയിന്റിലെക്ക് സഞ്ചാരികളെ ആകർഷിക്കുന്നു. മഴക്കാലം ആരംഭിച്ചതോടെ കുളമാവിലെ മൺസൂൺ ടൂറിസത്തിന്റെ സാധ്യതകൾ ഉയർന്നിരിക്കുകയാണ്. കുളമാവ് നാടുകാണി പവലിയൻ ഉൾപ്പെടുന്ന പ്രദേശത്ത് സദാസമയവും മഞ്ഞു മൂടി കിടക്കുന്നതിനാൽ ഇവിടെയെത്തുന്ന സഞ്ചാരികൾക്ക് നയന മനോഹരമായ കാഴ്ചകളാണ് ഈ പ്രദേശം സമ്മാനിക്കുന്നത്. വേനൽക്കാലത്തും വസന്തകാലത്തും മൺസൂൺ കാലത്തും ഹൈറേഞ്ചിന്റെ കവാടമായ കുളമാവ് സഞ്ചാരികൾക്ക് ഒരേപോലെ പ്രിയപ്പെട്ടതാണ്.
വേനൽക്കാലങ്ങളിൽ തെളിഞ്ഞ കാലാവസ്ഥയിൽ ഇലവീഴാപൂഞ്ചിറ കുടയത്തൂർ, വാഗമൺ മലനിരകളും തൊടുപുഴ ഉൾപ്പെടെയുള്ള ടൗണുകളുടെ വിദൂരക്കാഴ്ചയും ഇവിടെ നിന്നും ആസ്വദിക്കാനാകും. മഴക്കാലത്ത് ഏറെ സമയവും ഈ പ്രദേശം മഞ്ഞുമൂടി കിടക്കുകയാണ്. നഗര ജീവിതത്തിന്റെ തിരക്കുകളിൽ നിന്ന് തണുപ്പും മഴയും, മഞ്ഞും ആസ്വദിക്കുവാൻ ഏറ്റവും അനുയോജ്യമായ പ്രദേശമാണ് കുളമാവ്. കുളമാവ് നാടുകാണി പവലിയനിൽ നിന്നും മുന്നോട്ട് പോകുന്ന വഴിയിലൂടെ സഞ്ചരിച്ചാൽ ഈ മനോഹര വ്യൂ പോയിന്റിൽ എത്താൻ സാധിക്കും.
