തൊടുപുഴക്ക് 220 കെ.വി സബ് സ്റ്റേഷന്‍ വരുന്നു.

പദ്ധതിയുടെ സാങ്കേതിക സാധ്യത റിപ്പോര്‍ട്ട് തയാറായി വരുന്നു.

ജില്ലയില്‍ പള്ളിവാസലിലാണ് നിലവില്‍ 220 കെ.വി സബ് സ്റ്റേഷനുള്ളത്. ഇത് ഉല്‍പാദന കേന്ദ്രത്തില്‍നിന്ന് വൈദ്യുതി പുറത്തേക്ക് കൊണ്ടുപോകാനുള്ളതാണ്. എന്നാല്‍, തൊടുപുഴയിലെ നിര്‍ദിഷ്ട സബ് സ്റ്റേഷന്‍ പൊതുജനങ്ങള്‍ക്ക് വൈദ്യുതി എത്തിക്കാനും അതുമായി ബന്ധപ്പെട്ട പ്രശ്നങ്ങള്‍ പരിഹരിക്കാനും ലക്ഷ്യമിട്ടുള്ളതാണ്.

ഇത്തരത്തിലുള്ള ജില്ലയിലെ ആദ്യ 220 കെ.വി സബ് സ്റ്റേഷന്‍ കൂടിയാകും ഇത്. കെ.എസ്.ഇ.ബിയുടെ ട്രാന്‍സ്മിഷന്‍ വിഭാഗത്തിന് കീഴില്‍ പ്രവര്‍ത്തിക്കുന്ന നിര്‍മാണ വിഭാഗമായ കളമശ്ശേരി ട്രാന്‍സ്ഗ്രിഡാണ് പദ്ധതിയുടെ സാങ്കേതിക റിപ്പോര്‍ട്ട് തയാറാക്കുന്നത്. 220/110 കെ.വിയുടെ രണ്ട് 100 എം.വി.എ ട്രാന്‍സ്ഫോര്‍മറും 110/33 കെ.വിയുടെ രണ്ട് 16 എം.വി.എ ട്രാന്‍സ്ഫോര്‍മറും മൂന്ന് 33 കെ.വി സബ് സ്റ്റേഷനും ഉള്‍പ്പെടെയാണ് പദ്ധതിക്ക് 81 കോടിയുടെ എസ്റ്റിമേറ്റ് തയാറാക്കിയിട്ടുള്ളത്.

നേട്ടങ്ങളേറെ

നിലവില്‍ മൂലമറ്റം -കൂത്താട്ടുകുളം ലൈനില്‍നിന്നാണ് തൊടുപുഴ സബ് സ്റ്റേഷനിലേക്ക് വൈദ്യുതി കൊണ്ടുവരുന്നത്. ഈ ലൈനിലെ ചെറിയ തകരാറുപോലും തൊടുപുഴയിലെ വൈദ്യുതി വിതരണത്തെ ബാധിക്കുന്ന അവസ്ഥയാണ്.66 കെ.വിയില്‍നിന്ന് വിതരണം 220 കെ.വിയിലേക്ക് മാറുമ്ബോള്‍തന്നെ പ്രസരണനഷ്ടം ഗണ്യമായി കുറയുമെന്ന് കെ.എസ്.ഇ.ബി അധികൃതര്‍ പറയുന്നു.

220 കെ.വി ലൈനുകളില്‍ വൈദ്യുതി തടസ്സം പൊതുവെ കുറവാണ്. തൊടുപുഴ മണ്ഡലത്തിലെ വിവിധ പ്രദേശങ്ങള്‍ അനുഭവിക്കുന്ന വോള്‍ട്ടേജ് ക്ഷാമത്തിനും പുതിയ സബ് സ്റ്റേഷന്‍ പരിഹാരമാകും. കല്ലൂര്‍ക്കാട്, വണ്ണപ്പുറം, മുട്ടം സബ് സ്റ്റേഷനുകള്‍ക്ക് പുതിയ സബ് സ്റ്റേഷന്‍റെ വരവ് ഗുണംചെയ്യും. ഭാവിയില്‍ എത്ര ലോഡ് വൈദ്യുതിക്ക് വേണമെങ്കിലും 220 കെ.വി സബ് സ്റ്റേഷന്‍ ഉപയോഗപ്പെടുത്താമെന്നതും നേട്ടമാണ്.

പരിഗണനയില്‍ അഞ്ചിരി

അഞ്ചിരി പ്രദേശത്തെ നാലേക്കറോളം സ്ഥലമാണ് പുതിയ 220 കെ.വി സബ്സ്റ്റേഷനു വേണ്ടി പ്രാഥമികമായി കണ്ടെത്തിയിട്ടുള്ളത്. നിലവിലെ ഇടുക്കി-കോതമംഗലം ലൈനിന് കീഴിലുള്ള സ്ഥലമാണ് പരിഗണിക്കുന്നത്. ഭൂമി ഏറ്റെടുക്കുന്നതടക്കം നടപടികള്‍ പൂര്‍ത്തിയായാല്‍ നിര്‍മാണ പ്രവര്‍ത്തനങ്ങളിലേക്ക് കടക്കും.

മൂന്നിടത്ത് 33 കെ.വി സബ് സ്റ്റേഷന്‍

നിര്‍ദിഷ്ട 220 കെ.വി സബ് സ്റ്റേഷന്‍റെ ഭാഗമായി തൊടുപുഴ നിയോജകമണ്ഡലത്തിലെ കോലാനി, മുതലക്കോടം, വെങ്ങല്ലൂര്‍ എന്നിവിടങ്ങളില്‍ പവര്‍ ഇവാക്വേഷന് വേണ്ടി 33 കെ.വി സബ് സ്റ്റേഷനുകള്‍ നിര്‍മിക്കും. ഭൂഗര്‍ഭ കേബിളുകള്‍ വഴിയാകും ഇവിടേക്ക് വൈദ്യുതി എത്തിക്കുക. നിലവിലെ 66 കെ.വി സബ് സ്റ്റേഷന്‍ നിലനിര്‍ത്തി പുതിയ 33 കെ.വി സബ് സ്റ്റേഷനുകളെ പരസ്പരം ഉപയോഗപ്പെടുത്തുക എന്ന രീതിയിലാണ് പദ്ധതി വിഭാനം ചെയ്തിട്ടുള്ളത്.