ഐതിഹ്യമാലയിൽ, 108 കറികൾ കൂട്ടിയുള്ള ഊണു ചോദിച്ച വരരുചിക്ക് ഇഞ്ചിക്കറി നൽകിയ ബുദ്ധിമതിയായ പെൺകുട്ടിയുടെ കഥയുണ്ട്. ധാരാളം ആരോഗ്യ ഗുണങ്ങളുള്ള ഇഞ്ചി മലയാളികൾക്കും ഏറെ പ്രിയപ്പെട്ടതാണ്. തണുപ്പുമൂലമുള്ള അസ്വസ്ഥതകളിൽ നിന്നും ആശ്വാസം പകരാൻ ഇഞ്ചി ചേർത്ത വിഭവങ്ങൾ ഭക്ഷണത്തിൽ ഉൾപ്പെടുത്താൻ ശ്രദ്ധിക്കണം.
ലോകത്തു തന്നെ ഏറ്റവും മികച്ച ഔഷധഗുണമുള്ള ഇഞ്ചിയാണ് അസമിലെ കർബി അങ്‌ലോങ് ജില്ലയിൽ കൃഷി ചെയ്യുന്നത്. കുറഞ്ഞ ഫൈബറും ഉയർന്ന പോഷക ഉള്ളടക്കവുമാണ് ഇതിനുള്ളത്. പേശീ വേദന, ദഹനക്കേട് എന്നിവയ്ക്കെല്ലാം മികച്ച ഔഷധമാണ്.
രോഗപ്രതിരോധ ശേഷി കൂട്ടാൻ, ബ്ലഡ് പ്രഷർ, കൊളസ്ട്രോൾ എന്നിവയൊക്കെ കുറയ്ക്കാൻ ഇഞ്ചി ഭക്ഷണത്തിൽ ഉൾപ്പെടുത്താൻ ശ്രദ്ധിക്കണം. ദിവസവും വീട്ടിൽ ഇഞ്ചി ചേർത്തു തയാറാക്കാവുന്ന നിരവധി വിഭവങ്ങളുണ്ട്. രാവിലത്തെ ചായ, ചെറുതായി നുറുക്കിയ ഇഞ്ചി ചേർത്തു തിളപ്പിച്ച വെള്ളത്തിൽ തയാറാക്കാം. ചുമ, ജലദോഷം എന്നിവയ്ക്കൊക്കെ ആശ്വാസം പകരും.
ഇഞ്ചിയും ശർക്കരയും നെയ്യും ചേർത്തു വീട്ടിൽ തന്നെ സൂപ്പർ ഇഞ്ചി മിഠായി തയാറാക്കാം. എള്ള്, മഞ്ഞൾപ്പൊടി, കുരുമുളക് എന്നിവയും ഇതിൽ ചേർക്കാം.
ഏലയ്ക്കയും പാലും ഇഞ്ചിയും ചേർത്തു യോജിപ്പിച്ച ശേഷം ഫ്രൈയിങ് പാനിൽ നെയ്യ് ഒഴിച്ച് ഈ കൂട്ട് ചേർത്തു വഴറ്റി നെയ്യ് തെളിഞ്ഞു തുടങ്ങുമ്പോൾ പഞ്ചസാരയും ഡ്രൈ ഫ്രൂട്ട്സും ചേർത്തു യോജിപ്പിക്കാം. നെയ്യ് പുരട്ടിയ പാത്രത്തിൽ നിരത്തി തണുപ്പിച്ച് എടുത്താൽ ഉഗ്രൻ ജിഞ്ചർ ബർഫി റെഡി
വൈറ്റമിൻ എ, ബീറ്റാ കരോട്ടിൻ, പൊട്ടാസ്യം, ഫൈബർ, ആന്റി ഓക്സിഡന്റ്സ് എന്നിവ ധാരാളമുള്ള കാരറ്റിനൊപ്പം ഇഞ്ചി ചേർത്തു സൂപ്പ് തയാറാക്കി കുടിക്കുന്നത് ജലദോഷം, പനി എന്നിവയെ ശമിപ്പിക്കും.
