ആലപ്പുഴ: സെപ്തംബര്‍ നാലിന് പുന്നമടക്കായലില്‍ നടക്കാനിരിക്കുന്ന നെഹ്റു ട്രോഫി വള്ളംകളിക്ക് കേന്ദ്ര ആഭ്യന്തരമന്ത്രി അമിത് ഷായെ മുഖ്യാതിഥിയായി ക്ഷണിച്ച് മുഖ്യമന്ത്രി പിണറായി വിജയന്‍. അമിത് ഷായ്ക്ക് ക്ഷണം അറിയിച്ച് കൊണ്ട് മുഖ്യമന്ത്രി കത്തയച്ചു. കേരളത്തിന്റെ ഓണാഘോഷങ്ങളില്‍ പങ്കെടുക്കണം എന്നും കത്തില്‍ അഭ്യര്‍ഥിച്ചിട്ടുണ്ട്.
ആഗസ്റ്റ് 23-നാണ് മുഖ്യമന്ത്രിയുടെ ഓഫീസില്‍ നിന്ന് കത്ത് അയച്ചത്. തെലങ്കാന ഉള്‍പ്പെടെയുള്ള ദക്ഷിണേന്ത്യന്‍ സംസ്ഥാനങ്ങളുടെ ദക്ഷിണമേഖലാ കൗണ്‍സില്‍ യോഗം ആഗസ്റ്റ് 30 മുതല്‍ സെപ്റ്റംബര്‍ മൂന്ന് വരെ കോവളത്ത് വെച്ച് നടക്കുന്നുണ്ട്. അമിത് ഷാ ഉള്‍പ്പെടെയുള്ള പ്രമുഖര്‍ ദക്ഷിണമേഖലാ കൗണ്‍സില്‍ യോഗത്തില്‍ പങ്കെടുക്കും.ഇതിനെത്തുമ്പോള്‍ നെഹ്റു ട്രോഫി വള്ളംകളിയിലും പങ്കെടുക്കണം എന്നാണ് മുഖ്യമന്ത്രി അഭ്യര്‍ഥിച്ചിരിക്കുന്നത്. ഇത്തവണത്തെ നെഹ്റു ട്രോഫി വള്ളംകളിയില്‍ ഒന്‍പത് വിഭാഗങ്ങളിലായി 79 വള്ളങ്ങളാണ് മാറ്റുരയ്ക്കുന്നത്. മുഖ്യമന്ത്രി വള്ളംകളിക്ക് പങ്കെടുക്കും. അതിനാല്‍ സമയക്രമം പാലിച്ച് വള്ളംകളി നടത്താനുള്ള ശ്രമത്തിലാണ് സംഘാടകര്‍.
