തിരുവനന്തപുരം: ദിലീപ് കേസിലെ പോലെ തന്നെ വിജയ് ബാബു വിഷയത്തിലും മലയാള സിനിമാ താരങ്ങള്‍ പല തട്ടിലാണ്. ശക്തമായ നടപടി വേണമെന്ന് ചിലര്‍. പ്രതിയായി എന്നതുകൊണ്ടു മാത്രം കുറ്റക്കാരനാകുമോ എന്ന് മറ്റു ചിലര്‍. പോലീസ് അന്വേഷണം ഒരു ഭാഗത്ത് ശക്തമായി നടക്കുന്നു. വിജയ് ബാബുവിനെതിരെ തെളിവുണ്ട് എന്നാണ് കൊച്ചി സിറ്റി പോലീസ് കമ്മീഷണര്‍ സിഎച്ച് നാഗരാജു പറഞ്ഞത്.
കഴിഞ്ഞ മാസം 24നാണ് വിജയ് ബാബുവിനെതിരെ കോഴിക്കോട് സ്വദേശിനിയായ യുവനടി പീഡന പരാതി നല്‍കിയത്. കേസെടുത്ത പോലീസ് അന്വേഷണം തുടങ്ങിയപ്പോഴേക്കും വിജയ് ബാബു ഇന്ത്യ വിട്ടിരുന്നു. കേസെടുത്ത വിവരം വിജയ് ബാബുവിന് ചോര്‍ന്നുകിട്ടിയെന്നും അതാണ് അദ്ദേഹം വേഗത്തില്‍ രാജ്യം വിട്ടതെന്നും ആക്ഷേപം ഉയരുകയും ചെയ്തു.
താരസംഘടനയായ അമ്മയില്‍ വിജയ് ബാബു വിഷയം ചൂടേറിയ ചര്‍ച്ചയാണ്. നടപടിയെടുക്കാത്തതില്‍ പ്രതിഷേധിച്ച് നടി മാലാ പാര്‍വതി അമ്മയുടെ പരാതി പരിഹാര സമിതിയില്‍ നിന്ന് രാജിവച്ചു. അമ്മ സ്ത്രീ വിരുദ്ധമായ നടപടികള്‍ സ്വീകരിക്കുന്നു എന്നാരോപിച്ച് നടന്‍ ഹരീഷ് പേരടി അമ്മയില്‍ നിന്ന് രാജി പ്രഖ്യാപിച്ചു. രാജിയില്‍ നിന്ന് പിന്നോട്ടില്ലെന്നും സുരേഷ് ഗോപി ഒഴിച്ച് താരങ്ങള്‍ ആരും തന്നെ വിളിച്ചില്ലെന്നും ഹരീഷ് പേരടി അറിയിച്ചു.
വിജയ് ബാബുവിനെ അമ്മയില്‍ നിന്ന് ചവിട്ടിപ്പുറത്താക്കാന്‍ സാധിക്കില്ല എന്നാണ് സംഘടനയുടെ വൈസ് പ്രസിഡന്റ് മണിയന്‍പിള്ള രാജു പ്രതികരിച്ചത്. വനിതാ താരങ്ങള്‍ക്ക് വേണമെങ്കില്‍ അവരുടേതായ സംഘടനയുണ്ടല്ലോ എന്നും അദ്ദേഹം സൂചിപ്പിച്ചു. പലവിധ ചര്‍ച്ചകളും നടന്നുവരവെയാണ് പത്തനാപുരം എംഎല്‍എ കൂടിയായ ഗണേശ് കുമാറിനോട് വിഷയത്തില്‍ പ്രതികരണം തേടിയത്.
വിജയ് ബാബുവിനെതിരെ നടപടി വേണോ എന്നായിരുന്നു ഗണേശ് കുമാറിനോടുള്ള ചോദ്യം. എന്നെ വിട്ടേരെ കുഞ്ഞേ, അതൊന്നും ഞാന്‍ പറയില്ല, എനിക്ക് അമ്മയുമായി യാതൊരു ബന്ധവുമില്ല. അഭിനയിക്കാന്‍ വിളിച്ചാല്‍ പോകും, അല്ലാതെ വേറെ ഒന്നിനുമില്ല. അമ്മയൊക്കെ വിട്ടു. ആരുമായും ഒരു ബന്ധവുമില്ലെന്നും ഗണേശ് കുമാര്‍ പ്രതികരിച്ചു.
